Skip to content

Skip to table of contents

Olombangi Via Yehova

Select language Umbundu

 OCIPAMA 14

Jehovah Provides “a Ransom in Exchange for Many”

Jehovah Provides “a Ransom in Exchange for Many”

1, 2. Ndamupi Embimbiliya li lombolola ekalo liomanu? Kuenda yipi okuti oyo lika onjila yiwa yoku yovuiwa?

“OVINA viosi via lulikiwa vi yavalela kumuamue olongembia vioku cita.” (Va Roma 8:22) Olondaka evi viupostolo Paulu vi lombolola ciwa ekalo lietu lioloneke vilo. Vovisimĩlo viomanu, ovo va sima okuti ka kuli onjila yoku yovuiwa kohali, kekandu kuenda kokufa. Pole, Yehova ka kasi ndomanu ka va kuete unene walua. (Atendelo 23:19) Suku ukuesunga wangiliya onjila yimue yi tu yovola kohali. Onjila yaco yi tukuiwa okuti, ocisembi.

2 Ocisembi ombanjaile yimue ya velapo Yehova a eca komanu. Oyo yi pondola oku tu yovola kekandu kuenda kokufa. (Va Efeso 1:⁠7) Oyo ono yelavoko liomuenyo ko pui, cikale wokilu ale vofeka yelau mulo vongongo. (Luka 23:43; Yoano 3:16; 1 Petulu 1:⁠4) Oco hẽ, ocisembi ci lomboloka nye? Nye ocisembi ci tu longisa, kueci catiamẽla kesunga linene lia Yehova?

Ndomo Kueya Oku Kala Esukila Liocisembi

3. (a) Momo lie kua kalela esukila liocisembi? (b) Momo lie Suku ka pongoluile episo liokufa kuombuto ya Adama?

3 Ocisembi ce yilila omo liekandu lia Adama. Omo okuti Adama ka pokuile ku Suku, eci ceya oku nena ovovei, esumuo, evalo kuenda okufa kuombuto yaye. (Efetikilo 2:17; Va Roma 8:20) Suku ka ecelele okuti ohenda yaye yu vetiya oku pongolola episo liokufa. Nda Yehova wa ci lingile, nda wa lekisa elaviso kocihandeleko caye muẽle, coku popia hati: ‘Onima yekandu okufa.’ (Va Roma 6:23) Nda Yehova wa lavisile olonumbi viatiamẽla kesunga liaye, nda voluali mue yuka ombuanja yalua!

4, 5. (a) Ndamupi Satana a lundila Suku? Kuenda momo lie Suku a vetiyiwila oku tambulula kalundi aco? (b) Satana wa lundila hẽ nye kafendeli va Yehova?

 4 Ndomo tua ci mõla Kocipama 12, esino lia lingiwa vocumbo ce Edene, lia votola apulilo alua a velapo. Satana wa vihĩsa onduko ya Suku. Satana wa lundila Yehova okuti ohembi, haeye ukuakueca ovihandeleko vioku tateka omanu vaye koku lianja. (Efetikilo 3:​1-5) Satana poku nyõla ocipango ca Suku coku yukisa ongongo lomanu vakuesunga, wa eca elomboloko liokuti Suku ka kuete epondolo lioku tẽlisa cimue. (Efetikilo 1:28; Isaya 55:​10, 11) Yehova nda ka ecele etambululo liatiamẽla kalundi a lingiwa ndeti la Satana, omanu valua nda va pua ekolelo kuviali waye.

5 Satana wa lundilavo afendeli va Yehova vakuekolelo okuti ovo va kasi loku vumba Yehova omo liocipululu va kuete, kuenda wa popiavo okuti, lomue omunu o pondola oku pandikisa loku amamako oku kolela ku Suku lalambalalo. (Yovi 1:​9-11) Alundi aco a kuata vali esilivilo, okuti ohali yomanu yi sule. Lesunga lialua, Yehova wa vetiyiwa oku eca atambululo atiamẽla kalundi Satana a linga kokuaye. Oco hẽ, ndamupi Suku a potolola ovitangi viaco, kuenda oku yovola omanu?

