Skip to content

Skip to table of contents

Olombangi Via Yehova

Select language Umbundu

Esapulo 71: Suku wa Likuminya Oluali Luokaliye

Esapulo 71: Suku wa Likuminya Oluali Luokaliye

OCILUVIALUVIA eci, oco ofeka yelau yina Suku a lekisile kuprofeto Isaya. Isaya wa kala uprofeto noke lioku fa kua Yona.

Omanu Voluali Luokaliye

Ofeka yelau, yi lomboloka ‘ocitumãlo cimue ceposo.’ Anga hẽ ociluvialuvia eci ka ci ku ivaluisa ocina cimue tua lilongisa ale velivulu lilo? Ocitumãlo eci ca lisetahãla locumbo cina Yehova a pongiyilile Adama la Heva. Anga hẽ eteke limue oluali luosi lu ka kala muẽle ocumb o celau?

Yehova wa sapuila uprofeto waye Isaya oco a sonehe eci catiamẽla koluali luokaliye a likuminya komanu vaye. Eye wa popia hati: ‘Ombinji yi tunga pamuamue lomõla omeme. Onãle leyove liohosi vi endela pamuamue kuenje okamõla ka vi songuila. Omõla o papalela keleva lionyõha.’

Pamue ove o pondola oku popia hati, ‘ocina eci la limue eteke ci ka tẽlisiwa. Voluali muli enene ovitangi kuenda ovitangi viaco, vika amamako.’ Pole, sokolola handi ndoco: Adama la Heva, Suku wa va kapele voluali lumue lu kasi ndati?

Suku wa va kapele vocumbo cimue ceposo. Omo lioku sinila ocihandeleko ca Suku, ovo va pumba ocitumãlo cavo. Va fetika oku kuka kuenje va fa. Suku wa likuminya oku eca komanu vana va pokola kokuaye ovina viosi Adama la Heva va pumba.

Voluali luokaliye lu laika oku iya, lacimue ci ka nyõliwa vali. Voluali luaco, mu ka kala lika ombembua. Omanu vosi vaka kuata uhayele kuenda esanju. Ovina viosi vika kala ndeci Yehova a yonguile kefetikilo. Kaliye tu sukila oku lilongisa ndomo Yehova aka nena ovina viaco.

Isaya 11:6-9; Esituluilo 21:3, 4.



Apulilo

  • Helie wa kala Isaya? Eye wa kala komuenyo kotembo yipi? Kuenda nye Yehova o lekisile?
  • Ondaka “oluali luokaliye” yi lomboloka nye? Kuenda yi tu ivaluisa nye?
  • Nye Yehova a tumila Isaya oku soneha eci catiamẽla Koluali luokaliye?
  • Momo lie Adama la Heva va pumbila ocitumãlo cavo?
  • Yehova wa likuminya nye ku vana va pokola kokuaye?

Apulilo akuavo

  • Tanga Isaya 11:6-9.

    Embimbiliya li lekisa ndati ombembua yika kala pokati kovinyama lomanu voluali luokaliye? (Osa. 148:10, 13; Isa. 65:25; Esek. 34:25)

    Olondaka via Isaya vi kasi oku tẽlisiwa ndati konepa yespiritu pokati komanu va Yehova koloneke vilo? (Va Rom. 12:2; Va Efe. 4:23, 24)

    Helie o kuete unene woku pongolola ovituwa viomanu ci kale cilo ale kovaso voluali luokaliye? (Isa. 48:17, 18; Va Gal. 5:22, 23; Va Fil. 4:7)

  • Tanga Esituluilo 21:3, 4.

    Momo lie ovisonehua oku lekisa okuti Suku oka kala pokati komanu ka ci lombolokela okuti oka tunga lavo palo posi? (Ovis. 26:11, 12; 2 Asa. 6:18; Isa. 66:1; Esit. 21:2, 3, 22-24)

    Momo lie kaku ka kalela asuelela loku liyula? (Luka 8:49-52; Va Rom. 8:21, 22; Esit. 21:4)