Skip to content

Skip to table of contents

Olombangi Via Yehova

Select language Umbundu

Esapulo 98: Komunda Yoliveira

Esapulo 98: Komunda Yoliveira

U OKASI ndeti Komunda Yoliveira, Yesu. Alume ava vakuãla akasi lavo olondonge viaye. Petulu la Andereu omunu lamanjaye. Tiago la Yoano haicovo omunu lamanjaye. Eci o letele ndeti ocipãla onembele ya Suku vo Yerusalãi.

Papitile ale oloneke vivali tunde eci Yesu a kala loku endela kocimbulu vo Yerusalãi. Ca kala Vovali. Eci kuaca omẽle, Yesu wa enda konembele. Ovitunda via seteka oku u kuata oco vo ponde. Pole, ovo va kala lohele, omo okuti omanu va solele Yesu.

Yesu kuenda ovapostolo

Yesu wa tukula asongui vakuatavo, hati: ‘Ene vu lonyoha kuenda vu mbuto yolombuta.’ Yesu wa va sapuila okuti, Suku oka va yambula omo liovilinga viavo vĩvi. Noke Yesu wa londa Komunda Yoliveira. Olondonge viaye via fetika oku u linga apulilo. Wa kũlĩha eci olondonge via pula Yesu?

Olondonge via kala loku u pula catiamẽla kovina via laikele okuiya. Ovo va kũlĩhĩle okuti Yesu oka malako evĩho palo posi. Pole, ovo va yonguile oku kũlĩha otembo yaco. Kotembo yipi Yesu a keya oco a linge Osoma?

Yesu wa kũlĩhĩle okuti eci eye a tiuka, olondonge viaye palo posi ka vi komola vali lovaso. Momo, eye wa laikele oku tiukila kilu. Noke Yesu wa va sapuila ovina vimue vika pita palo posi, eci eye aka viala Ndosoma kilu. Ovina viaco hẽ vipi?

Yesu wa popia hati, kuka kala ovoyaki, ovovei, onjala lungangala kuenda ovilemawe. Eye wa popiavo okuti, olondaka viwa viusoma vi kundiwila koluali luosi. Anga hẽ ovina evi via tukuiwa ndeti vi kasi loku tẽlisiwa koloneke vilo? Oco vi kasi. Tu kuete ekolelo liokuti, Yesu okasi loku viala ale kilu. Ndopo muẽle, eye oka malako evĩho liosi kulo kilu lieve.

Mateo 21:46; 23:1-39; 24:1-14; Marko 13:3-10.



Apulilo

  • Vociluvialuvia eci Yesu yupi? Kuenda velie va kasi ndeti ponele yaye?
  • Vonembele asongui va yonguile oku linga nye ku Yesu? Kuenda nye Yesu a va sapuila?
  • Nye ovapostolo va pulisa Yesu?
  • Momo lie Yesu a sapuila kolondonge viaye ovina vimue vika pita kilu lieve eci eye aka viala Ndosoma?
  • Nye Yesu a popia okuti cika pita osimbu handi eye ka mãlele ungangala kilu lieve?

Apulilo akuavo

  • Tanga Mateo 23:1-39.

    Ovisonehua ka vi pisa oku li tukula olonduko viesumbilo. Pole olondaka via Yesu kelivulu lia Mateo 23:8-11 vi lekisa nye catiamẽla koku tukula olonduko vioku likemãlisa vekongelo Liakristão? (Ovil. 26:25; Va Rom. 13:7; 1 Pet. 2:13, 14)

    Nye va Fariseo va seteka oku linga oco va tateke omanu oku linga Akristão? Kuenda asongui vatavo va siata oku setukula ndati atutu aco koloneke vilo? (Mat. 23:13; Luka 11:52; Yoa. 9:22; 12:42; 1 Va Tes. 2:16)

  • Tanga Mateo 24:1-14.

    Elivulu lia Mateo 24:13 li lekisa ndati esilivilo lioku pandikisa?

    Ondaka “toke kesulilo” yi sangiwa kelivulu lia Mateo 24:13 yi lomboloka nye? (Mat. 16:27; Va Rom. 14:10-12; 2 Va Kor. 5:10)

  • Tanga Marko 13:3-10.

    Elivulu lia Marko 13:10 li lekisa ndati esilivilo lioku kunda lonjanga olondaka viwa? Kuenda tua kongeliwa ndati volondaka via Yesu? (Va Rom. 13:11, 12; 1 Va Kor. 7:29-31; 2 Tim. 4:2)