Ocisembi Ocina Cimue ca Lisoka

6. Olondaka vipi via tukuiwa Vembimbiliya vioku lombolola onjila ya Suku yoku yovola omanu?

6 Onjila Yehova a nõla yoku potolola ovitangi ya lekisiwa lohenda yalua kuenda esunga liwa, okuti lomue omunu wa simĩle onjila yaco yoku potolola. Onjila yaco, ya kala ocina cimue ca velapo haiyo ya leluka. Onjila yaco ya lomboluiwa volondaka vialua ndeci oku landa, elinaliso, eyovo, oku tuvika ekandu, kuenda oku imũla akandu. (Osamo 49:8; Daniele 9:24; Va Galatia 3:13; Va Kolosai 1:20; Va Heveru 2:17) Pole, ondaka yimue yi lombolola ciwa onjila yaco, yeyi Yesu a tukula poku popia, hati: “ Mõlomanu keyilile oku vumbiwa, te oku vumba, loku eca omuenyo waye [ndocisembi] coku yovola valua.”​—⁠Mateo 20:⁠28.

7, 8. (a) Vembimbiliya ondaka “ocisembi,” yi lomboloka nye? (b) Vonepa yipi vocisembi mua kongela cimue ca lisoka leci cikuavo?

 7 Ocisembi, ci lomboloka nye? Kelimi lia va Helasi ondaka ya tukuiwa ndeti, yitunda kondaka yimue yi lomboloka okuti “oku ecelela, ale oku yovola.” Ondaka yaco yi lomboloka olombongo via fetiwa, poku yovola olomandekua via kuatiwa kuyaki. Omo liaco, ocisembi ci lomboloka ondando yimue ya fetiwa yoku yovola ocina cimue. Vovisonehua via va Heveru, ondaka ‘ocisembi’ (koʹpher ), yopiwa kondaka yimue yi lomboloka okuti, ‘oku sitika.’ Ndeci, Suku wa popele la Noha oco a ‘lañe’ ocimbaluku lekokoto (ondaka oku sitika kuenda oku laña yi kuete elomboloko limuamue). (Efetikilo 6:14) Eci ci tu kuatisa oku kuata elomboloko liokuti ocisembi, ci lombolokavo oku sitika akandu.​—⁠Osamo 65:⁠3.

8 O dicionário yimue yi tukuiwa okuti: elilongiso liatiamẽla katavo, yi lombolola okuti ondaka (koʹpher) “olonjanja viosi yi lomboloka cimue ca lisoka,” ale cimue ci likuata. Ndeci, ocisitiko cocikasia covisila ca kala lutunga umuamue wa lisoka locikasia caco. Cimuamue haico, oco ku yovuiwe, ale ku sitikiwe akandu, ca sukilile oku feta ondando yimue ya lisoka, ale oku sitika ciwa ovitangi via kokiwa omo liekandu. Eli olio esunga ocihandeleko ca Suku ca eciwile ku va Isareli, ca popela hati: ‘Omuenyo lomuenyo, iso liso, eyo leyo, eka leka, omãi lomãi.’​—⁠Esinumuĩlo 19:⁠21.

9. Momo lie omanu vakuekolelo va ecalaile ovilumba viovinyama? Kuenda ndamupi hẽ Yehova a tendaile ovilumba viaco?

9 Omanu vakuekolelo okupisa ku Havele, va enda oku eca ovilumba viovinyama ku Suku. Poku ci linga, va limbuka okuti ovo vakuekandu kuenda va sukilile eyovo, kuenje ovo va kuatela ekolelo kohuminyo ya Suku, vonduko “yo⁠mbu⁠to yaye.” (Efetikilo 3:15; 4:​1-4; Ovisila 17:11; Va Heveru 11:⁠4) Yehova wa solaile calua ovilumba viaco kuenje wa ecele ekalo limue liwa kafendeli vaye. Pole, ovilumba  viovinyama, via kala ño ocindekaise. Ovilumba viaco viovinyama, ka via sitikile akandu osi omanu, momo ovinyama ka via velelepo omanu. (Osamo 8:​4-8) Omo liaco, Embimbiliya li popia okuti: “Osonde yolonui leyi yolohombo ka yi tẽla oku imula akandu.” (Va Heveru 10:​1-4) Ovilumba viaco via kala ño ocindekaise cocilumba ca laikele okuiya.

