Skip to content

Skip to table of contents

Olombangi Via Yehova

Select language Umbundu

Esapulo 102: Yesu wa Pinduka

Esapulo 102: Yesu wa Pinduka

OVE wa kũlĩha ukãi u lalume ava vavali? Ukãi u, Maria Magadala, kamba lia Yesu. Alume luwalo uyela, ovangelo. Veleva eli Maria a kasi loku lengelela ndeti, omo va kapele etimba lia Yesu eci a fa. Eleva liaco, li tukuiwa hati eyambo. Pole, cilo etimba lia Yesu ka li kasimo. Helie wa liupamo? Tu ci kũlĩhĩsi.

Ovangelo va vangula la Maria Magadala

Noke yokufa kua Yesu ovitunda via sapuila Pilato hati: ‘Eci Yesu a kala lomuenyo wa popele hati, kovaso yoloneke vitatu oka pinduka. Handeleka okuti eleva li laviwa, oco olondonge viaye ka vi ka nyane etimba liaye ha va popi hati wa pinduka.’ Pilato wa popia lovitunda hati, tumi asualali oku lavulula eyambo.

Veteke liatatu lomẽle noke yokufa kua Yesu, kua moleha ungelo wa Yehova. Eye wopa ewe kilu lieyambo. Asualali va kala lusumba walua kuenje ka va li sengele. Noke eci va vanja veyambo, etimba lia Yesu ka lia kailemo! Vamue va enda volupale oku sapuilako ovitunda. Wa kũlĩha eci ovitunda via linga? Ovo va feta olombongo kasualali oco va vangule uhembi. Ovo va popia lavo hati: ‘Popi okuti olondonge viaye vieya oku u nyanamo osimbu tua pekela.’

Noke, akãi vamue akamba va Yesu va endele oku nyula keyambo. Pole, eyambo lia kala upolokoso! Vonjanja yaco, kueya ovangelo vavali va wala uwalo uyela. Ovo va pula kakãi hati: ‘Nye vu sandiliyila Yesu? Eye wa pinduka. Kuendi lombili ka sapuiliko olondonge viaye.’ Akãi va enda lonjanga! Pole, ulume umue wa va talamisa. Wa kũlĩha hẽ ulume waco? Ulume waco Yesu! Eye wa popia lavo hati: ‘Kuendi ka pañinyi olondonge viange.’

Eci akãi va sapuila olondonge okuti Yesu wa pinduka kuenda vo mola, olondonge ka via tavele. Kuenje Petulu la Yoano va lupukila keyambo, pole eyambo lia kala muẽle upolokoso! Eci Petulu la Yoano va pitĩla, Maria Magadala wa kala konyima. Eci eye a lengelela veyambo wa mola ovangelo vavali.

Wa kũlĩha eci ca pita letimba lia Yesu? Suku wa linga okuti etimba liaye ka li muiwa vali. Suku ka pinduile Yesu letimba lina eye a fa lalio. Yesu wa pinduiwa letimba liespiritu, ndeli liovangelo. Pole, oco a lekise kolondonge viaye okuti eye wa pinduka muẽle, Yesu wa li molehĩsa kokuavo letimba liositu okuti o muiwa ndomo tuka ci lilongisa.

Mateo 27:62-66; 28:1-15; Luka 24:1-12; Yoano 20:1-12.



Apulilo

  • Ukãi u lalume vavali vociluvialuvia velie? Kuenda pi ovo va kasi?
  • Momo lie Pilato a sapuilila ovitunda oco va tume asualali oku lava eyambo lia Yesu?
  • Nye ovangelo va linga keteke liatatu noke liolofa via Yesu? Pole nye ovitunda via linga?
  • Momo lie akãi vamue va sumuilile eci va endele oku nyula eyambo lia Yesu?
  • Momo lie Petulu la Yoano va lupukilila keyambo lia Yesu? Kuenda nye ovo va sangako?
  • Nye ca pita letimba lia Yesu? Pole nye eye a linga oco a lilekise kolondonge viaye okuti wa pinduiwa?

Apulilo akuavo

  • Tanga Mateo 27:62-66 kuenda 28:1-15.

    Eci Yesu a pinduiwa ovitunda vinene la va Fariseo kuenda akulu va lueyela ndati espiritu sandu? (Mat. 12:24, 31, 32; 28:11-15)

  • Tanga Luka 24:1-12.

    Ulandu wepinduko lia Yesu u lekisa ndati okuti Yehova wa tendele akãi ndolombangi viocili? (Luka 24:4, 9, 10; Mat. 28:1-7)

  • Tanga Yoano 20:1-12.

    Elivulu lia Yoano 20:8, 9 li tu kuatisa oku limbuka nye nda ocitumasuku cimue Cembimbiliya ka ca tu lombolokele? (Olosap. 4:18; Mat. 17:22, 23; Luka 24:5-8; Yoa. 16:12)