Skip to content

Skip to table of contents

Olombangi Via Yehova

Select language Umbundu

 ESAPULO 11

Olukongolo Luatete

Olukongolo Luatete

NOHA lepata liaye eci va tunda vocimbaluku va linga ocina cimue. Ove hẽ wa kũlĩha ocina catete ovo va linga? Noha wa tunga utala woku lumbila Suku ocilumba. Tala vociluvialuvia cilo pombuelo oco o kũlĩhĩse ndomo eye a kasi oku ci linga. Noha wa eca ocilumba covinyama ku Yehova. Ocilumba caco ca kala coku lekisa olopandu ku Yehova omo lioku popeliwa ketande kumosi lomãla vaye.

Ove hẽ o sima okuti Yehova wa sanjukilile ocilumba caco? Ocili okuti Yehova wa sanjukilile ocilumba caco. Yehova wa likuminyile ku Noha okuti lalimue eteke a ka nyõla vali oluali letande.

Eci ovava eya oku takata kilu lieve, Noha lepata liaye va fetika omuenyo wokaliye. Suku wa va sumũlũisa kuenje wa va sapuila hati: “Liciti, siati, yukisi oluali.”

Pole, vokuenda kuotembo omanu eci nda va yeva ulandu watiamẽla ketande, citava okuti ovo nda va kuata usumba wokuti eteke limue pamue etande li keya vali. Omo liaco, Suku wa eca ocina cimue komanu oco ci kale ndohuminyo. Ohuminyo yaco ya kala yoku ivaluisa omanu okuti Eye lalimue eteke a ka nyõla vali oluali letande. Ove hẽ wa kũlĩha ocina caco a eca komanu? Ocina caco, Olukongolo.

Nda ombela yaca okuti utanya wa tua, kilu kua siata okuiya olukongolo. Olukongolo lu kuete avala alua a fina. Ove hẽ wa muĩle ale evala limue liolukongolo? Vociluvialuvia cilo o letemo evala limue?

Suku wa popia hati: ‘Ndi lisila ocisila ci kola, siti, lalimue eteke omanu kuenda ovinyama va nyõleha vali letande. Ñapa olukongolo luange kalende. Eci olukongolo lu molẽhela kalende njivaluka ocisila cange.’

Eci ove omõla olukongolo lu ku ivaluisa nye? Suku wa likuminya okuti lalimue eteke a ka nyõla vali oluali letande.

Efetikilo 8:18-22; 9:9-17.

Study Questions