Skip to content

Skip to table of contents

Olombangi Via Yehova

Select language Umbundu

 ESAPULO 20

Dina wa Kuata Ovitangi

Dina wa Kuata Ovitangi

OVE hẽ wa kũlĩha omanu Dina a yongola oku nyula? Eye o yongola oku ka nyula afeko vamue va kasi vofeka yo Kanana. Anga hẽ isiaye Yakoba wa ci sanjukilile? Oco tu sange etambululo liepulilo eli, tu konomuisi eci Avirahama la Isake va popele catiamẽla kakãi va Kanana.

Anga hẽ Avirahama wa yonguile okuti omõlaye Isake o kuela ukãi u Kanana? Sio. Isake la Rebeka, va yonguile hẽ okuti omõlavo Yakoba o kuela ufeko u Kanana? Sio ka va yonguile. Momo lie?

Ocili okuti, omanu vo vo Kanana va enda loku fendela olosuku viesanda. Ovo ka va kaile omanu vamue va sunguluka oku likuela lavo ndaño oku kuata ukamba lavo. Omo liaco, Yakoba ka yonguile okuti omõlaye ukãi o kuata ukamba lafeko vaco.

Dina wa kuata ovitangi viocili. Ove hẽ o lete ulume u Kanana o kasi ndeti oku vanja Dina? Onduko yaye Sekeme. Eteke limue eci Dina a tunda oku ka nyula akamba vaye vofeka yo Kanana, Sekeme wo kuata kuenje wa lipekela laye. Sekeme wa linga ocina cimue cĩvi momo omanu vana vakuele ovo lika va pondola oku lipekela. Elinga liaco lĩvi, lieya oku nena ovitangi vialua.

Eci vamanji a Dina va yeva elinga liaco lĩvi, veya oku tema calua. Simione la Lewi va tikula olosipata viavo. Va enda toke vokati kimbo la vamanjavo kuenje va ponda alume vosi kuenda Sekeme. Yakoba wa temẽle calua momo omãla vaye va linga ocina cimue ka ca sungulukile.

Ndamupi ovina viaco vĩvi via fetika? Ovina viaco via fetika eci Dina a kuata ukamba lomanu vana ka va pokola Kovihandeleko via Suku. Omo liaco, tu sukila oku yuvula oku kuata ukamba lomanu vana ka va pokola Kovihandeleko via Suku.

Efetikilo 34:1-31.

Study Questions