Skip to content

Skip to table of contents

Olombangi Via Yehova

Select language Umbundu

Esapulo 44: Rahava wa Seleka Olondavululi

Esapulo 44: Rahava wa Seleka Olondavululi

ALUME ava o lete ndeti, va kasi lovitangi. Ovo ci tava okuti va puluka ale va fa. Alume vaco, olondavululi via va Isareli. Ukãi o kasi ndeti oku va kuatisa, onduko yaye Rahava. Eye o kasi vonjo eyi konano yocimbaka colupale luo Yeriko. Tu konomuisi esunga liovitangi vialume vaco.

Va Isareli va kala ocipepi loku yoka Olui Yordão oco va iñile vofeka yo Kanana. Pole osimbu handi ka va yokele olui, Yehosua wa tuma alume vavali oco va kũlĩhise ofeka yaco. Eye wa va sapuila hati: ‘Kuendi ka kũlĩhisi ofeka kuenda olupale luo Yeriko.’

Rahava kuenda olondavululi vivali via va Isareli

Eci alume vaco va pitila vo Yeriko va enda toke konjo ya Rahava. Pole omunu umue wa sapuila soma yo Yeriko hati: ‘Vuteke ulo, mulo mua iñila alume vavali va Isareli oku kũlĩhisa ofeka.’ Eci soma a ci yeva, wa tuma alume vamue ku Rahava. Alume vaco va popia la Rahava hati: ‘Tundisila posamua alume va kasi vonjo yove!’ Rahava wa seleka alume vaco volusoka luonjo yaye. Kuenje wa kumbulula hati: ‘Ocili okuti, konjo yange kueyile alume pole sia kũlĩhile oku va tunda. Eci kua tekãva osimbu handi olombundi ka via yikiwile, oco alume vaco va enda. Nda wa yayuliko oku va landula, u va kuata muẽle!’ Kuenje alume va soma va tunda oku va landula.

Eci alume vaco va tunda, Rahava wa lamana toke kolusoka. Wa popia lolondavululi viaco hati: ‘Nda kũlĩha okuti Yehova eca ofeka yilo kokuene. Tua yeva ndomo eye a takatisa ovava Vokalunga Kakusuka eci wa tundi Kegito. Tua yevavo ndomo wa pondi olosoma via Sihoni la Oge. Kaliye ndu pingi lohenda. Lisili lame vonduko ya Yehova ndeci ame ndo lingi ohenda. Popeli omuenyo wa tate la mai kuenda vamanjange.’

Olondavululi via sapuila Rahava okuti eci ovo va tunda, eye o sukila oku linga ocina cimue. Ovo vo sapuila hati: ‘Kutila ukolo owu u kusuka ponjanela yove. Ongoluila vonjo yove epata liove liosi. Eci tu tiuka oku tambula olupale luo Yeriko, tu limbuka ukolo waco ponjanela yove. Kuenje tu popela omuenyo womanu vosi va kasi vonjo yove.’ Eci olondavululi via tiukila ku Yehosua, vio sapuila ovina viosi va pita lavio.

Yehosua 2:1-24; Va Heveru 11:31.



Apulilo

  • Rahava wa kala vimbo lipi?
  • Alume ava vavali vociluvialuvia velie? Kuenda momo lie ovo va kasilili vo Yeriko?
  • Soma yoko Yeriko wa tumile Rahava oku linga nye? Kuenda Rahava wo tambuluile ndati?
  • Rahava wa kuatisile ndati alume vavali? Kuenda nye a pinga kalume vaco?
  • Ohuminyo ye olondavululi vivali via lingile ku Rahava?

Apulilo akuavo

  • Tanga Yehosua 2:1-24.

    Ohuminyo ya sonehiwa kelivulu Lietundilo 23:28 ya tẽlisiwa ndati eci va Isareli va liyaka la va Yeriko? (Yeh. 2:9-11)

  • Tanga Va Heveru 11:31.

    Ongangu ya Rahava yi lekisa ndati esilivilo lioku kuata ekolelo? (Va Rom. 1:17; Va Hev. 10:39; Tia. 2:25)