Skip to content

Skip to table of contents

Olombangi Via Yehova

Select language Umbundu

 OCIPAMA 2

Can You Really “Draw Close to God”?

Can You Really “Draw Close to God”?

1, 2. (a) Nye okuti oco vamue va tenda ndonjoi, pole evetiyo lipi tu sanga Vembimbiliya? (b) Avirahama wa sumũlũisiwilue lukamba upi, kuenda momo lie?

CATIAMẼLA kokuove nda wa liyeva hẽ ndamupi nda Ululiki wilu losi wa popele okuti “U ekamba liange?” Kua valua eci ci tendiwa ndonjoi. Oco hẽ, ndamupi ci tava okuti omunu umue waño o kuata ukamba la Yehova Suku? Embimbiliya li tu sapuila okuti etu tu pondola ocili oku kuata ukamba la Suku.

2 Avirahama, wo kotembo ya pita, eye umue wa sanjukile lukamba waco. Yehova wa nõla onjali eyi yepata “ndekamba liaye.” (Isaya 41:⁠8) Ocili okuti, Yehova wa tendele Avirahama ndekamba limue liocili. Kuenje Avirahama wa sumũlũisiwilue lukamba waco, omo okuti eye ‘wa kolelele Yehova.’ (Tiago 2:23) Koloneke vilo haicovo okuti, Yehova o sandiliya epuluvi ‘lioku lisola’ la vana vo vumba omo liocisola. (Esinumuĩlo 10:15) Ondaka yaye yi tu vetiya okuti: “Ameli ku Suku kuenje eye amela kokuene.” (Tiago 4:⁠8) Volondaka evi etu tu sangamo elaleko kuenda ohuminyo.

3. Elaleko lipi Yehova a tu linga, kuenda ohuminyo yipi yi litava lelaleko eli?

3 Yehova o tu laleka oku amẽla kokuaye. Eye locipango wa likapelako oku tu tava ndakamba vaye. Kuenje konepa eyi, eye o likuminya okuti nda etu tua eca alianga a sukiliwa, eye oka ci lingavo, okuti oka amẽla kokuetu. Omo liaco, etu tu pondola oku kuata ocina cimue ci silivila, okuti ‘ukamba la Yehova.’ * (Osa. 25:14) Ondaka “ukamba,”  yeca elomboloko lioku vangula pokolika lekamba limue li likasi. 

4. Ndamupi ove nda wa lombolola ekamba limue lio ponipa? Oco hẽ, lonjila yipi Yehova a lekisa okuti eye ekamba limue liocili ku vana va amẽla kokuaye?

4 Ove hẽ, o kuete ekamba limue lio ponipa lina ove o pondola oku kolela? Ekamba limue lia soka ndeli, lia ku kapako. Ove o pondola oku kolela ko kuaye, momo eye wa siata oku kala ukuacili. Oku livala ukamba laye cu ku ĩha vali esanju. Nda wa sumua okuti o yongola oku situlula eci ci kasi kutima wove, eye oku yevelela locikembe. Ndaño okuti layumue o limbuka esakalalo liove, eye oku yevelela lepandi. Cimuamue haico okuti, eci tu amẽla ku Suku, tu kuata Ekamba limue li likasi okuti li tu kapako, kuenda li limbuka esakalalo lietu haeye wa tu lomboloka. (Osamo 103:14; 1 Petulu 5:⁠7) Tu pondola oku kuatela ekolelo lialua kokuaye, poku kũlĩha okuti Suku ukuacili lava okuti vakuacilivo. (Osamo 18:25) Omo liaco, esumũlũho liaco lioku kuata ukamba la Suku, li kasi lika peka lietu omo okuti eye wa panga okuti ci tẽliwa.

Yehova wa Siata Oku Yulula Onjila

5. Nye Yehova a linga oco ci tu leluise oku kuata ukamba laye?

5 Etu tua kuakandu, nda ka ca kaile lekuatiso lia Suku nda ka tua tẽlele oku kala ekamba liaye. (Osamo 5:⁠4) Upostolo Paulu wa soneha hati: “Puãi Suku wa tu muisa ocisola caye okuti, osimbu tua kala vakuakandu oco Kristu a tu fila.” (Va Roma 5:⁠8) Ocili, Yehova wa angiliya Yesu ‘oco a ece omuenyo waye ndocimuenyo coku yovola omanu valua.’ (Mateo 20:28) Etu oku kuatela ekolelo lietu kocilumba eci cocisembi ci tu kuatisa oku amẽla ku Suku. Omo okuti Suku eye wa ‘tu sola tete,’ eye wa yulula onjila yoku kuata ukamba umue laye.​—⁠1 Yoano 4:⁠19.

6, 7. (a) Ndamupi tua kũlĩha okuti Yehova ha Suku yimueko ka ya kũlĩhĩwilue okuti wa liseleka? (b) Lonjila yipi eye muẽle Yehova a lisituluila kokuetu?

6 Yehova wa linga elianga likuavo: Eye wa lisituluila  kokuetu. Etu tu pondola lika oku kuata ukamba lomunu umue nda tua kũlĩha muẽle ciwa omunu waco, loku kapako ovituwa viaye kuenda ekalo liaye. Omo liaco, nda okuti Yehova wa kaile o Suku yimue ka ya kũlĩhĩwile okuti wa liseleka, nda ka tua tẽlele oku amẽla kokuaye. Suku omo okuti ka liselekele, eye o yongola okuti tu u kũlĩha ciwa. (Isaya 45:19) Handi vali, kueci catiamẽla koku lisitulula kuaye ndomo eye a tuwa, ku kasi kovaso omanu vosi ndaño muẽle ku vana okuti voluali va sokisiwa ndava va sulemo.​—⁠Mateo11:⁠25.

