Skip to content

Skip to table of contents

Olombangi Via Yehova

Select language Umbundu

Esapulo 56: Osoma Yatete ya va Isareli

Esapulo 56: Osoma Yatete ya va Isareli
Samuele o nõla Saulu oco a linge osoma

KŨLĨHISA Samuele ndomo a kasi loku kapa ulela kutue wulume u. Eci oco ovo va lingaile poku nõla omunu oco a linge osoma. Yehova wa sapuila Samuele oco a waveke ulela kutue wa Saulu. Ulela waco wa kuatele elemba liwa.

Saulu ka kuatele ovisimilo viokuti wa loñolohele oco a linge osoma. Eye wa sapuila Samuele hati: ‘Ame nda tiamẽla kepata lia Benjamini okuti epata limue li sule pokati ka va Isareli. Momo lie o nukuila oku linga osoma?’ Yehova wa solele calua Saulu momo eye ka yonguile oku kala omunu umue wa velapo. Eli olio esunga lieci Yehova o nõlela oku kala osoma.

Pole Saulu ka kaile ohukui ale omunu umue o sule. Eye wa tiamẽlele kepata limue liolohuasi. Saulu wa posokele calua haeye wa lepa. Utunga waye wa pitahãlele vakuavo ko Isareli. Eye wa kuatelevo ocituwa coku lupuka calua haiye wa pamele. Omanu va sanjukile calua omo Yehova a nõlele Saulu oco a kale osoma. Ovo va fetika oku kaluka hati: ‘Soma a kale lomuenyo!’

Va Isareli va kuatelevo ovanyali vamue va pama. Ovanyali vaco va kala loku nena ovitangi vialua kokuavo. Eci Saulu a linga osoma ka papitile otembo yalua haico va Amoni veya oku liyaka lavo. Pole Saulu wongolola olohoka viaye via pama kuenje wa yula va Amoni. Eyulo liaco lieya oku sanjuisa calua va Isareli omo lia Saulu wa linga osoma.

Saulu wa songuila va Isareli vokuenda kuanyamo alua koku yula ovanyali vavo. Eye wa kuatelevo omõlaye ukuotõi onduko yaye Yonatão. Yonatão wa kuatisa va Isareli koku yula ovoyaki. Va Filisiti ovo va kala ovanyali va piãla a va Isareli. Eteke limue olohulukãi vialua via va Filisiti vieya oku liyaka la va Isareli.

Samuele wa sapuila Saulu oco o talamele toke eci eya oku eca ocilumba ku Yehova. Pole, Samuele wa cilua oku iya. Saulu wa kuatela usumba olohoka via va Filisiti kuenje wa yayulako oku eca ocilumba ku Yehova. Eci Samuele a pitila, wa sapuila Saulu hati, wa lueya. ‘Yehova oka nõla omunu ukuavo oco a linge osoma ya va Isareli.’

Noke Saulu weya oku lueya vali. Kuenje, Samuele wo sapuila hati: ‘Oku pokola ku Yehova ca velapo, oku lumba ovilumba violomeme ku sule. Omo okuti ove kua pokuile ku Yehova, Yehova oku yanduluka okuti ku lingi vali osoma ya va Isareli.’

Tu pondola oku lilongisa calua kulandu owu. Ulandu waco u lekisa esilivilo lioku pokola kolonumbi via Yehova. Handi vali, ulandu waco u lekisavo okuti, omunu umue uwa o pondolavo oku pongoloka ondingaĩvi ndeci ca pita la Saulu. Ocili okuti, etu ka tu yongola oku pongoloka oco tu kale olondingaĩvi.

1 Samuele kocipama 9 toke 11; 13:5-14; 14:47-52; 15:1-35; 2 Samuele 1:23.



Apulilo

  • Ndomo o cilete vociluvialuvia, nye Samuele a kasi oku linga? Kuenda momo lie?
  • Momo lie Yehova a solelele Saulu? Kuenda Saulu wa tuwile ndati?
  • Onduko yomõla a Saulu helie? Kuenda nye eye a lingile?
  • Momo lie Saulu a ecela ocilumba okuti ka kevelile vali Samuele oku ci linga?
  • Nye tu lilongisila kulandu wa Saulu?

Apulilo akuavo

  • Tanga 1 Samuele 9:15-21 kuenda 10:17-27.

    Ocituwa cesunguluko ca kuatisa ndati Saulu oku yuvula epela eci alume vamue va kala loku pembula? (1 Sam. 9:21; 10:21, 22, 27; Olosap. 17:27)

  • Tanga 1 Samuele 13:5-14.

    Ekandu lipi Saulu a lingile ko Giligali? (1 Sam. 10:8; 13:8, 9, 13)

  • Tanga 1 Samuele 15:1-35.

    Ekandu lipi linene Saulu a lingile liatiamẽla ku Agage soma yo Amaleke? (1 Sam. 15:2, 3, 8, 9, 22)

    Saulu wa setekele ndati oku liupa ekandu liaye? (1 Sam. 15:24)

    Nye tu sukila oku yuvula koloneke vilo eci tu lunguiwa? (1 Sam. 15:19-21; Osa. 141:5; Olosap. 9:8, 9; 11:2)