“Ocisembi Cimue ca Lisoka”

10. (a) Njovoli hẽ nda wa lisokele lelie, kuenda momo lie? (b) Momo lie ca sukililile lika ocilumba comunu umuamue?

10 Upostolo Paulu wa popia hati, “vosi va fila ku Adama.” (1 Va Korindo 15:22) Vocisembi mua sukilile oku kongelamo okufa kuomunu wa lisoka la Adama, okuti omunu umue wa lipua. (Va Roma 5:14) Ka kuakaile ociluliko lacimue okuti nda oco ca lisoka londando yesunga. Te lika omunu umue wa lipua kakandu, una okuti ka kasi vepiso liokufa kua eciwa ku Adama, okuti nda eye eca ‘ocisembi cimue ca lisoka’ lomuenyo wa lipuile wa Adama. (1 Timoteo 2:⁠6) Omo liaco, ka ca sukilile olohuluwa violohuluwa viomanu okuti vi lieca kokufa oco ci tẽle oku yovola ombuto ya Adama. Upostolo Paulu wa lombolola okuti, “ekandu lia iñila voluali lomunu umuamue [Adama] kuenda okufa kueya lekandu.” (Va Roma 5:12) Kuenje “omo okuti okufa ku ka sililiko omo liomunu umuamue,” Suku wa angiliyila eyovo komanu vonduko “yomunu umue.” (1 Va Korindo 15:21) Ndamupi?

“Ocisembi cimue ca lisoka”

11. (a) Ndamupi hẽ Njovoli nda a ‘mahẽla omanu kolofa?’ (b) Momo lie Adama la Heva ka va sumũlũisiwile locisembi? (Tala kombuelo yemẽla.)

11 Yehova wangiliya omunu umue wa lipua kakandu, oco a ece omuenyo waye olumue ndocilumba. Ndomo ca sonehiwa kelivulu lia Va Roma 6:23: Onima’ yekandu ‘okufa.’ Poku eca omuenyo waye, njovoli ‘o mahẽla omanu vosi okufa.’ Volondaka vikuavo, ci lomboloka okuti nda kua fetiwa ondando yakandu a Adama. (Va Heveru 2:9; 2 Va Korindo 5:21; 1 Petulu 2:24) Pole, ocina eci, nda ca tatamisa ovihandeleko. Poku imũla episo liokufa kuomãla va Adama, ocisembi  nda oco ca mãlako unene wono yoku nyõla kuekandu. *​—⁠Va Roma 5:⁠16.

12. Lombolola ndomo oku fetiwa kuofuka yimue ku pondola oku sumũlũisa omanu valua.

12 Kũlĩhĩsa ocindekaise eci: Sokolola ndu okuti watunga volupale mumue okuti omanu vosi va talavaya vonjo yoku panga ovina vimue. Ove lomanu va lisungue love vu fetiwa ciwa kuenda vu kuete omuenyo umue uwa omo ka u kuete ekambo locina cimue, toke eci onjo yaco yi yika apito. Momo lie onjo yaco yi yikila apito? Momo cime cupange waco, wa kala loku ambata omuenyo umue woku sandola olombongo, kuenje eci co kokisa oku yika onjo yaco yupange. Omo liaco, vokatembo kamue katito, ove lu o lisungue love vu pumba upange, kuenda olombongo viofuka yonjo yaco yupange vi fetika oku livokiya. Olonjali, omãla kuenda vana va levalisile olombongo konjo yupange, va tala ohali omo lia cime cupange waco wa sandola olombongo. Oco hẽ, kuli onjila yoku potolola ocitangi caco? Oco, ku kuete! Omunu umue uwa, okuti ohuasi o sokolola oku potolola ocitangi caco. Eye wa kũlĩha esilivilo lionjo yaco yupange. Loku sokolola ocitangi ci kasi pokati ka vana va pumba upange kuenda ocitangi ci kasi pokati kapata avo. Omunu waco ohuasi, o feta olofuka vionjo yupange waco kuenda o yi kula apito onjo yaco. Oku fetiwa kuofuka yonjo yaco yupange, ku kokela esanju kolonalavayi, kapata avo kuenda komanu vana va levalisile olombongo viavo kupange waco. Cimuamue haico okuti, oku fetiwa kuofuka yekandu lia lingiwa la Adama, kua sumũlũisa olohuluwa violohuluwa viomanu.

