Skip to content

Skip to table of contents

Olombangi Via Yehova

Select language Umbundu

Esapulo 59: Esunga Lieci Daviti a Tilila

Esapulo 59: Esunga Lieci Daviti a Tilila

ECI Daviti a ponda Goliata, Avinere kesongo kolohoka via va Isareli, wa tuala Daviti ku Saulu. Saulu wa sanjukile calua la Daviti kuenje wo lingisa kesongo kolohoka viaye. Eye wa sapuila Daviti oco a kale kelombe lia soma Saulu.

Noke eci olohoka via tiuka koku liyaka la va Filisiti, akãi va fetika oku imba hati: ‘Saulu wa ipaya olohulukãi, pole Daviti wa ipaya olohuluwa.’ Eci Saulu a ci yeva wa fetika oku tema. Momo omanu va kala loku sivaya calua Daviti okuti Saulu ci sule. Pole omõlaye Yonatão ka temẽle. Eye wa solele calua Daviti kuenda Daviti wa solelevo Yonatão. Omo liaco, kavali kavo va lisila ohuminyo yoku linga akamba otembo yosi.

Soma Saulu imba usongo

Daviti wa kala usiki wolohalupa kuenje Saulu wa solele calua ovisikilo viaye. Pole eteke limue onyeño ya Saulu yo vetiya oku linga ocina cimue cĩvi. Eci Daviti a kala loku sika ohalupa, Saulu wa tikula onjelia yaye kuenje wa imba loku popia hati: ‘Ndi tomela Daviti vocimano.’ Daviti wa yandulukamo kuenje wa puluka konjelia yaco. Noke Saulu wa seteka vali oku tomela Daviti vocimano, pole Daviti wa puluka. Daviti weya oku limbuka okuti, kaliye o sukila oku lunguka.

Ove hẽ ivaluka ohuminyo Saulu a lingile? Eye wa popele okuti, omõlaye ukãi o weca komunu wosi oka ponda Goliata. Saulu wa popia la Daviti okuti, nda wa ponda ci soka ocita casuãlali va Filisiti, omõlange Mikale o linga ukãi wove. Sokolola ño handi ondaka eyi! Saulu wa kala loku lavoka okuti, Daviti oka pondiwa la va Filisiti. Omo okuti va Filisiti ka va tẽlele oku ponda Daviti, Saulu wa eca omõlaye ukãi ku Daviti.

Eteke limue Saulu wa sapuila Yonatão lakuenje vaye vosi ocisimĩlo caye coku ponda Daviti. Pole Yonatão wa popia la isiaye hati: ‘Ku ka ponde Daviti. Daviti la limue eteke a ku lingile cĩvi. Ovina viosi vinene eye a linga, wa vi lingila oku ku popela. Wa mola ndeci eye a kapele omuenyo waye kohele eci a ponda Goliata kuenje ove wa ci sanjukilile calua.’

Davi o yepa usongo

Saulu wa yeva kondaka yomõlaye kuenje wa likuminya okuti ka pondi vali Daviti. Daviti wa tiukila vali konjo ya Saulu oku vumba kokuaye. Eteke limue eci Daviti a kala loku sika ohalupa, Saulu wa seteka vali oku tomela Daviti vocimano. Pole Daviti wa yepamo kuenje usongo wa sa vocimano. Eyi ya kala onjanja yatatu. Kaliye Daviti wa limbuka okuti wa sukilile oku tila!

Vuteke waco Daviti wa enda konjo yaye. Pole Saulu wa tuma alume vamue oco va ponde Daviti. Mikale eci a yeva ocisimĩlo ca isiaye, wa sapuila ulume waye hati: ‘Vuteke ulo nda kua tundile vonjo yilo, hẽla o fa.’ Vuteke waco Mikale wa kuatisa Daviti kuenje wo pitisa ponjanela. Daviti wa lisalamisile vokuenda kueci ci soka anyamo epanduvali oco ka ka sangiwe la Saulu.

1 Samuele 18:1-30; 19:1-18.



Apulilo

  • Momo lie Saulu a kuatela ukuse la Daviti? Pole Yonatão wa litepele ndati la isiaye Saulu?
  • Nye ceya oku pita eteke limue eci Daviti a kala loku sikila Saulu ohalupa?
  • Nye Saulu a tumile Daviti oku linga eci handi ka kuelele omõlaye Mika? Kuenda momo lie Saulu a ci tumilile?
  • Ndomo ca lekisiwa vociluvialuvia, nye ca pita eci Daviti a kala loku sikila Saulu ohalupa konjanja yatatu?
  • Mika wa kuatisa ndati Daviti oco a puluke koku fa? Kuenda nye Daviti a linga vokuenda kuanyamo epanduvali?

Apulilo akuavo

  • Tanga 1 Samuele 18:1-30.

    Ndamupi ocisola ca Yonatão la Daviti ocindekaise cocisola ci kasi pokati “kolomeme vikuavo” kuenda “okacunda katito”? (1 Sam. 18:1; Yoa. 10:16; Luka 12:32; Sak. 8:23)

    Ndaño okuti Yonatão nda eye weya oku piñala Saulu kusoma, elivulu lia 1 Samuele 18:4 li lekisa ndati okuti lopo eye wa pokuile ku yuna Yehova a nõlele oco a kale osoma?

    Ulandu wa Saulu u lekisa ndati okuti ukuse u tuala omunu koku linga ekandu linene? Kuenda eci ci tu ĩha elungulo lie? (1 Sam. 18:7-9, 25; Tia. 3:14-16)

  • Tanga 1 Samuele 19:1-17.

    Yonatão wa kapele ndati omuenyo waye kohele eci a vangula olondaka vi sangiwa kelivulu lia 1 Samuele 19:4, 5? (1 Sam. 19:1, 6)