Skip to content

Skip to table of contents

Olombangi Via Yehova

Select language Umbundu

Esapulo 116: Ndomo tu Pondola Oku Kala Otembo ka yi Pui

Esapulo 116: Ndomo tu Pondola Oku Kala Otembo ka yi Pui

WA KŨLĨHA eci kafeko u lakamba vaye va kasi loku tanga? Elivulu eli ove o kasi loku tanga ndeti, Elivulu Liasapulo Embimbiliya. Kuenda ovo va kasi oku tanga esapulo lilo: “Ndomo tu Pondola Oku Kala Otembo ka yi Pui.”

Kamõla o kasi oku tanga

Wa kũlĩha eci ovo va kasi oku lilongisa? Catete, va lilongisa okuti, nda tu yongola oku kuata omuenyo ko pui tu sukila oku kuata ukũlĩhĩso watiamẽla ku Yehova kuenda Komõlaye Yesu. Embimbiliya li popia okuti: ‘Omuenyo ko pui wowu. Oku kũlĩha okuti Yehova eye lika Suku yocili, kuenda oku kũlĩhavo Omõlaye a tumile palo posi, Yesu Kristu.’

Ndamupi tu pondola oku lilongisa eci catiamẽla ku Yehova kuenda Komõlaye Yesu? Onjila yimue, oku tanga Elivulu lilo Liasapulo Embimbiliya tunde kefetikilo toke kesulilo. Li tu sapuila ovina vialua viatiamẽla ku Yehova kuenda ku Yesu. Li tu sapuilavo eci catiamẽla kovina ovo va linga kuenda kovina ovo vaka linga. Pole, handi tu sukila oku linga vali ovina vikuavo, haku tangako ño elivulu lilo.

Embimbiliya

O lete elivulu eli li kasi ndeti posi? Elivulu liaco Embimbiliya. Pinga komunu umue oco a ku tangeleko olonepa vimue Viembimbiliya vasapulo a sangiwa velivulu lilo. Embimbiliya li tu sapuila eci tu sukila oku linga oco tu vumbe ciwa Yehova kuenda oku kuata omuenyo ko pui. Tu sukila oku kuata ocituwa coku tanga Embimbiliya eteke leteke.

Oku lilongisa eci catiamẽla ku Yehova Suku kuenda ku Yesu Kristu hacoko lika ci sukiliwa. Ci tava okuti pamue tu kuete ukũlĩhĩso walua watiamẽla kokuavo, pole ka tu ka kuata omuenyo ko pui. Wa kũlĩha ovina vikuavo vi sukiliwa?

Tu sukilavo oku kapako ovina tua siata oku lilongisa. Handi ivaluka Yuda Isikariote? Eye wa kala umue pokati kekũi lavavali komanu Yesu a nõlele oco va linge ovapostolo vaye. Yuda wa kuata ukũlĩhĩso walua watiamẽla ku Yehova kuenda wa Yesu. Nye ceya oku pita laye? Noke eye wa linga ukuacipululu kuenda wa pakula Yesu kovanyali vaye lakũi atatu kolopalata. Omo liaco, Yuda kaka kuata omuenyo ko pui.

Ivaluka Gehasi, ulume una tua lilongisa Kesapulo 69? Eye wa yonguile oku tambula uwalo lolombongo ka via kaile viaye. Eye wa vangula uhembi oco a tambule ovina viaco. Pole, Yehova wo kangisa. Eye oka tu kangisavo nda ka tua pokuile kovihandeleko viaye.

Pole, kua kala omanu valua okuti va enda oku vumba Yehova lesunguluko. Anga hẽ ka tu yongola oku kala ndomanu vaco? Tu kuete oku setukula ongangu yiwa yumalẽhe Samuele. Ndomo tua lilongisa Kesapulo 55, eye wa kuata lika anyamo atãlo eci a fetika oku vumba Yehova votavernakulu yaye. Ndaño okuti handi u mõla, lovevo o pondola oku vumba Yehova.

Ocili okuti una tu yongola oku setukula Yesu Kristu. Osimbu handi a kala omõla, ndomo tua lilongisa Kesapulo 87, eye wa endele konembele oku sapuila vakuavo catiamẽla ku Isiaye Yehova. Tu setukuli ongangu yaye. Tu sapuiliko vakuetu eci catiamẽla ku Suku yetu Yehova kuenda Komõlaye Yesu Kristu. Nda tua linga ovina evi, tuka kuata omuenyo ko pui voluali luokaliye palo posi.

Yoano 17:3; Osamo 145:1-21.



Apulilo

  • Nye tu sukila oku lilongisa nda tu yongola oku kala otembo yenda ño hũ?
  • Tu lilongisa ndati eci catiamẽla ku Yehova kuenda ku Yesu ndomo ca lekisiwa la kafeko u kumue lakamba vaye vociluvialuvia eci?
  • Elivulu lipi likuavo o lete vociluvialuvia eci? Kuenda momo lie tu kuetele oku li tanga olonjanja viosi?
  • Oku lilongisa catiamẽla ku Yehova kuenda ku Yesu hacoko lika ci sukiliwa oco tu kuate omuenyo ko pui. Oco hẽ nye vali ci sukiliwa?
  • Nye tua lilongisa Kesapulo 69?
  • Ongangu yipi yiwa ya lekisiwa lumalẽhe Samuele Kesapulo 55?
  • Tu kuama ndati ongangu ya Yesu Kristu? Nda tua ci linga, cika tu kuatisa oku linga nye kovaso yoloneke?

Apulilo akuavo

  • Tanga Yoano 17:3.

    Ovisonehua vi lekisa ndati okuti oku kuata ukũlĩhĩso wa Yehova kuenda wa Yesu Kristu ka ci lomboloka lika oku patekela ovina? (Mat. 7:21; Tia. 2:18-20; 1 Yoa. 2:17)

  • Tanga Osamo 145:1-21.

    Esunga lipi tu kuete lioku sivaya Yehova? (Osa. 145:8-11; Esit. 4:11)

    Yehova wa lingila ndati “vosi ohenda”? Kuenda eci ci tu vetiya ndati oku linga akamba vaye? (Osa. 145:9; Mat. 5:43-45)

    Nda Yehova ekamba lietu, cika tu vetiya oku linga nye? (Osa. 119:171, 172, 175; 145:11, 12, 21)