Skip to content

Skip to table of contents

Olombangi Via Yehova

Select language Umbundu

Esapulo 110: Timoteo wa Linga Oñuatisi ya Paulu

Esapulo 110: Timoteo wa Linga Oñuatisi ya Paulu

ULUME u o letele ndeti la Paulu, Timoteo. Epata lia Timoteo lia kala ko Lustra. Onduko ya inaye Eunike kuenda inakulu yaye Loisi.

Paulu wa nyula o Lustra olonjanja vitatu. Onjanja yimue wa endele la Barnaba oku ka kunda. Noke wa endelekovo lekamba liaye Sila.

Timoteo kuenda Paulu

Wa kũlĩha eci Paulu a kasi loku pula ku Timoteo? Paulu wo pula hati: ‘Oyongola oku enda lame kuenda la Sila? Nda wa tu kuatisa oku kundila omanu kupãla.’

Timoteo wa tambulula hati citava, ‘Ndi yongola oku enda lene.’ Noke Timoteo wa siapo epata liaye kuenje wa enda kumue la Paulu kuenda Sila. Osimbu handi ka tua lilongisile catiamẽla kungende wavo, tu kũlĩhĩsi eci ca pita la Paulu. Tunde eci Yesu a molehele ku Paulu vetapalo lio Damasko, kua pitile ale ci soka ekũi lepanduvali kanyamo.

Ivaluka okuti, Paulu wa endaile ko Damasko oku kangisa olondonge via Yesu. Eye cilo wa linga ondonge ya Yesu. Noke, vamue ovanyali va sima oku ponda Paulu, omo okuti ka va solele eci eye a kala loku longisa catiamẽla ku Yesu. Pole, olondonge via kuatisa Paulu oku tila. Vo kapa vocikasia cimue kuenda vo lowila kocimbaka colupale.

Noke Paulu wa kundila ko Antiokea, kuna olondonge via Yesu via tukuiwa tete okuti Akristão. Paulu la Barnaba va enda oku tunda ko Antiokea oku ka kundila kolofeka vikuavo. Yimue pokati kolofeka va nyula, ko Lustra, kuna kua kala Timoteo.

Eci papita ci soka ulima, Paulu wa tiukila ko Lustra kungende waye wavali. Eci Timoteo a enda la Paulu kumue la Sila, wa kũlĩha oku ovo va endela? Tala vo mapa, kuenda tu kũlĩhĩsi ovitumãlo vimue.

Tete, ovo va enda ko Ikoniyu, noke va endavo kolupale lua vali lu tukuiwa Antiokea. Noke va endela ko Torasi, ko Filipoi, ko Tesalonike kuenda ko Berea. O lete olupale luo Atenai vo mapa? Paulu oko a kundila. Noke va kundila vo lupale luo Korindo vokuenda kunyamo lolosãi epandu. Oku sulako va puyukapo kamue vo lupale luo Efeso. Va tiukila ko Kaisare noke va enda ko Antiokea, kuenje oko Paulu a siala.

Timoteo wa linga ovongende alua la Paulu poku u kuatisa oku kunda “olondaka viwa” kuenda poku sovola akongelo alua Akristão. Anga hẽ eci ove oka kula, oka kala ufendeli umue wa Suku ndeci Timoteo a linga?

Ovilinga 9:19-30; 11:19-26; kocipama 13 toke 17; 18:1-22.

Omapa

1. ; 2. ; 3. ; 4. ; 5. ; 6. ; 7. ; 8. ; 9. ; 10. ; 11. ; 12. ; 13. ; 14. ; 15. ; 16. ; 17. ; 18. ; 19. ; 20. ; 21. ; 22.  ()



Apulilo

  • Umalẽhe u vociluvialuvia helie? Pi eye a kala? Kuenda helie wa kala inaye la inakulu yaye?
  • Nye Timoteo a tambulula eci Paulu o pulisa nda wa yonguile oku enda laye kuenda Sila oku ka kundila omanu kolofeka kupãla?
  • Pi olondonge via Yesu via tukuiwa tete Ndakristão?
  • Eci Paulu la Barnaba va tunda ko Antiokea alupale api ovo noke veya oku nyula?
  • Timoteo wa kuatisa ndati Paulu? Kuenda apulilo api amalẽhe va sukila oku li pula ovo muẽle?

Apulilo akuavo

  • Tanga Ovilinga 9:19-30.

    Paulu wa lekisa ndati utate eci a liyaka lalambalalo poku kunda olondaka viwa? (Ovil. 9:22-25, 29, 30; Mat. 10:16)

  • Tanga Ovilinga 11:19-26.

    Ulandu u sangiwa kelivulu Liovilinga 11:19-21, 26 u lekisa ndati okuti espiritu lia Yehova olio li kasi oku songola upange woku kunda?

  • Tanga Ovilinga 13:13-16, 42-52.

    Elivulu Liovilinga 13:51, 52 li lekisa ndati okuti olondonge ka via konyõhele ndaño lelambalalo? (Mat. 10:14; Ovil. 18:6; 1 Pet. 4:14)

  • Tanga Ovilinga 14:1-6, 19-28.

    Ondaka ‘va va kundika ku Yehova’ yi tu vetiya ndati oku tepululako asakalalo etu oco tu kuatise ava va fetika oku lilongisa ndopo? (Ovil. 14:21-23; 20:32; Yoa. 6:44)

  • Tanga Ovilinga 16:1-5.

    Onjongole ya Timoteo yoku tava oku tetiwa evamba yi lekisa ndati esilivilo lioku ‘lingila cosi ondaka yiwa’? (Ovil. 16:3; 1 Va Kor. 9:23; 1 Va Tes. 2:8)

  • Tanga Ovilinga 18:1-11, 18-22.

    Elivulu Liovilinga 18:9, 10 li lekisa nye catiamẽla kekuatiso Yesu a siata oku eca kupange woku kunda? Kuenda eci ci tu ĩha ekolelo lie koloneke vilo? (Mat. 28:20)