Skip to content

Skip to table of contents

Olombangi Via Yehova

Select language Umbundu

Esapulo 63: Soma Salomone wa Kala Ukualondunge

Esapulo 63: Soma Salomone wa Kala Ukualondunge

ECI Salomone a fetika oku viala, wa kala calua umalẽhe. Eye wa solele Yehova kuenda wa pokuile kolonumbi a tambuile ku isiaye Daviti. Yehova wa solelevo calua Salomone. Kuenje eteke limue vuteke wa vangula laye vonjoi hati: ‘A Salomone nye oyongola okuti oco ndu ku ĩha?’

Salomone wa kumbulula hati: ‘A Yehova a Suku yange, ame ndumalẽhe calua kuenda si ci tẽla handi oku viala. Nyihe olondunge vioku viala ciwa omanu vove.’

Ondaka ya Salomone ya sanjuisa calua Yehova. Omo liaco, Yehova wa popia laye hati: ‘Omo wa pinga olondunge okuti kua pingile ukuasi, ndu ku ĩha olondunge vialua. Lomue o lisoka love. Ndu ku ĩhavo eci kua pingile, okuti ovokuasi lekemãlo.’

Eci papita otembo yimue, akãi vamue vavali veya ku Salomone locitangi cimue. Umue pokati kavo wa popia hati: ‘Ame lukãi u tu kasi vonjo yimuamue. Kuenje ame nda cita omõla. Eci papita oloneke vivali, eye wa citavo omõla. Pole eteke limue luteke, omõlaye wa fa. Osimbu ame nda pekela, wopa omõlaye wa fa wo kapa ponele yange kuenje wambata omõlange. Eci nda pasuka loku vanja omõlaco wa fa, nda limbuka okuti omõlaco hawangeko.’

Noke ukãi ukuavo wa popia hati: ‘Hacoko! Omõla o kasi ndeti lomuenyo wange, u wa fa eye wove!’ Ukãi wa tete wa kumbulula hati: ‘Sio! Omõla wa fa ndeti eye wove, u o kasi lomuenyo eye wange! Akãi vaco va kala loku liyaka pokati. Nye Salomone a linga?

Salomone wa tuma oco vo nenele osipata. Eci vo nenela osipata wa popia hati: ‘Omõla waco o kasi lomuenyo, u toli pokati. Va tepeli olonele viaco.’

Ina yomõla waco o kasi lomuenyo, wa kaluka hati: ‘Hacoko. Ko ka pondi omõla. Weci ño kokuaye! Pole ukãi ukuavo wa popia hati: ‘Ka ka linge wange pamue waye. A toliwe muẽle pokati.’

Soma Salomone o tetulula ocitangi cimue ca tĩla

Noke Salomone wa popia hati: ‘Omõla ka ka pondiwe! Weci kukãi watete. Ukãi u eye onjali yomõla.’ Salomone wa kuatele ciwa elomboloko liaco momo onjali yocili ya solele calua omõlaye. Eye ka yonguile okuti o pondiwa. Eci omanu va yeva ndomo Salomone a tetulula ocitangi caco, veya oku sanjuka calua omo lioku kuata osoma yolondunge.

Vokuenda kuviali wa Salomone, Yehova wa sumũlũisile calua va Isareli. Eye wa ci linga poku sumũlũisa osi yavo okuti yima otiliku yalua, losevada, layuva, lakuyu, kuenda ovilia vikuavo. Omanu va walaile uwalo wa posoka kuenda va kala volonjo viwa. Vosi yavo va kuatele ovina viwa.

1 Olosoma 3:3-28; 4:29-34.



Apulilo

  • Nye Yehova a pulile ku Salomone? Kuenda Salomone wa tambuluile ndati?
  • Omo okuti Yehova wa sanjukilile epingilo lia Salomone nye Eye o likuminya oku ĩha?
  • Ocitangi cipi akãi vavali va nenele ku Salomone?
  • Ndomo o cilete vociluvialuvia Salomone wa potolola ndati ocitangi caco?
  • Uviali wa Salomone wa kala ndati? Kuenda momo lie?

Apulilo akuavo

  • Tanga 2 Samuele 3:3-28.

    Alume va kuete ovikele vocisoko ca Yehova nye va lilongisila kolondaka via Salomone viocikembe via sonehiwa kelivulu lia 1 Olosoma 3:7? (Osa. 119:105; Olosap. 3:5, 6)

    Ongangu yipi yiwa Salomone a tu ĩha yovina tu sukila oku pinga vohutililo? (1 Olos. 3:9, 11; Olosap. 30:8, 9; 1 Yoa. 5:14)

    Ndomo Salomone a potolola ocitangi pokati kakãi vavali ci tu ĩha ekolelo lie kueci catiamẽla kuviali wa Salomone Wavelapo Yesu Kristu? (1 Olos. 3:28; Isa. 9:6, 7; 11:2-4)

  • Tanga 1 Olosoma 4:29-34.

    Yehova wa tambulula ndati Salomone eci o pinga olondunge? (1 Olos. 4:29)

    Ndomo omanu va likolisilako oku yevelela olondunge via Salomone ocituwa cipi tu sukila oku kuata catiamẽla koku lilongisa Embimbiliya? (1 Olo. 4:29, 34; Yoa. 17:3; 2 Tim. 3:16)