Skip to content

Skip to table of contents

Olombangi Via Yehova

Select language Umbundu

Esapulo 97: Yesu wa Iñila vo Yerusalãi Ndosoma

Esapulo 97: Yesu wa Iñila vo Yerusalãi Ndosoma

NOKE lioku sakula olomeke vivali, Yesu wa iñila vimbo limue ocipepi lo Yerusalãi. Eye wa vangula lolondonge viaye vivali hati: ‘Kuendi kimbo li kasi kovaso yene, eci vu pitĩla vu sanga ocimbulu. Ci kutululi ci neni kokuange.’

Eci va ci nena, Yesu wa endela kocimbulu caco, okacinãla kamue toke vo Yerusalãi. Eci a pitĩla vo lupale, owiñi wakahandangala weya kokuaye oku u lama. Omanu valua va yala olonanga viavo vetapalo. Vakuavo va teta ovisapa vioviti weva. Ovisapa viaco va vi yala vetapalo loku vilikiya vati: ‘Suku a sumũlũise soma iyilila vonduko ya Yehova!’

Omanu va yolela Yesu

Kosimbu, olosoma vio ko Isareli via enda oku endela kocimbulu oku lilekisa komanu. Eci oco Yesu a linga. Omanu va yonguile okuti Yesu o kala soma yavo. Pole, havosiko va ci yonguile. Tu ci limbukila eci Yesu a kala loku enda konembele.

Konembele, Yesu wa sakula olomeke kuenda ovilema. Eci omãla vatito va mola ovikomo viaco va fetika oku sivaya Yesu. Pole, eci ca temisa ovitunda. Noke va vangula la Yesu hati: ‘O yevite eci omãla va kasi loku popia?

Yesu wa va kumbulula hati: ‘Ndi ci yevite. Ka wa la tangi olondaka evi viokuti: Kovimẽla viomãla ku tunda esivayo liocili?’ Omãla vamamako oku sivaya osoma ya Suku.

Etu tu yongola oku setukula ongangu yomãla ava. Omanu vamue vaka seteka oku tu tateka oku kunda eci catiamẽla Kusoma wa Suku. Pole tu kamamako oku sapula ovina viwa Yesu aka lingila omanu.

Eci Yesu a kala palo posi, otembo yaye yoku viala handi ka ya pitĩlilepo. Eteke lipi eye aka fetika oku viala? Olondonge via Yesu via yonguile oku kũlĩha eteke liaco. Tuka ci lilongisa noke.

Mateo 21:1-17; Yoano 12:12-16.



Apulilo

  • Eci Yesu a pitĩla volupale lumue ocipepi lo Yerusalãi nye a tuma kolondonge viaye oku linga?
  • Ndomo ca lekisiwa vociluvialuvia nye ca pita eci Yesu a iñila vo lupale ocipepi lo Yerusalãi?
  • Nye omãla va linga eci va mola Yesu oku kayisa omanu va kala olomeke kuenda ovilema?
  • Nye Yesu a tambulula kovitunda viatemele?
  • Tu setukula ndati omãla va kala oku sivaya Yesu?
  • Nye olondonge via yonguile oku kũlĩha?

Apulilo akuavo

  • Tanga Mateo 21:1-17.

    Oku iñila kua Yesu vo Yerusalãi Ndosoma kua litepele ndati calua lava kesongo kovota kotembo ya va Roma? (Mat. 21:4, 5; Sak. 9:9; Va Fil. 2:5-8; Va Kol. 2:15)

    Nye amalẽhe va lilongisila komãla va Isareli va tukuiwa Kosamo 118 eci Yesu a kala oku iñila vonembele? (Mat. 21:9, 15; Osa. 118:25, 26; 2 Tim. 3:15; 2 Pet. 3:18)

  • Tanga Yoano 12:12-16.

    Ovianja viuti weva peka liomanu va kala loku yolela Yesu vi lomboloka nye? (Yoa. 12:13; Va Fil. 2:10; Esit. 7:9, 10)