Skip to content

Skip to table of contents

Olombangi Via Yehova

Select language Umbundu

Esapulo 65: Uviali wa Tepiwa

Esapulo 65: Uviali wa Tepiwa

OVE hẽ wa kũlĩha esunga lieci ulume u a kasilili ndeti oku tola uwalo waye? Yehova eye wa tuma oku ci linga. Ulume u onduko yaye Ahiya kuenda wa kala uprofeto wa Suku. Anga hẽ ove wa kũlĩha eci ci lomboloka uprofeto? Uprofeto omunu umue Suku a sapuila ovina vika lingiwa kovaso yoloneke.

Ahiya la Yerevoama

Ahiya o kasi oku vangula la Yerevoama. Yerevoama wa kala ulume umue Salomone a kapele ndamitavaso yovopange oku tunga olonjo viaye. Eci Ahiya a lisanga la Yerevoama vonjila, wa linga ocina cimue ci komohĩsa. Eye wa tola uwalo waye wokaliye vovitetele vi soka ekũi la vivali. Noke wa sapuila Yerevoama hati: ‘Tambula ovitetele ekũi, vi linge viove.’ Ove hẽ wa kũlĩha esunga lieci Ahiya a ecela ku Yerovoama ovitetele viaco?

Ahiya wa lombolola okuti Yehova upa uviali ku Salomone okuti ka kala vali osoma. Wa lombololavo okuti uviali waco weciwa kapata ekũi a Yerevoama. Eci ci lomboloka okuti Rehovama omõla a Salomone o siala lika lapata avali. Apata aco ovo lika eye a pondola oku viala.

Eci Salomone a yeva olondaka Ahiya a sapuila Yerevoama, weya oku tema calua. Eye wa seteka oku ponda Yerevoama. Pole Yerevoama wa tilila Kegito. Eci papita otembo yimue, Salomone wa fa. Eye wa viala eci ci soka akũi a kuãla kanyamo. Noke omõlaye Rehovama wa piñala komangu yaye. Eci Yerevoama a yeva okuti Salomone wa fa, wa tiukila vali ko Isareli.

Rehovama ka kaile osoma yiwa. Eye wa kangisa calua omanu okuti isiaye Salomone ci sule. Noke Yerevoama kuenda alume vakuavo va kemãla vofeka, veya ku Rehovama. Ovo vo pinga oco a tate ciwa omanu. Rehovama ka yevele kondaka yavo. Handi vali, wa vokiyako ungangala waye okuti wa tete u sule. Noke omanu va vialeka Yerevoama komangu yusoma wapata ekũi. Pole apata avali a Benjamini la Yuda, va kala handi kuviali wa Rehovama.

Yerevoama ka yonguile okuti omanu vaye va enda konembele ko Yerusalãi oku ka fendela Yehova. Omo liaco, wa tunga olonãle vivali viulu. Eye wa vetiya omanu vatiamẽla kusoma wapata ekũi oco va fendele ociñumañuma caco. Noke vofeka mueya oku yuka ungangala levĩho lialua.

Kuviali wapata avali kua kalavo ovitangi. Osimbu handi Rehovama ka tẽlisile anyamo atãlo kuviali waye, soma yo Egito wa katukila o Yerusalãi. Eye wambata ovikuata vialua vionembele ya Yehova. Vokuenda kuotembo yimue, onembele yeya oku siala nda cina ya tungiwa.

1 Olosoma 11:26-43; 12:1-33; 14:21-31.



Apulilo

  • Alume ava vavali va mõleha ndeti vociluvialuvia olonduko viavo velie? Kuenda ovo va kala nye?
  • Nye Ahiya a kasi oku linga luwalo waye? Kuenda eci ca lombolokele nye?
  • Salomone wa yonguile oku linga nye Yerevoama?
  • Momo lie omanu va nõlela Yerevoama oco a viale kapata ekũi?
  • Momo lie Yerevoama a tungila oviñumañuma vivali viulu? Kuenda nye noke ceya oku pita vofeka?
  • Nye ceya oku pita luviali wapata ekũi kuenda lonembele ya Yehova ko Yerusalãi?

Apulilo akuavo

  • Tanga 1 Olosoma 11:26-43.

    Yerevoama wa tuwile ndati? Kuenda Yehova wo likuminyile okuti nda wa pokola kolonumbi Viaye u wiha nye? (1 Olos. 11:28, 38)

  • Tanga 1 Olosoma 12:1-33.

    Ocituwa cipi cĩvi ca Rehovama olonjali lakulu vekongelo va sukila oku yuvula poku tẽlisa ovikele viavo? (1 Olos. 12:13; Uku. 7:7; 1 Pet. 5:2, 3)

    Amalẽhe va kuete oku kolela kulie poku nõla cimue vomuenyo wavo? (1 Olos. 12:6, 7; Olosap. 1:8, 9; 2 Tim. 3:16, 17; Va Hev. 13:7)

    Nye ca vetiya Yerevoama oku tunga oviñumañuma vivali vioku fendela? Kuenda eci ca lekisa ndati ekambo liekolelo ku Yehova? (1 Olos. 11:37; 12:26-28)

    Helie wa kokela apata ekũi oku siapo efendelo liocili? (1 Olos. 12:32, 33)