Skip to content

Skip to table of contents

Olombangi Via Yehova

Select language Umbundu

Esapulo 34: Okulia Kumue Kuokaliye

Esapulo 34: Okulia Kumue Kuokaliye

ANGA hẽ ove o tẽla oku lombolola eci omanu va kasi loku nõla ndeti posi? Ovo va kasi loku nõla ocina cimue ca setahãla ovasa a yela. Pole ci tava oku ci lia.

Va Isareli vongolola omana

Otembo yaco tunde eci va Isareli va tunda Kegito, papita ño osãi yimosi. Ovo va kala vekalosoko. Omo okuti ka va kuatele okulia va fetika oku lisiõsiõla hati: ‘Hĩse nda Yehova wa tu pondelele Kegito. Momo tua kuata okulia kualua.’

Noke Yehova wa popia hati: ‘Ndi nena okulia ku tunda kilu.’ Haico Yehova a linga. Eci kuaca omẽle va Isareli va mola posi ovina vimue vi yela ndocikokoto. Kuenje va fetika oku lipula pokati vati: ‘Eci nye?’

Mose wa popia hati: ‘Oku oko okulia Yehova a eca kokuene.’ Noke omanu va tukula okulia kuaco hati, OMANA. Omana yaco ya lisoka ndakende owiki.

Mose wa sapuila va Isareli hati: ‘Omunu omunu a nõle lika eci a tẽla okulia.’ Ovo va enda loku ci linga omẽle lamẽle. Pole eci utanya utua, omana yaco ya enda loku yenguluka.

Mose wa sapuila vali omanu hati: ‘Lomue ka ka soleke o mana yoku lia eteke likuavo.’ Pole omanu vamue ka va pokuile kondaka yaco. Ove hẽ wa kũlĩha eci ceya oku pita? Eci kuaca omẽle omana yina va solekele ya tunda ovanyo kuenje ya fetika oku lẽha lãvi.

Pole kua kala eteke limue vosemana Yehova a va sapuilile okuti ci tava oku seleka omana yeteke likuavo. Eteke liaco eteke liepandu vosemana. Yehova wa va sapuilile okuti ci tava oku seleka omana yokulia keteke liepanduvali. Momo keteke liaco, ka ku kala omana. Keteke liepanduvali omana yaco ka ya endaile loku vola. Eci oco ca kala ocikomo cikuavo.

Vokuenda kuanyamo va Isareli va kala vekalasoko, Yehova wa va tekula lomana yaco.

Etundilo 16:1-36; Atendelo 11:7-9; Yehosua 5:10-12.



Apulilo

  • Vociluvialuvia eci nye omanu ava va kasi oku nõla ndeti posi? Kuenda ocina caco va ci tukowaile hati ndati?
  • Olonumbi vipi Mose a ecele komanu viatiamẽla koku nõla o mana?
  • Nye Yehova a tuma omanu oku linga keteke liepandu? Kuenda momo lie?
  • Ocikomo cipi Yehova a enda oku linga eci o mana ya enda oku selekiwa toke keteke liepanduvali?
  • Yehova wa tekula omanu lomana vokuenda kuanyamo añami?

Apulilo akuavo

  • Tanga Etundilo 16:1-36 kuenda Atendelo 11:7-9.

    Nye elivulu Lietundilo 16:8 li lekisa catiamẽla koku sumbila vana va tumbikiwa kovikele vioku songuila ekongelo Liakristão? (Va Hev. 13:17)

    Vekalasoko va Isareli va enda oku ivaluisiwa ndati oku pokola ku Yehova eteke leteke? (Etu. 16:14-16, 35; Esin. 8:2, 3)

    Elomboloko lie Yesu a ecele liatiamẽla ko mana? Kuenda tu kuatisiwa ndati ‘lombolo yaco ya tunda kilu’? (Yoa. 6:31-35, 40)

  • Tanga Yehosua 5:10-12.

    Va Isareli va lia o mana vokuenda kuanyamo añami? Kuenda nye tu lilongisila kulandu waco? (Etu. 16:35; Atend. 11:4-6; 1 Va Kor. 10:10, 11)