Skip to content

Skip to table of contents

Olombangi Via Yehova

Select language Umbundu

Esapulo 89: Yesu wa Yelisa Vonembele

Esapulo 89: Yesu wa Yelisa Vonembele

YESU palo o molẽha okuti wa tema, siti? Wa kũlĩha esunga lieci Yesu a temẽla? Momo alume ava va kasi vonembele ya Suku vakuacipululu. Ovo va kasi oku nganyalela olombongo kilu liomanu veya oku fendela Suku.

Yesu leñula olomesa violombongo

O lete olonale evi lolomeme kuenda olopomba? Alume ava va kasi oku landisila ovinyama evi vonembele. Wa kũlĩha esunga liaco? Momo va Isareli va lumbaile ovinyama kuenda olonjila ku Suku.

Ocihandeleko ca Suku ca popele hati, nda omunu wa linga ekandu, okuete oku eca ocilumba cimue ku Suku. Kuenda kua kalavo apuluvi amue okuti, va Isareli va sukilile oku eca ovilumba. Pole, pi ovo vopopa olonjila lovinyama oco va viece ku Suku ndocilumba?

Omanu vamue va kuata olonjila lovinyama viavo muẽle. Ovo va enda loku lumba ovinyama viaco. Pole, vamue ka va kuatele ovinyama ndaño olonjila. Vakuavo va kala ocipãla calua lo Yerusalãi. Kuenje ka va kuatele epondolo lioku nena ovinyama viavo konembele oco vi eciwe ndocilumba. Omo liaco, omanu va landaile ovinyama lolonjila via sesamẽla posamua yonembele. Pole, alume ava va kisikaile olombongo vialua komanu. Ovo va nyanaile omanu. Ka ca sungulukile oku landisila pocitumãlo conembele ya Suku.

Eli olio esunga lieci Yesu a temẽlele calua. Eye wa leñula olomesa vialume kuenda wa pesela olombongo viavo posi. Yesu wa iña osikote yolonjita, kuenje wa va tundisamo vonembele kumue lovinyama viavo. Oco wa popia lalume va landisa olopomba hati: ‘Ovina evi tundi lavio! Onjo ya Tate ko ka yi lingisi ocitanda.’

Olondonge viaye via kala laye vonembele, ko Yerusalãi. Ovo va komõha eci Yesu a linga. Noke va ivaluka eci Embimbiliya lia popele catiamẽla Komõla a Suku hati: ‘Ocisola ñuetele onjo ya Suku ci taima ndondalu.’

Osimbu eye a kala ko Yerusalãi kocipito co Paskoa, wa linga ovikomo vialua. Noke wa tunda vo Yudea wa tiukila ko Galilea. Pole, vonjila wa pita kofeka yo Samaria. Tu konomuisi eci ca pitako.

Yoano 2:13-25; 4:3, 4.



Apulilo

  • Momo lie ovinyama vi kasilili oku landisiwila vonembele?
  • Nye ca temisa Yesu?
  • Ndomo o cilete vociluvialuvia nye Yesu a kasi oku linga? Kuenda nye a tuma oku linga kalume va kala oku landisa olopomba?
  • Eci olondonge viaye via mola eci Yesu a kala oku linga nye va ivaluka?
  • Yesu wa pita volupale lupi eci a kala oku tiukila ko Galilea?

Epulilo likuavo

  • Tanga Yoano 2:13-25.

    Omo okuti Yesu wa temẽle la vakuakutolokala olombongo vonembele ocituwa cipi tu sukila oku kuata catiamẽla koku vanguila olomĩlu Vonjango Yusoma? (Yoa. 2:15, 16; 1 Va Kor. 10:24, 31-33)