Skip to content

Skip to table of contents

Olombangi Via Yehova

Select language Umbundu

Esapulo 54: Ulume Umue wa Pama

Esapulo 54: Ulume Umue wa Pama

OVE hẽ wa kũlĩha ulume umue wa pama wa kala palo posi? Ulume waco wa kala onganji. Onduko yaye eye Samisone. Yehova eye wa ecele ongusu kokuaye. Osimbu handi Samisone ka citiwile, Yehova wa popele la inaye hati: ‘Ocita omõla ulume. Eye oka popela va Isareli peka lia va Filisiti.’

Samisone o liyaka lohosi

Va Filisiti va kala omanu vamue vãvi va tungile vofeka yo Kanana. Ovo va kala omanu vakuavita kuenje va yambula calua va Isareli. Eteke limue eci Samisone a kala loku enda kocilombo ca va Filisiti, wa ñualehela lohosi yinene kuenje wa liyaka layo. Noke wa yi ponda leka liaye. Samisone wa pondavo va Filisiti valua.

Samisone weya oku sola calua ukãi umue o tukuiwa hati, Delila. Asongui va Filisiti va likuminyile oku eca ku Delila eci ci soka ohũlũkãi kocita colopalata. Pole te lika nda eye o va lomboluila oku kua tunda ongusu ya Samisone. Delila wa yonguile muẽle oku kuata olombongo viaco. Delila ka kaile ekamba liocili lia Samisone. Kuenda ka tiamelelevo komanu va Suku. Omo liaco, wamamako oku pula Samisone oku kua tunda ongusu yaye.

Delila la Samisone

Noke Delila wa pinga ku Samisone oco o sapuileko ono yongusu yaye. Samisone wa kumbulula hati: ‘Esinga liange ka lia la tetiwa. Tunde eci nda citiwa, Suku wa ndi nõla oco ndi linge ukuenje waye u Nasiri. Nda esinga liange li tetiwa, ongusu yange yi pua.’

Eci Delila a yeva ovina viaco, wa pekelisa Samisone. Noke wa vilikiya ulume umue kuenje wa teta esinga liaye. Eci Samisone a pasuka wa kuata lika ongusu yitito. Kuenje va Filisiti veya vo wambata. Ovo vo tofola ovaso aye kuenje wa linga upika wavo.

Samisone o kasi oku teya olongunji

Eteke limue va Filisiti va kala loku linga ocipito cimue coku fendela suku yavo Dagoni. Kuenje va kundulula Samisone vokayike oco a kale pocipito caco. Otembo yaco esinga liaye lia kula ale. Samisone wa popia lukuenje wo kuata peka hati: ‘Linga ndi lambe volongunji vi kuete onjo.’ Noke, wa likutilila ku Yehova oco a kuate ongusu. Kuenje wa lamba volongunji viaco. Eye wa kaluka lolukandi hati: ‘Ndi fe kumue la va Filisiti.’ Pocipito caco pa kala eci ci soka olohũlũkãi vitatu komanu va Filisiti. Eci Samisone a kuata kolongunji viaco longusu yaye yosi, onjo yaco ya kupuka. Kuenje omanu vosi va kalamo va fa.

Olonganji kocipama 13 toke 16.



Apulilo

  • Onduko yulume u wa pama ndeti helie? Kuenda helie wo wĩha ongusu yaco?
  • Ndomo o cilete vociluvialuvia, nye Samisone onjanja yimue a lingile kohosi yinene?
  • Ndomo o cilete vociluvialuvia, elumbu lipi Samisone a sapuilile Delila? Kuenda eci ca kuatisa ndati va Filisiti oku u kuata?
  • Samisone eteke a fa wa ponda ndati 3.000 kovanyali va Filisiti?

Apulilo akuavo

  • Tanga Olonganji 13:1-14.

    Manoa lukãi waye va sila ongangu yipi yiwa kolonjali kueci catiamẽla koku pindisa omãla? (Olong. 13:8; Osa. 127:3; Va Efe. 6:4)

  • Tanga Olonganji 14:5-9 kuenda 15:9-16.

    Samisone poku ponda ohosi, oku tepa ovikolo vo kutile lavio kuenda oku ponda ohulukãi yomanu lolumbanjo luocimbulu, ci lekisa nye catiamẽla kespiritu sandu lia Yehova?

    Espiritu sandu li tu kuatisa ndati koloneke vilo? (Olong. 14:6; 15:14; Sak. 4:6; Ovil. 4:31)

  • Tanga Olonganji 16:18-31.

    Oku lika kua Samisone lakamba vãvi kuo kokela nye? Kuenda nye tu lilongisilako? (Olong. 16:18, 19; 1 Va Kor. 15:33)