Skip to content

Skip to table of contents

Olombangi Via Yehova

Select language Umbundu

Esapulo 60: Avigaile Kuenda Daviti

Esapulo 60: Avigaile Kuenda Daviti

OVE hẽ o lete ukãi wa posoka ndeti o kasi loku iya ku Daviti? Onduko yaye Avigaile. Eye wa kuatele olondunge viocili kuenda wa teyuila Daviti koku linga eci cĩvi. Pole, osimbu handi ka tua lilongisile ulandu waco, tu kũlĩhisi eci ca pitile la Daviti.

Eci Daviti a tila ku Saulu, wa salamẽle keleva. Noke va manjaye kuenda epata liaye va likongela kumosi laye. Cimue ci soka ovita vikuãla kalume, veyavo kokuaye kuenje eye wa linga usongui wavo. Daviti wa popia la soma ya va Moavi hati: ‘Ecelela okuti tate yange la mãi va kala kumue love toke eci ndi kũlĩha ovina vi pita lame.’ Noke Daviti lalume vaye va tilila kolomunda.

Vepuluvi liaco oco Daviti a liñualehela la Avigaile. Ulume waye Nabala wa kala ohuasi. Eye wa kuatele eci ci soka olohulukãi vitatu kolomeme kuenda ohulukãi yolohombo. Nabala wa kala ondingaĩvi. Ukãi waye Avigaile, wa finile calua. Eye wa kũlĩhilevo ndomo a pondola oku linga eci ciwa. Handi vali weya oku popela epata liaye. Tu kũlĩhisi ndomo ca pita.

Daviti wa lingile ovina viwa ku Nabala. Daviti lalume vaye, va kuatisile koku teyuila olomeme via Nabala. Eteke limue Daviti wa tuma alume vaye ku Nabala oku pinga ekuatiso. Alume vaco va pitila ku Nabala. Kuenje va sanga okuti eye kumue lakuenje vaye va kala loku pemula olomeme. Eteke liaco lia kala eteke liocipito cimue kuenje Nabala wa kala lokulia kualua. Alume va Daviti va sapuila Nabala ovina Daviti a va tuma hati: ‘Tua ku lingila ovina viwa. Ka tua lanyana olomeme viove, pole tua ku kuatisa oku vi lava. Cilo tu ĩheko okulia.’

Nabala wa kumbulula hati: ‘Ame si eci okulia kuange kokuaye.’ Noke wa popia ovina vialua vĩvi viatiamẽla ku Daviti. Eci alume va tiukila, va sapuila Daviti ovina viosi Nabala a popia. Ovina viaco via temisa calua Daviti. Kuenje wa sapuila akuenje vaye hati: ‘Ambati olosipata viene. Kuenje va katuka oku ka ponda Nabala lakuenje vaye.

Umue pokati kalume va Nabala wa yevelela eci Nabala a kala loku popia. Kuenje wa sapuila Avigaile ovina viaco. Omo liaco, Avigaile wa pongiya okulia kuenje wambata ovimbulu viaye, wa enda toke ku Daviti. Eci a pitila ku Daviti wa popia laye hati: ‘Acime cange, ku ka yevelele kolondaka viulume wange Nabala. Ulume wange eveke kuenda ovilinga viaye viosi viuveke. Nda nena ombanjaile eyi kokuove. Yi tambula. Ecela ovina viosi tua ku lingila.’

Avigale eca okuli ku Daviti

Daviti wa kumbulula Avigaile hati: ‘Ove o kuete olondunge viocili. Momo wa niula kongole yoku pesela osonde ya Nabala oku fetuluinya ovilinga viaye vĩvi. Kaliye kuende lombembua.’ Noke eci Nabala a fa, Avigaile wa linga ukãi wa Daviti.

1 Samuele 22:1-4; 25:1-43.



Apulilo

  • Ukãi u vociluvialuvia o kasi oku ñualehela ndeti la Daviti helie? Kuenda eye wa tuwile ndati?
  • Helie wa kala Nabala?
  • Momo lie Daviti a tumĩlile alume vamue ku Nabala?
  • Nye Nabala a sapuilile alume va Daviti? Kuenda Daviti wo tambulula ndati?
  • Avigaile wa lekisa ndati okuti eye wa kala ukãi umue ukualondunge?

Apulilo akuavo

  • Tanga 1 Samuele 22:1-4.

    Epata lia Daviti lia lekisa ndati ongangu yiwa tu sukila oku kuama yoku kuatisa vamanjetu Akristão? (Olosap. 17:17; 1 Va Tes. 5:14)

  • Tanga 1 Samuele 25:1-43.

    Momo lie Nabala vo sokisila okuti omunu umue wa tatamẽle? (1 Sam. 25:2-5, 10, 14, 21, 25)

    Nye akãi Akristão va lilongisila kongangu ya Avigaile? (1 Sam. 25:32, 33; Olosap. 31:26; Va Efe. 5:24)

    Avigaile wa teyuila Daviti koku linga ovina vipi vivali vĩvi? (1 Sam. 25:31, 33; Va Rom. 12:19; Va Efe. 4:26)

    Olondaka via Daviti ku Avigaile vi kuatisa ndati alume koloneke vilo oku kapako akãi ndeci Yehova a va kapako? (Ovil. 21:8, 9; Va Rom. 2:11; 1 Pet. 3:7)