Skip to content

Skip to table of contents

Olombangi Via Yehova

Select language Umbundu

Esapulo 92: Yesu wa Pindula Ava va Fa

Esapulo 92: Yesu wa Pindula Ava va Fa

KAFEKO o lete ndeti okuete ekũi lavavali kanyamo. Yesu okasi loku kuata peka liaye, isiaye la inaye va kasi ocipepi laye. Wa kũlĩha esunga lieci olonjali viaye via sanjukila? Tu ci konomuisi.

Yesu wa pindula omõla ufeko a Yairo

Isia ya kafeko u, wa kemãlele calua. Onduko yaye Yairo. Eteke limue omõlavo ukãi wa kala oku vela. Kuenje oku vela kuaco, kueya oku piãla. Yairo lukãi waye va yokokele calua, momo va limbuka okuti omõlavo o fa. Omõlaco eye lika va kuatele. Omo liaco, Yairo wa enda oku sandiliya Yesu. Eye wa yevele okuti Yesu wa kala oku linga ovikomo.

Eci Yairo a sanga Yesu, kua kala owiñi walua wo ñuala. Pole Yairo wa iñila vokati kowiñi noke wa petamẽla kolomahi via Yesu. Eye wa popia hati: ‘Omõlange ovela calua.’ Yairo wa pinga ku Yesu oco a ende oku sakula omõlaye. Kuenje Yesu wa tava.

Osimbu va kala loku endela kumosi, owiñi wa kala loku u kuama. Noke Yesu wa talama. Eye wa pula hati: ‘Helie wandamba?’ Yesu wa limbuka okuti unene wo tunda. Eye wa kũlĩhĩle okuti omunu umue wo lamba. Helie wa kala omunu waco? Omunu waco ukãi umue wa kala loku vela eci ci soka ekũi kanyamo lanyamo avali. Eye wamẽla ocipepi kuenda wa lamba kuwalo wa Yesu, kuenje wa kaya.

Eci ca kolisa calua Yairo. Momo eye wa limbuka okuti oku sakula omunu ka ca kaile ocina cimue ca tĩla ku Yesu. Noke kueya umue wa tunda konjo ya Yairo. Eye wa popia hati: ‘Kuka sakalaise vali Yesu. Omõlove wa fa.’ Yesu wa ci yeva kuenje wa sapuila Yairo hati: ‘Kuka kuate ohele omõlove o ka sakuiwa.’

Noke eci ovo va pitĩla konjo ya Yairo omanu va kala loku lila calua. Yesu wa popia hati: ‘Ko ka lili vali. Momo omõla ka file. Wa pekela ño otulo.’ Omanu vo yola epembe, momo ovo va kũlĩhĩle okuti omõla wa fa.

Noke Yesu wa vilikiya olonjali via kafeko kuenda olondonge viaye vitatu, kuenje va enda vohondo mua kala kafeko. Yesu wo kuata peka liaye kuenje wa popia hati: ‘Pasuka!’ Kafeko wa pinduka, ndomo o ci lete vociluvialuvia eci. Eye wa votoka kuenje wa fetika okuenda. Eli olio esunga lieci inaye la isiaye va sanjukila calua.

Kafeko u, hamunuko watete Yesu a pindula. Embimbiliya lilombolola okuti omunu watete Yesu a pindula wa kala omõla wocimbumba vimbo lio Naini. Noke Yesu wa pindula Lasaru, manji ya Maria la Marta. Eci Yesu aka viala vusoma wa Suku, eye oka pindula omanu valua va fa. Ka tu sanjukila hẽ elavoko liaco?

Luka 8:40-56; 7:11-17; Yoano 11:17-44.



Apulilo

  • Vociluvialuvia eci helie Isia ya kafeko? Kuenda momo lie eye lukãi waye va sumuĩla?
  • Nye Yairo a linga eci a sanga Yesu?
  • Nye ca pita eci Yesu a kala oku enda konjo ya Yairo? Kuenda esapulo lipi Yairo a tambula vonjila?
  • Momo lie Yesu vo yolela epembe konjo ya Yairo?
  • Nye Yesu a linga eci a vilikiyila ovapostolo vatatu kuenda olonjali via kafeko vohondo?
  • Yesu wa pindula vali elie? Kuenda eci ci tu lekisa nye?

Apulilo akuavo

  • Tanga Luka 8:40-56.

    Yesu wa lekisa ndati ohenda lesunguluko kukãi wa kala oku pita osonde? Kuenda nye akulu vekongelo koloneke vilo va lilongisilako? (Luka 8:43, 44, 47, 48; Ovis. 15:25-27; Mat. 9:12, 13; Va Kol. 3:12-14)

  • Tanga Luka 7:11-17.

    Ekoliso lipi vana va fisa vangandiavo va sanga vulandu wo henda Yesu a lekisa kocimbumba co ko Naini? (Luka 7:13; 2 Va Kor. 1:3, 4; Va Hev. 4:15)

  • Tanga Yoano 11:17-44.

    Yesu wa lekisa ndati okuti oku lila eci tu fisa ngandietu hacĩviko? (Yoano 11:33-36, 38; 2 Sam. 18:33; 19:1-4)