Skip to content

Skip to table of contents

Olombangi Via Yehova

Select language Umbundu

Esapulo 48: Enyango Lia va Giveone

Esapulo 48: Enyango Lia va Giveone

KALIYE alupale valua vofeka yo Kanana va lipongiya oku liyaka la va Isareli. Ovo va simĩle okuti va pondola oku yula va Isareli. Pole omanu vana va kala volupale luo Giveone, ka va kuatele ovisimĩlo viaco. Omanu vaco va kala ocipepi la va Isareli. Ovo va kũlĩhile okuti va Isareli va kala loku kuatisiwa la Suku. Omo liaco, ka va yonguile oku liyaka la Suku. Ove hẽ wa kũlĩha eci va Giveone va linga?

Ovo va sokolola oku likembisa ndolongende vi tunda kupãla. Va wala uwalo wa kuka kuenda olohaku via kuka. Va wila kovimbulu viavo lolonjeke via kuka kuenda olombolo via kukuta. Kuenje va pitila ku Yehosua loku popia hati: ‘Tua tunda kofeka yocipãla momo tua yeva unene wa Suku yene Yehova. Tua yeva ovina viosi a ku lingili Kegito. Asongui vetu va tu sapuila okuti, ambati okulia kuovonjila, kuendi ka popi hati: Tua kuenje vene. Lisili letu ocisila cokuti ka vu liyaki letu. Tala uwalo wetu wa nyõlehela vungende. Olombolo vietu via kukutila vonjila.’

Yehosua kuenda asongui vakuavo va tava kondaka ya lume vaco va Giveone. Va linga lavo ohuminyo yokuti ka va liyaki lavo. Eci pa pita oloneke vitatu, veya oku limbuka okuti alume vaco va Giveone ka va kaile olongende via tunda kupãla.

Yehosua wa va pula hati: ‘Nye wa popeli hati tua tunda kupãla, osimbu okuti u kasi ocipepi letu?’

Ovo va kumbulula hati: ‘Tua yeva okuti, Suku yene Yehova wa likuminyile oku eca kokuene ofeka yosi yo Kanana. Kuenje tua kuata ohele yovimuenyo vietu.’ Va Isareli va tẽlisa ohuminyo yavo. Ovo ka va pondele va Giveone. Pole va valingisa apika vavo.

Soma yo ko Yerusalãi weya oku tema calua la va Giveone, omo liocisila combembua va linga la va Isareli. Noke wa sapuila olosoma vikuavo vikuãla hati: ‘Enjui u ndi kuatisi oku liyaka la va Giveone. Kuenje va linga olosoma vitãlo. Kaliye olosoma viaco via lipongiya oku liyaka la va Giveone. Anga hẽ va Giveone va lingile muẽle olondunge poku sanda ombembua la va Isareli? Tu konomuisi ulandu waco.

Yehosua 9:1-27; 10:1-5.

Yehosua kuenda va Giveone


Apulilo

  • Va Giveone va litepele ndati lomanu voko vaimbo akuavo a kala ocipepi lo Kanana?
  • Ndomo ca lekisiwa vociluvialuvia nye va Giveone va linga? Kuenda momo lie va ci lingila?
  • Ohuminyo yipi Yehosua lasongui va Isareli va linga la va Giveone? Pole nye ovo veya oku limbuka eci papita oloneke vitatu?
  • Nye ca pita eci olosoma vio vaimbo akuavo via yeva okuti va Giveone va linga ocisila combembua la va Isareli?

Apulilo akuavo

  • Tanga Yehosua 9:1-27.

    Ndaño okuti Yehova wa handelekele va Isareli oku ‘kundula olonungi viosi viofeka,’ ovituwa vipi viwa a limbukile ku va Giveone? (Yeh. 9:22, 24; Mat. 9:13; Ovil. 10:34, 35; 2 Pet. 3:9)

    Omo lioku kakatela kocisila Yehosua a lingile la va Giveone ndamupi eye a eca ongangu yiwa Kakristão vo koloneke vilo? (Yeh. 9:18, 19; Mat. 5:37; Va Efe. 4:25)

  • Tanga Yehosua 10:1-5.

    Owiñi wakahandangala wa siata ndati oku setukula va Giveone? Kuenda eci ca siata oku va kokela nye? (Yeh. 10:4; Sak. 8:23; Mat. 25:35-40; Esit. 12:17)