 Helie Wangiliya Ocisembi?

13, 14. (a) Ndamupi Yehova angiliyila omanu ocisembi? (b) Ocisembi ca fetiwa kulie? Kuenda momo lie ofeto eyi ya sukiliwilile?

13 Yehova eye lika nda wa tẽla oku angiliya o ‘Kameme. . .kopa akandu oluali’. (Yoano 1:29) Pole, Suku ka tumĩle ungelo laumue palo posi oco a yovole omanu. Eye wa tuma Una nda wa tẽla oku eca etambululo lia suapo liatiamẽla kalundi Satana a lingila afendeli va Yehova. Ocili, Suku wa tuma Omõlaye wongunga, una ‘eye a sanjukila vali calua.’ (Olosapo 8:30) Omõla a Suku, wa lieca olumue poku ‘lipesela eye muẽle,’ okuti wa siapo ekalo liomuenyo waye wokilu. (Va Filipoi 2:⁠7) Yehova wa linga ocikomo poku sondoluila omuenyo Womõlaye wongunga wokilu vimo liufeko u Yudea, o tukuiwa okuti, Maria. (Luka 1:​27, 35) Omo okuti eye ulume, wa lukiwa onduko ya Yesu. Pole, konumbi yocihandeleko nda wa lukiwa okuti Adama yavali, momo eye wa lipuile ndeci a Adama a kala. (1 Va Korindo 15:​45, 47) Yesu eye wa pondola oku lieca eye muẽle ndocilumba coku yovola omanu kekandu.

14 Ocisembi nda ca fetiwa ku lie? Elivulu Liosamo 49:​7, li lombolola okuti, ocisembi ci fetiwa lika ku “Suku.” Anga hẽ, Yehova haeyeko wa pongiya ocisembi caco? Ocili okuti eye. Pole eli halioko esunga lioku kapako elinga eli ndepongoloko limue ka li kuete esilivilo, okuti ci kasi ño ndokupa olombongo vonjipẽla yimue loku vi kapa vonjipẽla yikuavo. Tu sukila oku kuata elomboloko liokuti ocisembi ka ci lomboloka epongoloko limue lietimba, pole ocina cimue ca sunguluka. Yehova poku angiliya ofeto yocisembi, okuti ca kala ocina cimue ca tĩla kokuaye wa lekisa esumbilo kesunga liaye lia lipua.​—⁠Efetikilo 22:​7, 8, 11-13; Va Heveru 11:17; Tiago 1:⁠17.

15. Momo lie ca sukililile okuti Yesu o tala ohali kuenda o fa?

15 Kefetikilo liunyamo wo 33 K.K., Yesu Kristu wa lieca eye muẽle koseteko yimue ya tĩla kuenje wa feta ocisembi. Eye, wa lieca koku ambatiwa lalundi esanda, loku sombisiwa ndondingaĩvi kuenda oku valeliwa kuti wepondelo. Anga hẽ ca sukililile muẽle okuti Yesu o talisiwa ohali yalua? Oco. Momo ca sukilile okuti ku potoluiwa ocitangi coku pandikisa kuafendeli  va Suku. Eci ca velapo vali ceci okuti, Suku ka ecelele okuti Herode ipaya Yesu eci a kala handi oñaña. (Mateo 2:​13-18) Pole, eci Yesu a linga ukulu, eye wa kuata epondolo lioku pandikisa kayonjo osi a Satana loku kuata elomboloko lia suapo liovitangi via katuiwa laye . * Omo okuti Yesu wa kala u ‘o kola, ka kuete etondelo, wa lipua, haeye wa tepiwa ku vakuakandu,’ ndaño okuti wa tatiwa lãvi, Eye wa lekisa uvangi wokuti Yehova o kuete muẽle afendeli vana va pondola oku pandikisa lekolelo eci valiyaka loloseteko. (Va Heveru 7:26) Ka ci komohĩsa, eci Yesu poku fa kuaye a kaluka loku popia hati: “Ca maliwa.”​—⁠Yoano 19:⁠30.

