Skip to content

Skip to table of contents

Olombangi Via Yehova

Select language Umbundu

Esapulo 114: Esulilo Liovina Viosi Vĩvi

Esapulo 114: Esulilo Liovina Viosi Vĩvi

NYE o lete ndeti palo? Olohoka viotuvalu tuyela. Kũlĩhĩsa oku vi kasi loku tundilila. Ovio vi kasi loku tundilila kilu, kalende! Anga hẽ kilu ku kuete muẽle otuvalu?

Yesu Osoma kilu

Sio, otuvalu tuaco hatuociliko. Momo tua kũlĩha okuti otuvalu ka tu endela va lende. Ale hacoko? Pole, Embimbiliya li kasi loku popia catiamẽla kotuvalu kilu. Wa kũlĩha esunga liaco?

Momo kosimbu omanu va endaenda oku yaka lotuvalu. Omo liaco, eci Embimbiliya li popia okuti omanu va endela kotuvalu kilu, ci lekisa okuti Suku oka linga uyaki lomanu palo posi. Wa kũlĩha onduko yocitumãlo cuyaki waco? Ci tukuiwa hati, Harmagedo. Uyaki waco uka malako ungangala wosi palo posi.

Yesu eye oka songola uyaki waco ko Harmagedo. Ivaluka okuti, Yesu wa nõliwa la Yehova oco a linge osoma yuviali waye. Eli olio esunga lieci Yesu a walela ekolowa liosoma. Osipata yi lekisa okuti eye oka nyõla anyali vosi va Suku. Anga eci ci tu komõhisa oku kũlĩha okuti Suku oka nyõla omanu vosi vãvi?

Tiukila Kesapulo 10. Nye ci moleha palo? Etande linene okuti li kasi oku nyõla omanu vãvi. Helie wa nena Etande liaco? Yehova Suku. Kaliye tala Esapulo 15. Nye ci kasi loku pita palo? Ofeka ya Sodoma la Gomora yi kasi loku timihĩwa londalu ya tumiwa la Yehova.

Tiukila Kesapulo 33. Tala eci ci kasi loku pita lotuvalu kuenda olohoka via va Egito. Helie wa lingisa okuti va pondiwa lovava? Yehova. Eye wa ci lingila oco a yovole omanu vaye. Tuvula Kesapulo 76. Oka limbuka okuti Yehova wa ecelela omanu vaye oku nyõliwa omo liesino liavo.

Omo liaco, ka ci komohĩsa okuti Yehova oka tuma olohoka viaye tunde kilu oco vi maleko evĩho palo posi. Eci ci lomboloka nye? Tuvula kemẽla likuavo kuenje tala.

Esituluilo 16:16; 19:11-16.



Apulilo

  • Momo lie Embimbiliya li tukuila otuvalu kilu?
  • Uyaki wa Suku lomanu vãvi kulo kilu lieve u tukuiwa hati ndati? Kuenda uyaki waco u ka linga nye?
  • Ndomo ca lekisiwa vociluvialuvia Helie oka songola uyaki waco? Momo lie a kuetele ekolowa? Kuenda osipata eye a kuete yi lomboloka nye?
  • Nda tua tala Kesapulo 10 kuenda 15 momo lie ka ci tu komohisila okuti Suku oka nyõla omanu vãvi?
  • Esapulo 33, Lesapulo 36 kuenda 76li lekisa ndati okuti Suku oka nyõla omanu vãvi ndaño okuti ovo va popia okuti va fendela Suku?

Apulilo akuavo

  • Tanga Esituluilo 19:11-16.

    Ovisonehua vi lekisa ndati okuti Yesu Kristu eye muẽle wa lekisiwa ndeti kokavalu ka yela? (Esit. 1:5; 3:14; 19:11; Isa. 11:4)

    Osonde ya liñisa uwalo wa Yesu yi lekisa ndati oku yula kuaye? (Esit. 14:18-20; 19:13; Isa. 63:1-6)

    Helie wa kongeliwa volohoka vi kasi oku kuama Yesu kokavalu kaye kayela? (Esit. 12:7; 19:14; Mat. 25:31, 32)