Skip to content

Skip to table of contents

Olombangi Via Yehova

Select language Umbundu

Esapulo 81: Oku Kolela Kekuatiso Lia Suku

Esapulo 81: Oku Kolela Kekuatiso Lia Suku

CI SOKA akũi atãlo kolohulukãi komanu, va linga ungende woku tunda ko Bavulono toke ko Yerusalãi. Pole eci va pitĩla, o Yerusalãi yakala elunda. Lomue wa tungilemo. Omo liaco, ca sukilile okuti va Isareli va tunga vali cosi vofeka yaco.

Utala owo va tunga tete. Utala wa kala ocitumãlo cimue ovo va enda loku ecela ovilumba viovinyama, ale olombanjaile ku Yehova. Eci kua pita olosãi vimue va Isareli va fetika oku tunga onembele. Pole, ovanyali va lisunguile lavo ka va yonguile okuti va Isareli va tunga onembele. Va seteka oku liyaka lavo oco va liwekepo oku tunga. Oku sulako ovanyali va linga okuti soma yokaliye yoko Persia o tumbika ocihandeleko cimue oco ci tateke upange woku tunga.

Tunde eci va Isareli va tunda ko Bavulono peya oku pita eci ci soka ekũi lepanduvali kanyamo. Noke Yehova wa tuma ovaprofeto vaye Hagai la Sakariya oku sapuila omanu oco va fetike vali oku tunga. Omanu va kolela kekuatiso lia Suku kuenje va pokola kovaprofeto. Ovo va fetika oku tunga, ndaño okuti ocihandeleko ca popele hati, ka citava oku tunga.

Noke kueya esualali lioko Persia o tukuiwa hati Tetanai. Eye wa pulisa va Isareli, u wa va tuma oku tunga onembele. Va Isareli va tambulula hati, eci handi ovo va kala ko Bavulono Soma Kuro eye wa va handelekele hati: ‘Kuendi, ko Yerusãlai kuenda tungi onembele ya Yehova, Suku yene.’

Tetanai wa tuma ukanda ko Bavulono oku pula nda Kuro, eye wa ecele muẽle ocihandeleko caco. Kotembo yaco Kuro wa fa ale. Soma yokaliye yoko Persia wa tumavo ukanda. Eye wa popia okuti Kuro wa ci popele muẽle ocili. Kuenda soma wa soneha hati: ‘Ecelela va Isareli oco va tunge onjo ya Suku yavo. Kuenda ndi handeleka okuti va kuatisi.’ Vokuenda kuanyamo akuãla ovo va mãla oku tunga onembele. Kuenje va Isareli va sanjukile calua.

Tunde eci onembele ya malusuiwa papitile eci ci soka akũi akuãla lecelãla kanyamo. Omanu vo Yerusalãi va kala olohũkui, olupale kuenda onembele ya Suku ka ya posokele vali. Esera wa kala ko Bavulono wa yeva okuti onembele ya Yehova yi sukila oku yi mioñolola ciwa. Ove wa kũlĩha eci eye a linga?

Esera wa enda ku Aretasesete, soma ya va Persia. Omo okuti Soma yaco wa sungulukile calua, eye wa eca ku Esera ovina vialua oco a ende lavio ko Yerusalãi. Noke Esera wa pinga ku va Isareli vana va kala ko Bavuluno oco vo kuatise oku ambata ovina viaco ko Yerusalãi. Ci soka olohulukãi epandu komanu va tava kondaka yaco. Ovo va ambata ulu lopalata kuenda ovina vikuavo via posoka.

Esera wa kala lusumba, omo vonjila mua kala omanu vãvi. Omanu vaco nda va nyana opalata yavo lulu kuenda oku va ponda. Omo liaco, Esera wa kovonga omanu vosi, ndomo ci mõleha vociluvialuvia. Kuenje wa likutilila ku Yehova oco a va teyuile kungende wavo woku tiukila ko Yerusalãi.

Esera kuenda omanu va likutilila

Yehova wa va teyuila. Eci va tẽlisa olosãi vikuãla viungende, va pitĩla ciwa vo Yerusalãi. Anga hẽ eci ka ci lekisa okuti Yehova o teyuila omanu vana va kolela kekuatiso liaye?

Esera ocipama 2 toke 8.



Apulilo

  • Omanu vañami va lingile ungende woku tunda ko Bavulono toke ko Yerusalãi? Pole nye ovo va sanga ko Yerusalãi eci va pitilako?
  • Eci va Isareli va pitĩla nye va fetika tete oku tunga? Pole nye ovanyali vavo va linga?
  • Hagai la Sakariya va kala velie? Kuenda nye ovo va sapuila omanu?
  • Momo lie Tatenai a tumilĩle ukanda ko Bavulono? Kuenda vo tambulula ndati?
  • Nye Esera a linga eci a yeva ovina via sukiliwile koku tunga onembele ya Suku?
  • Ndomo o cilete vociluvialuvia, nye Esera a pinga vohutililo? Kuenda nye tu lilongisilako?

Apulilo akuavo

  • Tanga Esera 3:1-13.

    Nda tu kasi kocitumãlo cimue okuti ka kuli ekongelo liomanu va Suku tu kuete oku amamako oku linga nye? (Esera 3:3, 6; Ovil. 17:16, 17; Va Hev. 13:15)

  • Tanga Esera 4:1-7.

    Ongangu yipi Seruvavele a sia komanu va Yehova kueci catiamẽla koku yuvula oku tenga efendelo liocili letavo liesanda? (Etu. 34:12; 1 Va Kor. 15:33; 2 Va Kor. 6:14-17)

  • Tanga Esera 5:1-5, 17 kuenda 6:1-22.

    Momo lie ovanyali ka va tẽlelele oku tateka upange woku tunga onembele? (Esera 5:5; Isa. 54:17)

    Elinga liakulu va Yudea li kuatisa ndati Akristão vana okuti akulu vekongelo oku kuama olonumbi via Yehova eci va likatanga lovanyali? (Esera 6:14; Osa. 32:8; Va Rom. 8:31; Tia. 1:5)

  • Tanga Esera 8:21-23, 28-36.

    Ongangu yipi ya Esera tu kuete oku kuama eci handi ka tua lingile ocina cimue? (Esera 8:23; Osa. 127:1; Olosap. 10:22; Tia. 4:13-15)