Eye o Mãlusula Upange Waye Woku Yovola

16, 17. (a) Ndamupi Yesu amamako loku linga upange waye woku yovola? (b) Momo lie ca sukilile okuti Yesu “o tu molehela kovaso a Suku?”

16 Ca sukilile okuti Yesu o mãlusula upange waye woku yovola omanu. Eci papita oloneke vitatu noke yoku fa kua Yesu, Yehova wo pindula kolofa. (Ovilinga 3:15; 10:40) Poku ci linga, Yehova ka sumũlũisile lika omõlaye omo liekolelo a lekisa kupange waye, pole wa ecavo kokuaye epuluvi lioku mãlusula upange waye woku yovola Ndocitunda Cinene ca Suku. (Va Roma 1:4; 1 Va Korindo 15:​3-8) Upostolo Paulu o lombolola okuti: “Kristu, eci eya wa linga ocitunda cinene. . .kuenje wa iñila olumue vohondo yi kola koku kola. Kambatele osonde yolohombo pamue yolonale, wambata puãi osonde yaye muẽle, kuenje wa sanga eyovo ka li pui. Momo Kristu ka iñilile vocitumãlo ci kola ca tungiwa lovaka, haico ca setahãla eci cocili, puãi wa iñila kilu muẽle, cilo o tu molehela kovaso a Suku.” ​—⁠Va Heveru 9:​11, 12, 24.

 17 Kristu ka endele kilu losonde yaye. (1 Va Korindo 15:50) Pole, eye wambata eci osonde yi lomboloka okuti, esilivilo liocilumba comuenyo waye wa lipua. Noke, Yesu wa lekisa ku Suku esilivilo liomuenyo waco ndocisembi coku yovola omanu kekandu. Anga hẽ Yehova wa tava ocilumba caco? Ocili okuti Yehova wa tava ocilumba caco, kuenje ca limbukiwa ciwa ko Pendekoste yunyamo 33 K.K, eci espiritu sandu lia sukumuiwa kueci ci soka 120 kolondonge va kala vo Yerusalãi. (Ovilinga 2:​1-4) Ndaño okuti ocina caco ca kala cimue ci komohĩsa, pole, ocisembi ca kala ño efetikilo lioku angiliya asumũlũho ocili.

Asumũlũho Ocisembi

18, 19. (a) Ovimunga vipi vivali viomanu, via sumũlũisiwa poku tokekisiwa lekuatiso liosonde ya Kristu? (b) Komanu vana okuti “owiñi wakahandangala,” asumũlũho api ocisembi ovo va tambula cilo, kuenda kotembo yokovaso?

18 Upostolo Paulu, poku sonehela vamanji va Kolosai, wa lombolola okuti Suku wa panga okuti vu Kristu mu tokekiwa ovina viosi loku lisunguluisila vosonde yina Yesu a pesila kuti. Upostolo Paulu, wa lombololavo okuti voku litokeka kuaco, mua kongela ovimunga vivali via litepa viomanu vi tukuiwa okuti, “ovina viokilu,” levi “vioposi.” (Va Kolosai 1:​19, 20; Va Efeso 1:10) Ocimunga catete, ci kuete etendelo limue lisoka 144.000 ka Kristão vana va kuete elavoko lioku kala ndovitunda kilu haivo vaka viala ndolosoma Kusoma wa Suku la Yesu, poku songuila ovina palo posi. (Esituluilo 5:​9, 10; 7:4; 14:​1-3) Vonduko yavo, asumũlũho ocisembi aka eciwa komanu vana vaka pokola vokuenda kuohũlũkãi yanyamo.​—⁠1 Va Korindo 15:​24-26; Esituluilo 20:6; 21:​3, 4.

