Skip to content

Skip to table of contents

Olombangi Via Yehova

Select language Umbundu

Esapulo 88: Yoano wa Papatisa Yesu

Esapulo 88: Yoano wa Papatisa Yesu

OLETE o pomba yi kasi oku lokila ndeti kutue ulume u? Ulume u Yesu. Eye o kuete ale akũi atatu kanyamo. Ulume a kasi laye ndeti Yoano. Tua lilongisa ale eci catiamẽla kokuaye. Ivaluka eci Maria aka pasuisile ngadiaye Elisavete yu oñaña ya kala vimo liaye ya yolela? Oñaña yaco Yoano. Otembo yaco ka citiwile. Cilo Yoano la Yesu va kasi oku linga nye?

Epapatiso lia Yesu

Yoano wa mala oku yuvika Yesu vovava, Volui Yordão. Eyi oyo onjila yiwa yoku papatisa omunu. Tete, omunu o yuvikiwa vovava noke upiwamo. Omo okuti eci oco Yoano a lingainga, eye vo tukula hati: Yoano Upapatisi. Momo lie eye a papatisila Yesu?

Yoano wa ci linga omo okuti Yesu weyile kokuaye oku pinga oco o papatise. Yoano wa enda oku papatisa omanu va lekisa okuti va likekembela ovina vĩvi va lingaile. Anga hẽ, Yesu wa lingile cimue cĩvi okuti o li kekembela? Sio, Yesu kala linga lacimue cĩvi, omo eye omõla a Suku. Eci eye a pingila ku Yoano oco o papatise cimue ciñi. Tu konomuisi esunga liaco.

Osimbu handi Yesu ka endele ku Yoano oco o papatise, eye wa kala karpinteiro. Karpinteiro omunu o linga ovina viavaya ndeci olomesa, olomangu, lovialo. Yosefe ulume wa Maria wa kala karpinteiro. Kuenje wa longisakoYesu umesele waco. Pole, Yehova ka tumile Omõlaye palo posi oco a kale karpinteiro. Yehova wa yonguile okuti Yesu o linga upange umue wa velapo. Kuenje oco a lekise okuti weyilila oku linga ocipango ca Isiaye, eye wa pinga ku Yoano oco o papatise. Anga hẽ eci ca sanjuisa Suku?

Co sanjuisa, omo eci Yesu a tunda vovava, kilu kua tunda ondaka ya popia hati: ‘U eye Omõlange, ndo sanjukila.’ Kuenda ilu lia yuluka kuenje kua tunda cimue ci kasi ndopomba ya lokila kutue wa Yesu. Oyo ka ya kaile muẽle opomba yocili. Ca kala ño ocindekaise. Oyo ya kala espiritu sandu lia Suku.

Yesu wa kuata ovina vialua vioku sokolola. Omo liaco, wa kala ulika akũi akuãla koloneke. Satana oko o sanga. Eye wa seteka Yesu olonjanja vitatu oco a lueye ocihandeleko ca Suku. Pole, Yesu ka ci lingile.

Eci Yesu a tiukila, wa sanga alume vamue, veya oku kala olondonge viaye viatete. Olonduko viavo: Andereu, Petulu (o tukuiwavo okuti Simono), Filipu kuenda Nataneli (wa tukuiwavo okuti Bartolomeu). Yesu lolondonge viaye va enda ko Galilea. Eci va pitilako, va talama vimbo lia Nataneli, vo Kana. Yesu wa enda kocipito cimue cuvala oku eye a lingila ocikomo caye catete. Wa kũlĩha eci eye a linga? Eye wa pongolola ovava yu a linga ovinyu.

Mateo 3:13-17; 4:1-11; 13:55; Marko 6:3; Yoano 1:29-51; 2:1-12.



Apulilo

  • Alume ava vavali vociluvialuvia eci velie?
  • Omunu o papatisiwa ndati?
  • Omanu vapi Yoano a enda oku papatisa?
  • Nye Yesu a pingila ku Yoano oku u papatisa?
  • Suku wa lekisa ndati okuti wa sanjukile eci Yesu a papatisiwa?
  • Nye ca pita la Yesu eci a kala ulika vekalasoko akũi akuãla koloneke?
  • Velie va kala olondonge viatete via Yesu? Kuenda cipi ca kala ocikomo caye catete?

Apulilo akuavo

  • Tanga Mateo 3:13-17.

    Olonumbi vipi Yesu a sia kolondonge viaye viatiamẽla kepapatiso? (Osa. 40:7, 8; Mat. 28:19, 20; Luka 3:21, 22)

  • Tanga Mateo 4:1-11.

    Oku loñoloha kua Yesu koku tukula Ovisonehua ku tu vetiya ndati oku tanga Embimbiliya olonjanja viosi? (Mat. 4:5-7; 2 Pet. 3:17, 18; 1 Yoa. 4:1)

  • Tanga Yoano 1:29-51.

    Yoano Upapatisi wa vetiyilile olondonge viaye kulie? Kuenda koloneke vilo, tu kuama ndati ongangu yaye? (Yoa. 1:29, 35, 36; 3:30; Mat. 23:10)

  • Tanga Yoano 2:1-12.

    Ocikomo catete ca Yesu ca lekisa ndati okuti Yehova ka limĩla lacimue ciwa kafendeli vaye? (Yoa. 2:9, 10; Osa. 84:11; Tia. 1:17)