Skip to content

Skip to table of contents

Olombangi Via Yehova

Select language Umbundu

 ESAPULO 4

Esunga Lieci va Pumbila Ocitumãlo Cavo

Esunga Lieci va Pumbila Ocitumãlo Cavo

KALIYE kũlĩhĩsa eci ci kasi oku pita la Adama kuenda Heva. Ovo va tundisiwa vocumbo ce Edene. Ove hẽ wa kũlĩha esunga liaco?

Adama la Heva, va linga ocina cimue cĩvi. Omo liaco, Yehova wa va yambula. Nye va linga?

Ovo va linga ocina cimue Suku a va sapuilile okuti ka ci tava oku ci linga. Suku wa va handelekele okuti ci tava okulia kapako oviti viosi vi kasi vocumbo. Pole vokati kocumbo mua kala uti umue Suku a va sapuilile okuti ka ci tava oku lia kepako liaco, momo eteke vu liako haico vu fa. Uti waco wa kala wa Yehova. Etu tua kũlĩha okuti ka ca sungulukile okupa ocina cimue camãle. Ove hẽ ku tava okuti ocili? Nye ceya oku pita?

Eteke limue eci Heva a kala lika liaye vocumbo, onyõha yeya kokuaye. Sokolola ño handi! Onyõha ya sapuila Heva oco a lie kuti una Suku ava handelekele okuti ka ci tava oku liako. Pole, Suku eci a lulika olonyõha, ka vi lulikile luloño woku vangula lomanu. Omo liaco, onyõha ka ya kaile oku vangula luloño wayo muẽle. Omunu umue eye wa vanguila vokati konyõha. Helie omunu waco?

Omunu waco, ka kaile Adama. Citava okuti, omunu waco wa kala umue pokati komanu Suku a lulika tete osimbu handi ka lulikile oluali. Omanu vaco, ovangelo, pole etu ka tu pondola oku va mola. Umue pokati kovangelo vaco, weya oku linga ukuepela. Wa fetika oku sokolola okuti eye o sesamẽlavo efendelo ndeli lia Suku. Eye wa yonguile okuti omanu va pokola kokuaye okuti ku Yehova hakoko. Ungelo waco, eye wa vanguila vokati konyõha.

Ungelo waco wa kuata uloño woku yapuisa Heva. Wa sapuila Heva okuti nda walia kepako liuti waco o pondola oku kala nda Suku. Kuenje Heva wa tava kokuaye. Wa yunga kepako liaco, wa lia kuenje Adama wa liakovo. Omo lioku lia kepako liaco, Adama la Heva va lueya ocihandeleko ca Suku. Eli olio esunga lieci ovo va pumbila ocitumãlo cavo ceposo.

Suku wa likuminya okuti oluali luka kala vali ofeka yokaliye ndeci ca kala ocumbo Cedene. Vokuenda kuelilongiso lietu tuka konomuisa ndomo ove oka kuatisa kupange waco. Pole cilo, tu konomuisi handi eci ca pita la Adama kuenda Heva.

Efetikilo 2:16, 17; 3:1-13, 24; Esituluilo 12:9.

Study Questions