Skip to content

Skip to table of contents

Olombangi Via Yehova

Select language Umbundu

Esapulo 62: Vonjo ya Daviti Mueya Ovitangi

Esapulo 62: Vonjo ya Daviti Mueya Ovitangi

ECI Daviti a fetika oku viala vo Yerusalãi, Yehova wa kuatisa olohoka viaye oku yula ovanyali vavo. Yehova wa likuminyile okuti oka eca ofeka yo Kanana ku va Isareli. Omo liaco, lekuatiso lia Yehova, va Isareli veya oku tambula olofeka viosi eye a likuminyile kokuavo.

Daviti wa kala osoma yimue yiwa. Eye wa solele Yehova. Eci eye a tambula o Yerusalãi, ocina catete a linga, oku nena ocikasia covisila vo Yerusalãi. Handi vali, wa kuatavo onjongole yoku tunga onembele ya Yehova.

Pole, eci Daviti a kuka, wa fetika oku linga ovina ka via sungulukile. Daviti wa kũlĩhile okuti, ka ca sungulukile oku tambula ocina ca mãle. Pole eteke limue kekumbi eci eye a kala kilu lionjo yaye yelombe, wa mola ukãi umue wa posoka. Onduko yaye Batisieva. Esualãli liaye Uriya, eye wa kala ulume wa Batisieva.

Daviti wa sola calua Batisieva. Kuenje wa tuma oku u vilikiya oco a ende konjo yaye yelombe. Ulume waye wa kala kuyaki. Noke Daviti wa pekela laye kuenje wemina. Daviti weya oku yokoka calua kuenje wa tuma ondaka ku Yohava kesongo kovita. Eye wo sapuila oco a kape Uriya kovaso yolohoka okuti o pondiwa. Eci Uriya a fa, Daviti wa kuela Batisieva.

Yehova wa temẽle calua la Daviti. Kuenje wa tuma uprofeto waye Natana kokuaye oco o sapuile ekandu liaye. Kũlĩhisa ndomo Natana a kasi oku sapela la Daviti. Daviti wa livela calua omo lielinga liaye lĩvi kuenje Yehova ko yambuilile kolofa. Pole Yehova wo sapuila hati: ‘Omo liovina viaco vĩvi wa linga, vonjo yove mu ka kala ovitangi vialua.’ Ocili okuti, Daviti weya oku kuata muẽle ovitangi vialua.

Natana o lungula Daviti

Catete ceci okuti, omõla a Batisieva ulume wa fa. Noke Aminone omõla watete wa Daviti, wa kuata manjaye Tamar longusu kuenje wa lipekela laye. Avisalome omõla ukuavo a Daviti wa suvukile elinga liaco kuenje wa ponda Aminone. Vokuenda kuotembo Avisalome weya oku soliwa calua lomanu kuenje wa li lingisa osoma. Noke Daviti weya oku yula uyaki la Avisalome kuenje Avisalome wa pondiwa. Ocili okuti, Daviti wa kuatele ovitangi vialua.

Ndaño lovitangi viaco, Batisieva weya oku cita omõla ulume. Onduko yaye Salomone. Eci Daviti a kala loku vela, omõlaye Adoniya wa seteka oku li lingisa osoma. Kotembo yaco Daviti wa tuma oku vilikiya Sadoke ocitunda. Eye wo sapuila oco a waveke ulela kutue wa Salomone okuti o linga osoma. Noke Daviti weya oku fa leci ci soka akũi epanduvali kanyamo. Eye wa vialele eci ci soka akũi akuãla kanyamo. Kuenje Salomone wa linga osoma ya va Isareli.

2 Samuele 11:1-27; 12:1-18; 1 Olosoma 1:1-48.



Apulilo

  • Lekuatiso lia Yehova nye ceya oku pita noke lofeka yo Kanana?
  • Nye ca pitile koñolosi yimue eci Daviti a kala kilu lionjo yaye?
  • Momo lie Yehova a temẽlele calua la Daviti?
  • Ndomo o cilete vociluvialuvia, helie Yehova a tumile oku vangula la Daviti catiamẽla kakandu aye? Kuenda nye ulume waco a sapuilile Daviti okuti oco ca pita laye?
  • Daviti weya oku kuata ovitangi vipi?
  • Noke ya Daviti helie weya oku linga osoma ya va Isareli?

Apulilo akuavo

  • Tanga 2 Samuele 11:1-27.

    Oku litumbika kupange wa Yehova ci tu teyuila ndati?

    Nye ca vetiya Daviti oku linga ekandu? Kuenda eci ceca elungulo lie komanu va Yehova koloneke vilo? (2 Sam. 11:2; Mat. 5:27-29; 1 Va Kor. 10:12; Tia. 1:14, 15)

  • Tanga 2 Samuele 12:1-18.

    Nye akulu vekongelo lolonjali va lilongisila kongangu ya Natana ndomo a eca elungulo ku Daviti? (2 Sam. 12:1-4; Olosap. 12:18; Mat. 13:34)

    Yehova wa lekisa ndati ohenda ku Daviti? (2 Sam. 12:13; Osa. 32:5; 2 Va Kor. 7:9, 10)