Skip to content

Skip to table of contents

Olombangi Via Yehova

Select language Umbundu

Esapulo 37: Ombalaka Yoku Fendela Yehova

Esapulo 37: Ombalaka Yoku Fendela Yehova

OVE hẽ wa kũlĩha eci ci kasi ndeti loku tungiwa? Ocina caco, ombalaka yoku fendela Yehova. Ombalaka yaco yi tukuiwavo hati, otavernakulu. Va Isareli va tungile ombalaka yaco eci va tunda Kegito okuti otembo yaco papita ale unyamo umosi. Helie wa va tuma oku tunga ombalaka yaco?

Otavernakulu

Yehova eye wa va tumile oku yi tunga. Eci Mose a kala Komunda, Yehova wo sapuila ndomo a pondola oku tunga ombalaka yaco. Eye wa sapuila Mose oco ombalaka yaco yi tungiwe lonjila yimue okuti ci leluka oku yi pangulula kuenda oku yi panga vali. Omo liaco, eci va Isareli va tunda vekalasoko, vambata ombalaka yaco.

Nda wa vanja vokati kombalaka yaco, muli ohondo yimue yitito. Vohondo yaco muli ocikasia. Ocikasia caco ci tukuiwa hati, ocikasia covisila. Kavindi ocikasia caco, kuli ovangelo vavali va keruvi okuti va tungiwa lulu. Noke Suku wa soneha vali Ovihandeleko Ekũi vovawe avali momo ovawe atete Mose wa a tetola. Ovawe aco va kala vokati kocikasia covisila. Vokati kocikasia caco mua kalavo ombia yomana. Ove hẽ ivaluka omana?

Yehova wa nõlele Arone manji a Mose oco a kale ocitunda cinene. Arone eye wa songuila omanu koku fendela Yehova. Omãla vaye va kalavo ovitunda.

Kaliye kũlĩhisa vohondo yinene vokati kombalaka. Ohondo yaco yinene calua. Ove hẽ o lete okasia yi kasi loku tunda ndeti owisi? Owu owo owatale ovitunda via enda loku yokela insensu vi kuete elemba liwa. Vohondo yaco mua kalavo olovela epanduvali. Ocina catatu ca kalamo omesa. Komesa yaco kua kala olombolo ekũi la vivali.

Kocitali cotavernakulu kua kala ombasia yimue yovava. Pombasia yaco opo ovitunda via enda loku lisukuila. Kua kalavo owatale yimue yinene. Kowatale yaco oko va enda loku yokela ovinyama vioku lumba ku Yehova. Ombalaka yaco ya kala vokati kocilombo ca va Isareli.

Etundilo 25:8-40; 26:1-37; 27:1-8; 28:1; 30:1-10, 17-21; 34:1, 2; Va Heveru 9:1-5.



Apulilo

  • Eci ci kasi oku tungiwa ndeti vociluvialuvia ci tukuiwa nye? Kuenda mua enda oku lingiwila nye?
  • Momo lie Yehova a tumila Mose oku tunga ombalaka yimue okuti yi leluka oku ya ambata?
  • Okasia yi kasi ndeti vohondo eyi yitito ya nye? Kuenda vokasia yaco nye ci kasimo?
  • Helie Yehova a nõla oco a linge ocitunda cinene? Kuenda nye ocitunda cinene ca enda oku linga?
  • Tukula ovina vitatu vio vohondo yinene yombalaka.
  • Ovina vipi vivali vi kasi vocitali co tavernakulu? Kuenda nye va enda oku linga lavio?

Apulilo akuavo

  • Tanga Etundilo 25:8-40; 26:1-37; 27:1-8; kuenda 28:1.

    Vakeruvi kilu “liocikasia covisila” va kala ocindekaise ce? (Etu. 25:20, 22; Atend. 7:89; 2 Olosap. 19:15)

  • Tanga Etundilo 30:1-10, 17-21; 34:1, 2; kuenda Va Hev. 9:1-5.

    Momo lie Yehova a lekasaila kovitunda vionembele esilivilo lioku li yelisa ketimba? Kuenda eci ci kuetevo esilivilo lie koloneke vilo? (Etu. 30:18-21; 40:30, 31; Va Hev. 10:22)

    Eci Paulu a sonehela Akristão va Heveru wa lekisa ndati okuti ocisila Covihandeleko ka ci kuete vali esilivilo? (Va Hev. 9:1, 9; 10:1)