Skip to content

Skip to table of contents

Olombangi Via Yehova

Select language Umbundu

Esapulo 41: Onyoha Yosipi

Esapulo 41: Onyoha Yosipi
Mose kuenda onyoha yosipi

ONYOHA ya limuñila ndeti kuti, anga hẽ yocili muẽle? Sio, ha yociliko. Onyoha yaco ya tungiwa losipi. Yehova wa sapuilile Mose oco a tulike onyoha yaco kuti. Eye wa ci linga oco okuti va Isareli poku vanja konyoha yaco, va pondola oku kala lomuenyo. Pole, olonyoha vikuavo o lete ndeti posi, viocili muẽle. Olonyoha viaco via lumana omanu kuenje va fetika oku vela. Ove hẽ wa kũlĩha esunga liaco?

Va Isareli va vanguile ovina vĩvi vioku tomba Yehova kuenda Mose. Ovo va lisiõsiõla hati: ‘Nye wa tu upila vofeka Yegito oco tu file mulo vekalasoko? Mulo [vekalosoko] ka muli okulia ndaño ovava. Ka tu sole okulia kuaco omana.’

Pole omana ya kala okulia kumue kuwa. Yehova wa va ĩhile okulia kuaco locikomo. Wa va ĩhilevo ovava. Pole omanu ka va lekisile olopandu ku Suku. Omo liaco, Yehova wa tuma olonyoha via tema oco a yambule va Isareli. Olonyoha viaco via va lumana kuenje valua va fa.

Va Isareli va lumaniwa lolonyoha

Noke omanu veya ku Mose loku popia hati: ‘Tua linga ekandu momo tua lisiõsũila Yehova kuenda ove. Omo liaco, likutilila ku Yehova okuti o tu upa olonyõha.’

Mose wa likutilila ku Suku. Kuenje Yehova wa sapuila Mose oco a pange onyoha eyi yosipi. Eye wo sapuila oco a yi tulike kuti. Yehova wa ci lingila oco okuti vosi va lumaniwa va pondola oku sakuiwa poku vanja kuti waco. Mose wa linga ovina viosi Suku o sapuila. Omanu vana va lumaniwa eci va vanja konyoha yaco yosipi, veya oku sakuiwa.

Kulandu owu tu pondola oku lilongisako calua. Etu tu kasi nda va Isareli vana va lumaniwa lolonyoha. Vosi tu kuete elavoko lioku fa. Tua siata oku vela kuenda tu kuka. Ovitangi viaco vieyilila omo liolonjali vietu via tete Adama la Heva vana va lueya ocihandeleko ca Yehova. Vosi yetu tu mãla vavo. Pole Yehova wa pongiya onjila yi tuala komuenyo ko pui.

Yehova wa tumĩle Omõlaye, Yesu Kristu mulo voluali. Omanu valua omo lioku sima okuti Yesu wa kala ondigaĩvi vo valela kuti. Pole Yehova wa tumĩle Yesu oco a tu yovole. Nda tua pokola kokuaye loku kuama ongangu yaye tu pondola oku kuata omuenyo ko pui. Noke tu ka lilongisa vali ovina vikuavo viatiamẽla kokuaye.

Atendelo 21:4-9; Yoano 3:14, 15.



Apulilo

  • Nye ca limuña ndeti kuti vociluvialuvia? Kuenda momo lie Yehova a tumila Mose oku yi tulika kuti?
  • Momo lie omanu ka va lekisilile olopandu kovina viosi Suku a va lingila?
  • Eci Yehova a tuma olonyoha via tema oco a yambule omanu nye ovo va pinga ku Mose?
  • Momo lie Yehova a tumila Mose oku tunga onyoha yosipi?
  • Nye tu lilongisila kulandu owu?

Apulilo akuavo

  • Tanga Atendelo 21:4-9.

    Elungulo lie tu upa ku va Isareli eci va lisiõsuĩla okulia ku Yehova? (Atend. 21:5, 6; Va Rom. 2:4)

    Vanyamo eya oku kuamamo nye va Isareli va enda oku linga lonyoha yosipi? Kuenda nye Soma Hesekiya a enda oku linga? (Atend. 21:9; 2 Olos. 18:1-4)

  • Tanga Yoano 3:14, 15.

    Onyoha yosipi ya kala ndati ocindekaise coku tulikiwa kua Yesu Kristu kuti? (Va Gal. 3:13; 1 Pet. 2:24)