Skip to content

Skip to table of contents

Olombangi Via Yehova

Select language Umbundu

Esapulo 78: Ocisonehua ca Molẽha Vocimano

Esapulo 78: Ocisonehua ca Molẽha Vocimano
Ovimuine u soneha vocimano

NYE ci kasi loku pita palo? Omanu va kasi kocipito cimue cinene. Soma yoko Bavulono wa laleka ohulukãi yomanu va velapo. Ovo va kopile olokopo viulu lopalata kuenda olombasia viopiwile vonembele ya Yehova ko Yerusalãi. Pole, vonjanja yaco kua molẽha ovimuine vieka liomunu kuenje via fetika oku soneha vocimano. Vosi vakalamo va saluka.

Belsiatare kumue lakombe vaye

Belsiatare, onekulu ya Soma Nevukandesa, eye wa kala osoma. Eye wa tuma oku vilikiya olonoño viaye. Soma wa popia hati: ‘Wosi wa tanga ocisonehua eci loku situlula elomboloko liaco,’ ‘oka tambula olombanjaile vialua kuenda oka kala ombiali yatatu ya velapo vusoma.’ Pole, lomue pokati kolonoño wa tẽla oku tanga ocisonehua ca molẽha vocimano, ndaño oku situlula elomboloko liaco.

Eci Nasoma a yeva onjuela, wa iñila vonjo yaco yocipito. Eye wa popia la soma hati: ‘Kuka kuate usumba, vusoma wove muli ulume umue wa kũlĩha olosuku vi kola. Eci sekulu yove Nevukandesa a kala osoma wo tumbikile ndusongui wolonoño viaye viosi. Onduko yaye Daniele. U kovongi kuenje eye oka situlula elomboloko liovina evi.’

Kuenje Daniele vo nena ku Soma. Daniele wa likala oku tambula ombanjaile yaco. Noke wa sapuila Soma esunga lieci Yehova o pila sekulu yaye, Nevukandesa ku Soma. Daniele wa popia hati: ‘Momo eye wa kala ukuepela kuenje Yehova wo kangisa.’

Daniele wa popia la Belsiatare hati: ‘Pole ove wa kũlĩha cosi ca pita laye handi lopo wa lingavo ukuepela nda Nevukandesa.’ Ove wa tuma oku kopa olokopo lolombasia vio vonembele ya Yehova, kuenje wa nyuilamo ovinyu. Wa sivaya olosuku vioviti levi viovawe, kua sivayele Ululiki wetu Ukuonene. Eli olio esunga lieci Suku a tumila eka oco li sonehe olondaka evi.

Daniele wa popia la Soma hati, ‘eye wa soneha ndoco: ‘MENE, MENE, TEKEL, UFARSIN.’

‘Ondaka MENE yi lomboloka okuti Suku wa tenda oloneke viusoma wove kuenje oka vi imulako. TEKEL, ci lomboloka okuti wa pesaliwa kombalãsa kuenje wa lela. PERES ci lomboloka okuti usoma wove uka eciwa ku va Media la va Persia.’

Osimbu Daniele a kala loku vangula, haico va Media la va Persia va fetika oku liyaka lava Bavulono. Ovo va tambula ofeka kuenda va ponda Soma Belsiatare. Kuenje ocisonehua caco ca tẽlisiwa muẽle vuteke waco. Nye ci ka pita la va Isareli? Oco tu kũlĩhe ulandu waco, tete tu konomuisi eci ca pita la Daniele.

Daniele 5:1-31.



Apulilo

  • Nye ceya oku pita eci soma yo Bavulono a linga ocipito cinene yu va nyuila volokopo viopiwa vonembele ya Yehova ko Yerusalãi?
  • Nye Belsiatare a tumile kolonoño viaye? Pole ovo ka va tẽlele oku linga nye?
  • Nasoma wa tumile soma oku linga nye?
  • Ndomo Daniele a sapuila soma, momo lie Suku a tumilile eka oku soneha vocimano?
  • Daniele wa situlula ndati elomboloko liolondaka via sonehiwile vocimano?
  • Nye ca pita osimbu Daniele a kala loku vangula?

Apulilo akuavo

  • Tanga Daniele 5:1-31.

    Tepisa eci ci lomboloka oku sumbila Suku lusumba Belsiatare a kuata eci a mola ocisonehua vocimano. (Dan. 5:6, 7; Osa. 19:9; Va Rom. 8:35-39)

    Daniele wa lekisa ndati utõi eci a vangula la Belsiatare? (Dan. 5:17, 18, 22, 26-28; Ovil. 4:29)

    Ocipama 5 celivulu lia Daniele ca lekisa ndati okuti Yehova eye lika Suku Tõlo koluali luosi? (Dan. 4:17, 25; 5:21)