19 “Ovina vio posi,” omanu vana va lavoka oku kuata omuenyo wa lipua voluali luokaliye. Kelivulu Liesituluilo 7:​9-17, ku lombolola okuti omanu vaco “owiñi wakahandangala,” una uka puluka “kohali ya piãla.” Pole, ovo ka va sukila oku kevelela toke kotembo yaco oco va tambule asumũlũho a tunda kocisembi. Omanu vaco ‘va sukula ale olonanga viavo kuenda  va vi yelisila vosonde ya Kameme.’ Omo okuti ovo va lekisa ekolelo kocisembi, cilo ovo va kasi loku tambula asumũlũho a tunda keliangiliyo liaco liocisola. Ovo va siata oku tendiwa nda va kuesunga haivo akamba va Suku! (Tiago 2:23) Onima yocilumba ca Yesu yeyi okuti, ovo va pondola ‘oku kokela lutõi kocalo cocali, okuti va mõla ohenda.’ (Va Heveru 4:​14-16) Eci ovo va lueya, va tambula ongecelo yakandu. (Va Efeso 1:⁠7) Ndaño okuti ovo ka va lipuile, pole va kuete utima wa yela. (Va Heveru 9:9; 10:22; 1 Petulu 3:21) Oku litokeka la Suku hacina cimueko ci keya kovaso, pole ocina cimue okuti ci tẽliwa kotembo yilo! (2 Va Korindo 5:​19, 20) Vokuenda kuohũlũkãi yanyamo, ovo ‘vaka panduluiwa kupika wenyõleho’ kuenje noke ‘vaka mõla eyovo liulamba womãla va Suku.’ ​—⁠Va Roma 8:⁠21.

20. Oku sokolola kocisembi ndamupi ci pondola oku ku vetiya?

20 Vonduko ya Yesu Kristu tu pandula ku Suku’ omo lioku tu pongiyila ocisembi! (Va Roma 7:25) Ocisembi ci molẽha ndocina cimue ca leluka, pole ci komohĩsa calua. (Va Roma 11:33) Kuenje, poku sokolola ocisembi lonjongole yocili, cika vetiya utima wetu oco tu kuate ukamba wocili la Suku ukuesunga. Ndomo ca popiwa Lukualosamo, letuvo tu kuete esunga lioku sivaya Yehova una ‘O sole esunga locili.’ ​—⁠Osamo 33:⁠5.

^ tini. 11 Adama la Heva ka va sumũlũisiwile locisembi. Ocihandeleko ca Mose ca lomboluile olonumbi viatiamẽla komunu una okuti omondi hati: “Ka ci tava oku tambula ocimuenyo coku yovola omondi ya pia londaka yoku ponda, ipaiwa muẽle.” (Atendelo 35:31) Ocili okuti, Adama la Heva va sesamẽlele okufa, momo ovo locipango va linga ekandu ku Suku. Lonjila ndoyo, ovo va pumba elavoko lioku kuata omuenyo ko pui.

^ tini. 15 Oco ocisembi ci lisoke lekandu lia Adama, ka ca sukilile okuti Yesu o fa ndomõla, pole o fa ndukulu wa lipua. Ivaluka okuti Adama wa linga ekandu kocipango, momo eye wa kũlĩhĩle ohali kuenda ovitangi vi yilila kekandu liaco. Handi vali, oco Yesu a kale “Adama wa sulako,” loku tuvika akandu, wa sukilile oku nõla ciwa onjila ya sunguluka oco amameko loku pandikisa ku Yehova. (1 Va Korindo 15:​45, 47) Omo liaco ekolelo lia Yesu oku kongelamo ocilumba caye coku lieca kolofa, ca lekisa ‘elinga limue liesunga.’​—⁠Va Roma 5:​18, 19.