Skip to content

Skip to table of contents

Olombangi Via Yehova

Select language Umbundu

Esapulo 49: Ekumbi Lia Talama Vongunji

Esapulo 49: Ekumbi Lia Talama Vongunji

KŨLĨHISA Yehosua. Eye o kasi loku popia lekumbi hati: ‘Talama.’ Kuenje ekumbi lia talama. Ekumbi lia talama vongunji vokuenda kueteke liosi. Yehova eye wa linga ocikomo caco. Tu konomuisi esunga lieci Yehosua a pingila ocina caco.

Ekumbi

Olosoma vitãlo viofeka yo Kanana via fetika oku liyaka la va Giveone. Eci va fetika oku liyaka, va Giveone va tuma alume vamue ku Yehosua oku pinga ekuatiso. Ovo va popia hati: ‘Enju lombili kulo! Tu popele! Momo olosoma viosi via tunga kolomunda via liongolola oku liyaka lakuenje vove.’

Yehosua lalume vaye va katuka oku enda kofeka yaco. Va pita uteke wosi loku enda. Eci va pitila ko Giveone, asualãli volosoma viaco vitãlo va fetika oku kuata usumba kuenje va tila. Noke Yehova wa tuma ociwe kuenje ca ponda asualãli valua okuti vana va pondiwa lasualãli va Yehosua va sule.

Yehosua

Yehosua wa limbuka okuti ekumbi li laika oku iñila. Eci ku tekãva asualãli volosoma viaco vitãlo va ka tila. Omo liaco, wa likutilila ku Yehova loku pinga hati: ‘Ekumbi li talame.’ Eci ekumbi lia talama va Isareli va kundula ovanyali vavo vosi.

Vofeka yo Kanana mua kala olosoma vialua via suvukile va Isareli. Omo liaco, Yehosua lolohoka viaye va pita eci ci soka akũi atatu lamosi kanyamo oco va kundule olosoma viaco. Noke lioku kundula olosoma viaco, Yehosua wa fetika oku tepa ofeka yaco vapata.

Eci pa pita anyamo alua, Yehosua wa fa. Eye wa fa leci ci soka ocita lekũi kanyamo. Osimbu eye a kala komuenyo lakamba vaye, va Isareli va enda oku pokola ku Yehova. Pole eci eye a fa, omanu va fetika oku linga eci cĩvi. Kuenje veya oku liyaka lovitangi vialua. Ovo va sukilile ekuatiso lia Suku.

Yehosua 10:6-15; 12:7-24; 14:1-5; Olonganji 2:8-13.



Apulilo

  • Ndomo o cilete vociluvialuvia nye Yehosua a kasi loku popia? Kuenda momo lie?
  • Yehova wa kuatisa ndati Yehosua kumue lasualali vaye?
  • Yehosua wa yula olosoma viñami? Kuenda cambata oloneke viñami?
  • Yehosua wa tepisa ndati ofeka yo Kanana?
  • Yehosua wa fa lanyamo añami? Noke nye ceya oku pita lomanu?

Apulilo akuavo

  • Tanga Yehosua 10:6-15.

    Oku kũlĩha okuti Yehova wa talamisa ekumbi losãi kovaso ya va Isareli, ci tu ĩha ekolelo lie koloneke vilo? (Yeh. 10:8, 10, 12, 13; Osa. 18:3; Olosap. 18:10)

  • Tanga Yehosua 12:7-24.

    Helie wa eca ongusu yoku yula olosoma akũi atatu lamosi vioko Kanana? Kuenda momo lie eci ci kuetele esilivilo kokuetu etaili? (Yeh. 12:7; 24:11-13; Esin. 31:8; Luka 21:9, 25-28)

  • Tanga Yehosua 14:1-5.

    Ofeka ya tepisiwilile ndati kapata a va Isareli? Kuenda eci ci lekisa nye catiamẽla koku piñala Oluali luokaliye? (Yeh. 14:2; Isa. 65:21; Esek. 47:21-23; 1 Va Kor. 14:33)

  • Tanga Olonganji 2:8-13.

    Ndomo Yehosua a lingaile ko Isareli, helie koloneke vilo wa siata oku kembulula ovohembi a vakuetavo liesanda? (Olong. 2:8, 10, 11; Mat. 24:45-47; 2 Va Tes. 2:3-6; Tito 1:7-9; Esit. 1:1; 2:1, 2)