Skip to content

Skip to table of contents

Olombangi Via Yehova

Select language Umbundu

 ESAPULO 13

Avirahama wa Linga Ekamba Lia Suku

Avirahama wa Linga Ekamba Lia Suku

NOKE Lietande, omanu vamue va enda oku ka tunga kofeka yo Ur. Ofeka yo Ur ya posokele calua, pole omanu va kalamo va enda loku fendela olosuku viesanda. Ocituwa caco haico va lingaile eci va kala ko Bavele. Omanu vo ko Ur lava va kala vo Bavele, ka va kaile nda Noha lomõlaye Semi vana va enda loku vumba Yehova.

Eci pa pita ci soka 350 kanyamo noke Lietande, Noha wa fa. Otembo yaco ulume u o lete ndeti vociluvialuvia cilo, wa kala lanyamo avali. Suku wo solele calua. Onduko yaye Avirahama. Eye wa kala lepata liaye vofeka yo Ur.

Eteke limue Yehova wa sapuila Avirahama hati: ‘Tunda vofeka yo Ur kuenda kepata liove, kuende kofeka hu lekisa.’ Ocili okuti, vofeka yo Ur mua kala ukuasi walua kuenda olonjo via posoka. Anga hẽ Avirahama wa pokola ku Yehova loku sia ofeka yaco? Avirahama omo lioku pokola ku Yehova, wa linga ekamba Liaye.

Avirahama wa tunda vofeka yo Ur. Vamue pokati kepata liaye va enda kumosi laye ndeci: Isiaye Terahi, Lote ocimumba caye, kuenda ukãi waye Sarai. Vokuenda kuotembo, va pitĩla kofeka yimue yi tukuiwa hati, Harane kuenje oko Terahi a fila. Ofeka yaco ya kala ocipãla lo Ur.

Noke Avirahama lepata liaye va tunda ko Harane va enda toke ko Kanana. Eci va iñila vofeka yaco, Yehova wa popia la Avirahama hati: ‘Eyi oyo ofeka ngeca komãla vove.’ Kuenje Avirahama wa tunga vo Kanana.

Yehova wa amamako oku sumũlũisa Avirahama. Kuenje Avirahama wa kuata oviunda vialua violomeme kuenda ovinyama vikuavo. Wa kuatavo eci ci soka ocita kapika. Pole eye lukãi waye Sarai ka va kuatele omãla.

Eci Avirahama a kuata eci ci soka 99 kanyamo, Yehova wo sapuila hati: ‘Ndi lisila ocisila love. Ove oka linga onjali yolofeka.’ Otembo yaco Avirahama lukãi waye Sarai, va kala ale akulu vendamba. Oco hẽ ndamupi ohuminyo yaco yeya oku tẽlisiwa nda okuti otembo yaco ka va kuatele handi omõla??

Efetikilo 11:27-32; 12:1-7; 17:1-8, 15-17; 18:9-19.

Study Questions