Skip to content

Skip to table of contents

Olombangi Via Yehova

Select language Umbundu

Esapulo 112: Onaviyu ya Nyõleha

Esapulo 112: Onaviyu ya Nyõleha

TALA ño, onaviyu eyi yi kasi lovitangi! Yi kasi loku teka teka! O lete omanu va kasi loku limba ndeti vovava? Vamue va pitĩla ale kongongo. Anga hẽ u o kasi ndeti palo Paulu? Tu kũlĩhĩsi eci ca pita laye.

Omanu va puluka konaviyu ya teka

Ivaluka okuti, Paulu wa kala omandekua ko Kaisarea anyamo avali. Noke eye kumue lolomandekua vikuavo, va kapiwa vonaviyu oku enda ko Roma. Eci va pita ocipepi locifuka co Kurete, va li yaka lehunguhungu. Ofela ya kala loku sika calua okuti vakuanaviyu va kala lovitangi yoku yendisa. Utanya ka wa kaile loku tua, ndaño olombungululu kuteke. Noke lioku pita oloneke vialua, vosi va kala vonaviyu ka va kuatele vali elavoko lioku puluka.

Noke Paulu wa votoka kuenje wa popia hati: ‘Lomue pokati kene oka pesela omuenyo waye, onaviyu lika yika nyõleha. Uteke wetaili ungelo wa Suku weya kokuange, kuenda wa popia hati: ‘Ku ka yokoke, A Paulu! Oka talama kovaso a soma yoko Roma Kaisare. Kuenda Suku oka yovola vosi va endela kumue love.’

Keteke liekũi lakuãla vokati kuteke tunde eci va vetiwa lofela vakuanaviyu va limbuka okuti okalunga ka tulumuha! Omo liohele yoku veta kovawe luteke, ovo va imba olonjundo. Eci kuaca ovo va mola osi ya kukuta. Kuenje va seteka oku kokela onaviyu toke kongongo.

Eci va pitĩla ocipepi longongo, onaviyu ya veta vewe, kuenje ya sakatela. Akimba a fetika oku teya teya onaviyu. Kesongo kasualali wa popia hati: ‘Ava va tẽla oku yua va limbe vovava ha va tetekela kongongo. Vakuavo va endela kavaya vonaviyu.’ Eci oco ovo va linga. Vosi yavo 276 komanu va kala vonaviyu va puluka, ndomo ungelo a ci popele.

Ocifuka caco ci tukuiwa hati Melita. Omanu vaco va kala vakuahenda, kuenda va tata ciwa vosi va kala vonaviyu. Eci ehunguhungu lia pita, otembo ya kala ciwa, kuenje Paulu wambatiwa lonaviyu yikuavo toke ko Roma.

Ovilinga 27:1-44; 28:1-14.



Apulilo

  • Nye ca pita lonaviyu Paulu a endela eci va kala ocipepi locifuka co Kurete?
  • Nye Paulu a popia lava a kala lavo vonaviyu?
  • Onaviyu yeya oku nyõleha ndati?
  • Olonumbi vipi vakuanaviyu va eca? Kuenda omanu valua va pitĩla ndati konele yokalunga?
  • Yipi ya kala onduko yocifuka caco? Kuenda nye ca pita la Paulu eci ehunguhungu lia tulumuha?

Apulilo akuavo

  • Tanga Ovilinga 27:1-44.

    Ekolelo lipi tu kuete liokuti Embimbiliya lia suapo eci tu tanga ulandu wa Paulu watiamẽla kungende waye ko Roma? (Ovil. 27:16-19, 27-32; Luka 1:3; 2 Tim. 3:16, 17)

  • Tanga Ovilinga 28:1-14.

    Ndomo olonungi vio ko Melita via tata ‘lohenda yalua’ Paulu lava va kala laye vonaviyu, ci vetiya Akristão oku lingavo nye? Kuenda va kuete oku ci linga? (Ovil. 28:1, 2; Va Hev. 13:1, 2; 1 Pet. 4:9)