Skip to content

Skip to table of contents

Olombangi Via Yehova

Select language Umbundu

Esapulo 43: Yehosua wa Linga Usongui wa va Isareli

Esapulo 43: Yehosua wa Linga Usongui wa va Isareli

MOSE wa yonguile oku enda la va Isareli vofeka yo Kanana. Omo liaco, wa pinga ku Yehova hati: ‘Njokise Olui Yordão, oco mbanje ofeka yiwa.’ Pole Yehova wo sapuila hati: ‘Ci tẽla, liwekapo. Ku ka popie vali lame ondaka eyi.’ Momo lie Yehova a popela olondaka evi ku Mose?

Yehova wa popia olondaka evi omo liulandu wa pita eci Mose a veta vewe. Ivaluka okuti eye kuenda Arone ka va ecele esivayo ku Yehova. Ovo ka va sapuilile omanu okuti Yehova eye wa eca ovava va tunda vewe. Omo liaco, Yehova wa sapuila Mose okuti ka iñila vofeka yo Kanana kumue la va Isareli.

Noke liolosãi vimue tunde poku fa kua Arone, Yehova wa sapuila Mose hati: ‘Pañinya Yehosua, u nena loku u talamisa kovaso ocitunda Eleasa, lo kovaso omanu vosi. U kundika kovaso avo kuenda oku va sapuila okuti Yehosua wa linga usongui wokaliye.’ Mose wa linga ovina viosi Yehova o sapuila ndomo o cilete vociluvialuvia cilo.

Mose o lekisa Yehosua usongui wokaliye

Noke Yehova wa sapuila Yehosua hati: ‘Kuata utõi, ku ka yokoke. Ove o songuila va Isareli vofeka yo Kanana yina nda likuminya kokuavo. Ame ñasi love.’

Noke Yehova wa sapuila Mose oco a lamane Komunda yi tukuiwa hati, Nevo kofeka ya va Moavi. Eci a kala komunda yaco, wa mola onepa yikuavo Yolui Yordão kuenda ofeka yiwa yo Kanana. Yehova wa popia hati: ‘Eyi oyo ofeka nda likuminya oku eca kovitumbulukila via Avirahama la Isake kuenda Yakoba. Ndi ku lekisa ofeka yaco pole ku iñilamo.’

Komunda yaco Nevo, oko Mose a fila. Otembo yaco eye wa kuata eci ci soka 120 kanyamo. Pole wa kuatele olohõlo vialua kuenda ovaso aye ka va vuvalele. Va Isareli veya oku sumua calua omo lioku fa kua Mose. Pole noke veya oku sanjuka eci va mola Yehosua usongui wavo wokaliye.

Atendelo 27:12-23; Esinumuĩlo 3:23-29; 31:1-8, 14-23; 32:45-52; 34:1-12.



Apulilo

  • Vociluvialuvia eci Alume ava vavali va talama ndeti kumue la Mose velie?
  • Nye Yehova a sapuilile Yehosua?
  • Momo lie Mose a londelele Komunda Nevo? Kuenda nye Yehova o sapuila?
  • Eci Mose a fa wa kuatele anyamo añami?
  • Momo lie omanu va sumuilile? Pole esunga lipi va kuata lioku sanjuka?

Apulilo akuavo

  • Tanga Atendelo 27:12-23.

    Ocikele cipi Yehosua a tambuile ku Yehova? Kuenda ndamupi Yehova a siata oku tata omanu Vaye koloneke vilo? (Atend. 27:15-19; Ovil. 20:28; Va Hev. 13:7)

  • Tanga Esinumuĩlo 3:23-29.

    Momo lie Yehova ka ecelelele okuti Mose la Arone va iñila vofeka yohuminyo? Kuenda nye tu lilongisilako? (Esin. 3:25-27; Atend. 20:12, 13)

  • Tanga Esinumuĩlo 31:1-8, 14-23.

    Olondaka via Mose via lekisa ndati okuti eye wa tavele epindiso lia tunda ku Yehova? (Esin. 31:6-8, 23)

  • Tanga Esinumuĩlo 32:45-52.

    Embimbiliya li pongolola ndati omuenyo wetu? (Esin. 32:47; Ovis. 18:5; Va Hev. 4:12)

  • Tanga Esinumuĩlo 34:1-12.

    Ndaño okuti Mose ka la mola Yehova elivulu Liesinumuĩlo 34:10 li lekisa ndati ukamba eye a kuata Laye? (Etu. 33:11, 20; Atend. 12:8)