Skip to content

Skip to table of contents

Olombangi Via Yehova

Select language Umbundu

 ESAPULO 7

Ulume Umue Ukuotõi

Ulume Umue Ukuotõi

ECI omanu va fetika oku lua kilu lieve, valua pokati kavo va fetika oku kuama elinga lĩvi ndeli lia Kaini. Pole kua kaile omunu umue okuti kovilinga wa litepele la vakuavo. Ulume waco, Enoke. Enoke wa kala ulume umue ukuotõi. Kotembo yaco ndaño okuti omanu vosi va kala olondingaĩvi, pole eye wamamako oku vumba Suku.

Ove hẽ wa kũlĩha esunga lieci omanu vaco va kalela olondingaĩvi? Kaliye sokolola: Suku wa handelekele Adama la Heva okuti, ka ci tava oku lia kepako liuti u kasi vokati kocumbo. Helie wa va vetiya oku lueya ocihandeleko ca Suku? Ungelo umue eye wa va vetiya oku lueya. Embimbiliya li tukula ungelo waco hati, Satana. Eye wa siata oku vetiya omanu oku linga eci cĩvi.

Eteke limue, Yehova wa popia la Enoke oco a sapuile omanu ocina cimue. Ovo ka va solele oku yeva ondaka yaco. Enoke wa va sapuila hati, ‘Suku wa likuminya oku nyõla olondingaĩvi viosi.’ Omanu poku yeva ondaka yaco, va tema calua kuenje va seteka oku ponda Enoke. Ocili okuti, poku sapula ondaka ya Suku komanu vaco, Enoke wa sukilile oku kuata utõi wocili.

Omo liolondingaĩvi viaco, Suku ka ecelelele okuti Enoke o kala lomuenyo otembo yalua. Omo liaco, Enoke wa kala lika lomuenyo eci ci soka 365 kanyamo. Momo lie tu popela okuti wa kala lika leci ci soka 365 kanyamo? Momo omanu vokotembo yaco va kuatele olohõlo vialua. Kuenda va enda loku kala otembo yalua komuenyo. Omõla a Enoke Metusele, wa kala lomuenyo eci ci soka 969 kanyamo.

Noke lioku fa kua Enoke, evĩho lia fetika oku livokiya. Embimbiliya li popia okuti ‘ovisimĩlo viomanu vieya oku vĩha oloneke viosi kuenje oluali lueyuka ungangala.’

Kotembo yaco voluali mua kala ovitangi vialua. Ove hẽ wa kũlĩha esunga liaco? Satana wa kala lonjila yokaliye yoku vetiya omanu oco va linge eci cĩvi. Ondaka eyi tu ka yi lilongisa vovipama vi kuãimo.

Efetikilo 5:21-24, 27; 6:5; Va Heveru 11:5; Yuda 14, 15.

Study Questions