Skip to content

Skip to table of contents

Olombangi Via Yehova

Select language Umbundu

Esapulo 91: Yesu wa Longisila Komunda

Esapulo 91: Yesu wa Longisila Komunda

TALA Yesu wa tumala ndeti apa. Eye o kasi loku longisa omanu ava komunda yo Galilea. Ava va tumala ndeti ponele ya Yesu, olondonge viaye. Eye wa nõlele ekũi lavavali kalume oco va linge ovapostolo vaye. Ovapostolo, olondonge vina via nõliwile la Yesu. Ove hẽ wa kũlĩha olonduko viavo?

Yesu o kasi oku longisa

Olonduko viavo vievi: Simono wa tukuiwa Petulu, la manjaye Andereu. Kuenda Tiago, la manjaye Yoano. Upostolo ukuavo wa tukuiwavo Tiago, kuenda ukuavo Simono. Ovapostolo vavali va kuata onduko ya Yuda. Umue Yuda Isikariote, kuenda ukuavo Yuda o tukiwavo hati Tadeu. Kua kalavo Filipu la Nataneli (haeye Bartolomeu), kuenda Mateo la Tomasi.

Eci Yesu a tunda ko Samaria, wa fetika oku kunda onjanja yatete. Kuenje wa kunda hati: ‘Usoma wokilu u kasi ocipepi.’ Wa kũlĩha eci ci lomboloka usoma waco? Usoma waco u lomboloka uviali wa Suku. Yesu eye osoma yuviali waco. Eye oka viala tunde kilu kuenda oka nena ombembua palo posi. Usoma wa Suku uka pongolola ilu lieve liosi ndocumbo celau.

Yesu palo wa kala oku longisa omanu catiamẽla kusoma. Eye wa va longisavo ndomo va likutilila. Kuenje wa popia lavo hati likutilili ndoco: ‘A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu.’ Omanu valua va tukula ohutililo eyi hati, ‘A Isietu.’ O tẽla oku tukula ohutililo eyi yosi?

Yesu wa longisavo omanu ndomo va pondola oku tata vakuavo. Eye wa popia hati: ‘Ovina viosi vu yongoli okuti omanu vovi lingili haivio vu linga.’ Anga hẽ ku sanjuka eci o tatiwa ciwa lavakuene? Yesu wa popia okuti, tu sukila oku tata omanu locisola. Tuka kuata esanju lialua eci omanu vosi vaka kuata ocisola lavakuavo voluali luokaliye.

Mateo kocipama 5 toke 7; 10:1-4.



Apulilo

  • Ndomo ca lekisiwa vociluvialuvia, pi Yesu a kasi oku longisila? Kuenda velie va tumala ponele yaye?
  • Vipi via kala olonduko vio vapostolo ekũi la vavali?
  • Usoma upi Yesu a kala loku longisa?
  • Nye Yesu a longisa omanu oku pinga poku likutilila?
  • Yesu wa vanguile okuti tu sukila oku tata ndati vakuetu?

Apulilo akuavo

  • Tanga Mateo 5:1-12.

    Tu lekisa ndati okuti tua kuosuke wovina viespiritu? (Mat. 5:3; Va Rom. 10:13-15; 1 Tim. 4:13, 15, 16)

  • Tanga Mateo 5:21-26.

    Elivulu lia Mateo 5:23, 24 li lekisa ndati okuti ukamba tu kuetele vamanjetu u pondola oku sanjuisa ale oku sumuisa Yehova? (Mat. 6:14, 15; Osa. 133:1; Va Kol. 3:13; 1 Yoa. 4:20)

  • Tanga Mateo 6:1-8.

    Ovituwa vipi ka via sungulukile Akristão va kuete oku yuvula? (Luka 18:11, 12; 1 Va Kor. 4:6, 7; 2 Va Kor. 9:7

  • Tanga Mateo 6:25-34.

    Nye Yesu a longisa ci lekisa okuti tu sukila oku kolela ku Yehova catiamẽla keteku lietu? (Etu. 16:4; Osa. 37:25; Va Fil. 4:6)

  • Tanga Mateo 7:1-11.

    Ulandu wa sonehiwa velivulu lia Mateo 7:5 u tu longisa nye? (Olosap. 26:12; Va Rom. 2:1; 14:10; Tia. 4:11, 12)