Skip to content

Skip to table of contents

Olombangi Via Yehova

Select language Umbundu

Esapulo 103: Vokati Kohondo

Esapulo 103: Vokati Kohondo

ECI Petulu la Yoano va tunda keyambo Maria wa siala likaliaye. Kuenje wa fetika oku lila. Noke eye wa lengelela vokati keyambo, ndomo tua ci mola ale vociluvialuvia ca pita. Eye wa mola ovangelo vavali, vo pula hati: ‘Nye olilila?’

Maria wa kumbulula hati: ‘Vopamo Ñala yange, oku vo kapa si ko.’ Eci eye a ñualapo wa mola ulume umue. Ulume waco wo pula hati: ‘Helie ove o kasi loku sandiliya?’

Maria wa simile okuti ulume waco ukuacumbo, eye wa ambata etimba lia Yesu. Kuenje wa popia lulume hati: ‘Nda ove wo ambata sapuileko oku wo tuala.’ Pole, ulume waco Yesu. Eye wa kala letimba limue okuti Maria ko limbukile. Pole, eci Yesu o vilikiya konduko, Maria wa limbuka okuti Yesu. Eye wa lupuka oku ka sapuilako olondonge viaye hati, ‘Nda mola Ñala!’

Noke osimbu olondonge vivali via kala loku enda kimbo lioko Emausi, ulume umue wa endela kumue lavo. Olondonge via sumuile calua, omo Yesu a pondiwa. Pole, ulume wa endela kumue lavo wa va sapuila ovina vialua viatiamẽla Kembimbiliya, kuenje wa va tulisa utima. Eci ovo va talama oco va lie, va limbuka okuti ulume waco Yesu. Noke olondonge ka vio muile vali. Ovo va tiukila ko Yerusalãi oco va sapuileko ovapostolo.

Vokatembo katito Yesu wa molehavo ku Petulu. Vakuavo va sanjuka calua eci va ciyeva. Noke olondonge vivali via enda ko Yerusãlai oku ka sapuilako ovapostolo. Ovo va popia lavo okuti Yesu wa va molehẽla vonjila. Osimbu handi va kala loku vangula, wa kũlĩha eci ca pitako?

Vanja vociluvialuvia. Yesu wa molẽha vohondo, ndaño okuti epito lia yikiwa. Keteke liaco olondonge via sanjukile calua! O tẽla hẽ oku tenda olonjanja viñami Yesu a molẽha kolondonge viaye? Olonjanja vitãlo?

Yesu wa moleha kolondonge

Eci Yesu a molẽha Tomasi ka kailepo. Olondonge vio sapuila hati: ‘Tua mola Ñala!’ Pole, Tomasi wa popia hati, ndi tava ño nda ndo mola. Eci pa pita oloneke ecelãla, olondonge via kala vali vohondo ya yikiwa, Tomasi haimo a kala. Vonjanja yaco Yesu wa molẽha vohondo, kuenje Tomasi wa tava.

Yoano 20:11-29; Luka 24:13-43.



Apulilo

  • Nye Maria a popia lulume umue a simĩle okuti ukuacumbo? Pole nye co kuatisa oku limbuka okuti eye wa kala Yesu?
  • Nye ca pita lolondonge vivali eci va kala oku enda kimbo lio Emausi?
  • Ocina cipi ci komohisa ca pita eci olondonge vivali via sapuila ovapostolo okuti va mola Yesu?
  • Yesu wa moleha olonjanja viñami kolondonge viaye?
  • Nye Tomasi a popia eci a yeva okuti olondonge via mola Ñala? Pole nye ceya oku pita noke lioloneke ecelãla?

Apulilo akuavo

  • Tanga Yoano 20:11-29.

    Anga hẽ kelivulu lia Yoano 20:23 Yesu wa yonguile oku popia okuti omanu va kuete omoko yoku tetela akandu? Ci lombolola. (Osa. 49:2, 7; Isa. 55:7; 1 Tim. 2:5, 6; 1 Yoa. 2:1, 2)

  • Tanga Luka 24:13-43.

    Tu pongiya ndati ovitima vietu oco vi tave ocili Cembimbiliya? (Luka 24:32, 33; Esera 7:10; Mat. 5:3; Ovil. 16:14; Va Hev. 5:11-14)