Skip to content

Skip to table of contents

Olombangi Via Yehova

Select language Umbundu

Esapulo 80: Omanu va Suku va Tunda ko Bavulono

Esapulo 80: Omanu va Suku va Tunda ko Bavulono

TUNDE eci o Bavulono ya tambuiwa la va Media kuenda va Persia kua pitile ale alima avali. Tala eci ci kasi loku pita! Va Isareli va kasi loku tunda ko Bavulono. Ndamupi ovo va yovuiwa? Helie wa va ecelela oku tunda ko Bavulono?

Kuro soma ya va Persia eye wa ci linga. Osimbu handi Kuro ka citiwile Yehova wa sapuila uprofeto Isaya oco a sonehe eci catiamẽla kokuaye. Eye wa popia hati: ‘Ove o ka tẽlisa ocipango cange. Olombundi vika siala upulule oco o tambule ofeka.’ Eci o Bavulono ya tambuiwa Soma Kuro eye wa kala usongui waco. Eci va Media la va Persia va iñila volupale luo Bavuluno vuteke waco olombundi via kala upulule.

Pole, Isaya uprofeto wa Yehova wa popiavo hati, Kuro oka eca ocihandeleko cokuti Yerusalãi kuenda onembele yika tumbuluiwa vali. Anga hẽ Kuro wa eca muẽle ocihandeleko caco? Oco wa eca. Eye wa popia ku va Isareli hati: ‘Kuendi ko Yerusalãi ka tumbululi onembele ya Yehova Suku yene.’ Eci oco va Isareli vaka linga.

Va Isareli va tunda ko Bavulono

Va Isareli vamue va kala ko Bavulono, ka va kuatele epondolo lioku linga ungende woku tiukila ko Yerusalãi, momo wa kala ungende walua u soka 800 kolokilometulu. Kuenda omanu vamue va kukile haivo vakala olombei. Kua kalavo ovina vikuavo via tateka omanu vamue oku tiukila ko Yerusalãi. Pole Kuro wa popia kuava ka va endele hati: ‘Eci ulu lopalata kuenda olombanjaile vikuavo komanu vana va kasi loku tiukila ko Yerusalãi oku ka tumbulula onembele.’

Omo liaco, va Isareli vana va enda ko Yerusalãi va tambula olombanjaile vialua. Kuro wa tiuwiyavo olombasia kuenda olokopo Soma Nevukandesa o pile vonembele ya Yehova eci o Yerusalãi ya nyõliwa. Kuenje omanu va tiukila lovina vialua ko Yerusalãi.

Eci papita olosãi vikuãla, oco va Isareli va pitĩla ko Yerusalãi. Papita muẽle akũi epanduvali kanyamo tunde eci ya nyõliwa. Kuenda ofeka ya siale upolokoso. Ndaño okuti va Isareli va kala loku tiukila kofeka yavo muẽle, ovo va liyaka lovitangi vialua ndomo tuka ci konomuisa kovaso.

Isaya 44:28; 45:1-4; Esera 1:1-11.



Apulilo

  • Ndomo ca lekisiwa vociluvialuvia, nye va Isareli va kasi oku linga?
  • Ocitumasuku cipi Yehova a popia vonduko ya Isaya ca tẽlisiwa la Kuro?
  • Nye Kuro a sapuila va Isareli vana ka va yonguile oku tiukila ko Yerusalãi?
  • Nye Kuro a eca komanu oco va cambate ko Yerusalãi?
  • Ungende wa va Isareli woku tiukila ko Yerusalãi wa ambatele oloneke viñami?
  • Kua pitile anyamo añami tunde eci va Isareli va sile ofeka yavo upolokoso?

Apulilo akuavo

  • Tanga Isaya 44:28 kuenda 45:1-4.

    Yehova wa lekisa ndati okuti nda weya oku tẽlisa ocitumasuku catiamẽla ku Kuro? (Isa. 55:10, 11; Va Rom. 4:17)

    Ocitumasuku ca Isaya catiamẽla ku Kuro ca lekisa ndati okuti Yehova Suku o kuete epondolo lioku popia ovina via laika okuiya? (Isa. 42:9; 45:21; 46:10, 11; 2 Pet. 1:20)

  • Tanga Esera 1:1-11.

    Loku kuama ongangu ya vana ka va tẽlele oku tiukila ko Yerusalãi tu ‘kuatisa’ ndati vana va yongola oku iñila kupange wotembo yosi? (Esera 1:4, 6; Va Rom. 12:13; Va Kol. 4:12)