Skip to content

Skip to table of contents

Olombangi Via Yehova

Select language Umbundu

Esapulo 70: Yona Kuenda Ocimuandu

Esapulo 70: Yona Kuenda Ocimuandu

TALA ulume u o kasi ndeti vovava. Eye o kasi lovitangi viocili. Ombisi eyi yi yongola oku wina! Ove hẽ wa kũlĩha ulume waco? Onduko yaye Yona. Tu konomuisi esunga lieci eye a kuatela ovitangi.

Yona wa kala uprofeto wa Yehova, noke lioku fa kuprofeto Elisia. Kuenje Yehova wa sapuila Yona hati: ‘Kuende kimbo linene lia Ninivei. Evĩho liomanu vaco lialua enene. Ka va sapuile evĩho liavo.’

Yona kuenda ocimuandu

Yona ka pokuile ku Yehova kuenje wa enda lonjila yikuavo. Yehova weya oku tema calua la Yona. Omo liaco, wa nena ehunguhungu liofela yalua vokalunga. Kuenje onaviyu ya fetika oku enda lovitangi. Noke vakuanaviyu va fetika oku kuata usumba kuenje va fetika oku pinga ekuatiso kolosuku viavo.

Yona wa va sapuila hati: ‘Ame nda siata oku fendela Yehova, Suku una wa lulika ilu losi. Sia lingile ovina Yehova a ndi sapuila.’ Vakuanaviyu vo pula hati: ‘Nye tu linga love oco okalunga ka tulumũhe?’

Yona wa kumbulula hati: ‘Njeluli. Njimbi vokalunga oco okalunga ka tulumũha.’ Vakuanaviyu ka va tavele oku ci linga. Pole eci ehungungu lia livokiya, va kuata Yona kuenje vo wimba vokalunga. Noke ehunguhungu lia imũha kuenje okalunga ka tulumũha.

Eci Yona a vomba kosi yovava, ombisi yimue yinene yeya kuenje yo wina. Pole eye ka file. Yona wa kala vimo liombisi yaco ci soka ovotanya atatu lovoteke atatu. Eye wa livela calua momo ka pokuile ku Yehova oco a ende ko Ninivei. Nye ceya oku pita laye?

Yona wa likutilila ku Yehova oku pinga ekuatiso. Kuenje, Yehova wa lingisa okuti ombisi yaco yu sanjela kongongo. Eci a tunda vimo liombisi, Yona haico a enda ko Ninivei. Ulandu owu u tu longisa okuti tu sukila oku linga ovina viosi Yehova a tu sapuila.

Vembimbiliya kelivulu lia Yona.



Apulilo

  • Helie wa kala Yona? Kuenda nye Yehova o tumile oku linga?
  • Omo okuti Yona ka yonguile oku enda oku Yehova o tumile nye eye a linga?
  • Nye Yona a tumile vakuanaviyu oku linga oco ehunguhungu li tulumũhe?
  • Ndomo o cilete vociluvialuvia, nye ca pita la Yona eci a imbiwa vovava?
  • Yona wa kala vimo liombisi oloneke viñami? Kuenda nye eye a linga otembo a kalamo?
  • Pi Yona a enda eci a tunda vimo liombisi? Kuenda eci ci tu longisa nye?

Apulilo akuavo

  • Tanga Yona 1:1-17.

    Yona wa li yeva ndati eci a tambula ocikele coku ka kundila va Ninivei? (Yona 1:2, 3; Olosap. 3:7; Uku. 8:12)

  • Tanga Yona 2:1, 2, 10.

    Ulandu wa Yona wu tu ĩha ekolelo lie okuti Yehova oka tambulula olohutililo vietu? (Osa. 22:24; 34:6; 1 Yoa. 5:14)

  • Tanga Yona 3:1-10.

    Oku kũlĩha okuti Yehova wamamako oku eca ovikele ku Yona ndaño okuti kefetikilo wa tilile ci tu kolisa ndati? (Osa. 103:14; 1 Pet. 5:10)

    Nye tu lilongisila kulandu wa Yona kueci catiamẽla koku sepula ale oku kuata ovisimĩlo ka via sungulukile lomanu vocikanjo cetu? (Yona 3:6-9; Uku. 11:6; Ovil. 13:48)