Skip to content

Skip to table of contents

Olombangi Via Yehova

Select language Umbundu

Esapulo 36: Ociñumañuma Congombe

Esapulo 36: Ociñumañuma Congombe

KŨLĨHISA eci omanu va kasi loku linga ndeti! Ovo va kasi loku fendela ociñumañuma congombe. Momo lie?

Eci Mose a kala komunda okatembo kamue, omanu va fetika oku popia hati: ‘Ka tua kũlĩhile eci ci kasi loku pita la Mose. Tu tungi osuku yimue yi tu songuila oku tunda vofeka yilo.’

Mose imba posi ovawe avali

Arone manji a Mose wa tava kondaka yaco. Wa sapuila omanu hati: ‘Upi ovingẽlengẽle viulu vi kasi kovatuĩ ene, vineni kokuange.’ Eci va nena ovingẽlengẽle viaco, Arone wa vi yengulula kuenje wa tunga lavio ociñumañuma congombe. Noke va Isareli va fetika oku popia hati: ‘U eye Suku yetu wa tu upa vofeka Yegito.’ Ovo va linga ofesta yimue yinene kuenje va fendela ociñumañuma caco.

Eci Yehova a mola ovina viaco, weya oku tema calua kuenje wa sapuila Mose hati: ‘Yayulako loka. Momo omanu va kasi loku linga eci cĩvi. Va yapuka vovihandeleko viange kuenje va li tungila ociñumañuma culu.’

Omanu va fendela ociñumañuma congombe

Mose wa loka komunda yaco lonjanga yalua. Eci a pitila ocipepi, wa mola ovilinga viaco via va Isareli. Omanu va kala loku imba kuenda oku piluka loku ñuala ñuala kociñumañuma caco. Mose weya oku tema calua. Wa kupuila posi ovawe ovihandeleko kuenje a tetoka. Noke wa nyañula ociñumañuma caco culu kuenje wa ci yengulula. Wa ci keleketa ndosema.

Ocili okuti, va Isareli va linga ocina cimue ka ca sungulukile. Mose wa sapuila alume vamue oco va kuate volosipata viavo. Wa popia lavo hati: ‘Pondi omanu vosi va fendela ociñumañuma.’ Alume vaco va ponda eci ci soka 3.000 komanu. Ovina evi vi lekisa okuti tu sukila lika oku fendela Yehova kuenda oku yuvula oku fendela olosuku viesanda.

Etundilo 32:1-35.



Apulilo

  • Vociluvialuvia eci nye omanu va kasi oku linga? Kuenda momo lie?
  • Momo lie Yehova a temelele? Kuenda nye Mose a linga poku mola eci omanu va kala loku linga?
  • Mose wa sapuila alume vamue oku linga nye?
  • Ulandu owu u tu longisa nye?

Apulilo akuavo

  • Tanga Etundilo 32:1-35.

    Ulandu owu u tu lekisa ndati ndomo Yehova a tenda oku tenga efendelo liocili leli liesanda? (Etu. 32:4-6, 10; 1 Va Kor. 10:7, 11)

    Momo lie Akristão va sukilila oku lunguka poku nõla olomapalo ndeci ovisikilo kuenda oku piluka? (Etu. 32:18, 19; Va Efe. 5:15, 16; 1 Yoa. 2:15-17)

    Epata lia Lewi lia eca ndati ongangu yiwa koku lekisa esunguluko? (Etu. 32:25-28; Osa. 18:25)