Skip to content

Skip to table of contents

Olombangi Via Yehova

Select language Umbundu

Esapulo 40: Mose wa Veta Vewe

Esapulo 40: Mose wa Veta Vewe

KUA pita anyamo alua okuti, 10, 20, 30, 39, kanyamo! Pole va Isareli handi va kala vekalosoko. Vokuenda kuanyamo aco, Yehova wa tata ciwa omanu vaye. Eye wa va tekula lomana. Lutanya Yehova wa va songuila lelende linene. Luteke wa va songuila londalu. Vokuenda kuanyamo aco uwalo wavo ka wa puile kuenda ka va yevele evalo kolomãi.

Kaliye ca kala kosãi yatete kunyamo va Isareli va tẽlisa akũi akuãla kanyamo tunde eci va tunda Kegito. Ovo va tunga ovilombo viavo ko Kadesi. Eci va kala kocitumãlo caco, oco Mose a tumile alume ekũi la vavali oku kũlĩhisa ofeka yo Kanana. Otembo yaco ka va tẽlisile handi akũi akuãla kanyamo. Miriama mukãi wa Mose wa fila ko Kadesi. Noke va Isareli va fetika oku kuata vali ovitangi.

Omo okuti ka va kuatele ovava, va fetika oku lisiõsũila Mose hati: ‘Hĩse nda tua file. Nye wa tu upila Kegito oku tu nena kocitumãlo cilo cohali kuna ka kuli cimue? Kulo ka kuli osi yolombuto, ndaño akuyu, pamue ayuva, pamue oloromeira. Ka kuli ovava oku nyua.’

Mose o veta vewe

Eci Mose la Arone va enda ko tavernakulu oku likutilila, Yehova wa popia la Mose hati: ‘Ongolola omanu vosi. Popia lesenje li kasi kovaso avo. Vesenje liaco mu ka tunda ovava. Kuenje eca ovava aco kokuavo kuenda kovinyama viavo.’

Mose wongolola omanu kuenje wa va sapuila hati: ‘Yeveleli ene amanu vosi ka wa koleleli ndeti Suku! Anga ame la Arone tu tẽla oku vu pila ovava vesenje lilo?’ Noke Mose wa veta ombueti yaye vewe olonjanja vivali kuenje mua tunda ovava alua. Omanu kuenda ovinyama viavo va fetika oku nyua toke va tẽla.

Yehova weya oku tema calua la Mose kuenda Arone. Ove hẽ wa kũlĩha esunga liaco? Momo okuti Mose la Arone va popia hati, ovo va tẽla oku upa ovava vesenje. Pole Yehova eye wa linga ocikomo caco. Mose la Arone ka va sapuilile ocili komanu catiamẽla kovina viaco. Omo liaco, Yehova wa va sapuila okuti, va ka yambuiwa. Eye wa popia hati: ‘Ene ka vu tuala omanu vange vofeka yo Kanana.’

Noke va Isareli va tunda ko Kadesi kuenje va pitila Komunda ya Horo. Komunda yaco oko Arone a fila. Eci Arone a fa, wa kuata eci ci soka 123 kanyamo. Va Isareli veya oku sumua calua kuenje vo lila eci ci soka akũi atatu koloneke. Noke omõlaye Eleasa eye wa linga ocitunda cinene vofeka ya va Isareli.

Atendelo 20:1-13, 22-29; Esinumuĩlo 29:5.



Apulilo

  • Yehova wa tata ndati va Isareli osimbu va kala vekalasoko?
  • Nye va Isareli va lisiõsuĩla eci va kala ko Kadesi?
  • Yehova wa eca ndati ovava komanu kuenda kovinyama viavo?
  • Helie ulume u vociluvialuvia okasi oku li ilika eye muẽle? Kuenda nye a kasi loku ci lingila?
  • Momo lie Yehova a temelele Mose kuenda Arone? Kuenda ovo veya oku kangisiwa ndati?
  • Nye ca pita Komunda Horo? Kuenda helie weya oku kala ocitunda cinene?

Apulilo akuavo

  • Tanga Atendelo 20:1-13, 22-29 kuenda Esinumuĩlo 29:5.

    Ndomo Yehova a tata va Isareli vekalasoko tu lilongisako nye? (Esin. 29:5; Mat. 6:31; Va Hev. 13:5; Tia. 1:17)

    Yehova wa tenda ndati oku lueya kua Mose la Arone eci ka vo sivayele kovaso a va Isareli? (Atend. 20:12; 1 Va Kor. 10:12; Esit. 4:11)

    Ndomo Mose a tava epindiso ku Yehova tu lilongisako nye? (Atend. 12:3; 20:12, 27, 28; Esin. 32:4; Va Hev. 12:7-11)