Yehova wa siata oku lisituluila eye muẽle pokati kupange wovina viaye via lulikiwa kuenda Kondaka yaye ya sonehiwa

7 Ndamupi Yehova a pondola oku lisituluila kokuetu? Ovina eye a lulika ovio vi lekisa emolẽho liokutuwa kuaye, unene waye, olondunge viaye kuenda ocisola caye ka ci sokisiwa. (Va Roma 1:20) Pole Yehova ka lisituluila ño pokati kovina a lulika. Omo okuti eye Wavelapo Kokusapela, wa angiliya ocisonehua cimue coku lisituluila eye muẽle okuti Ondaka yaye, Embimbiliya.

Limbuka “Unu wa Yehova”

8. Momo lie ku popiwila okuti Embimbiliya olio ocindekaise cocisola Yehova a tu kuetele?

8 Embimbiliya olio ocindekaise cocisola Yehova a tu kuetele. Vondaka yaye, eye o lisitulula eye muẽle volondaka vimue vi tu lomboloka, cimue ci lekisa okuti eye o tu sole, pole o yongola okuti etu tu u kũlĩha kuenda tu u solavo. Eci tu tanga velivulu eli, ci tu kuatisa oku limbuka ‘unu wa Yehova’ kuenda ci vetiya oku amẽla kokuaye. (Osamo 90:17) Tu kũlĩhĩsi olonepa vimue evi Yehova a lisitulula eye muẽle Vondaka yaye.

9. Olondaka vipi via tukuiwa Vembimbiliya vi lekisa ovituwa via Suku?

9 Embimbiliya li kuete asapulo alua asuñama a lekisa ovituwa via Suku. Tala vimue pokati kavio. ‘‘Yehova o sole esunga.’’ (Osamo 37:28) ‘Suku unene waye wa pitahãla.’ (Yovi 37:23)  ‘Ndukuacili, oco ca popia Yehova.’ (Yeremiya 3:12) ‘‘Eye wa lunguka vutima.’’ (Yovi 9:⁠4) Eye ‘Suku yohenda, ukuakulivala konyeño, ukuacisola calua haeye ukuacili.’  (Etundilo 34:⁠6) “Momo ove, a Yehova, wa sunguluka haive wukuakuecela.” (Osamo 86:⁠5) Ndomo ca lekisiwa ale kovipama viatete, ocituwa cimue ca velapo vali ceci: “Suku eye ocisola” (1 Yoano 4:⁠8) Ove poku sokolola kovituwa evi viwa ndeti, ka cu ku vetiya hẽ oku amẽla ku Suku u ka sokisiwa ndeti?

Embimbiliya li tu kuatisa oku amẽla ku Yehova

10, 11. (a) Oco tu kuate elomboloko liwa liemolẽho liocituwa ca Yehova, nye a kongela Vondaka yaye? (b) Nye Embimbiliya litusapuila okuti ci tu kuatisa oku limbuka unene wa Suku?

10 Yehova ka tu situluila lika ovituwa viaye, pole eye locisola Vondaka yaye wa situluilamovo ovindekaise viñi viñi vi lekisa ndomo ovituwa viaco vi kapiwako. Asapulo aco a sangiwa Vembimbiliya, o-o a tu kuatisa oku kuata ciwa elomboloko liemolẽho liokutuwa kua Suku oco tu amẽle vali ciwa kokuaye. Tala ocindekaise cimue.

11 Ocina cimue oku tanga okuti Suku ‘‘unene waye wa piãla.’’ (Isaya 40:26) Cikuavo oku tanga ndomo eye a yovola va Isareli Vokalunga Kakusuka, kuenda ndomo a va tekula vekalasoko vokuenda kueci ci soka 40 kanyamo. Handi vali, sokolola ndomo akimba ovava a litepa pokati. Seteka oku sokolola ndomo epata lia Isareli li soka 3.000.000 komanu va endela posi yakukuta, okuti ovava a litepa volomunda vivali vinene, nẽle la nẽle. (Etundilo 14:21; 15:8 ) Ove o pondola oku sokolola ndomo Suku a va tata vekalasoko, ndomo eye a linga eliangiliyo liokuti vesenje mu tunda ovava, kuenda oku lokisa kilu lieve okulia kumue kuamolehẽle ndombuto yi yela. (Etundilo 16:31; Atendelo 20:11) Yehova ka lisituluile ño okuti o kuete unene, pole lunene waco eye wa siatavo  oku kuatisa lawo omanu vaye. Ka ci tu kuatisa hẽ oku kũlĩha okuti olohutililo vietu vienda ku Suku umue ukuonene okuti ‘‘eye ocikolo cetu haeye ongusu yetu, oñuatisi, okuti kohali o moleha lombili?’’​—⁠Osamo 46:⁠1.

12. Ndamupi Yehova a tu kuatisa oku “u limbuka” volondaka vimue okuti tu pondola oku sanga elomboloko?

12 Yehova okuti espiritu, wa linga vali calua oco a tu kuatise oku u kũlĩha. Omo okuti etu tumanu tu mõla lika cina ci letiwe lovaso, ka tu pondola oku mõla eci ci kasi vespiritu. Nda Suku poku lomboluila eci catiamẽla kokuaye muẽle wa lomboluile olondaka viespiritu, nda ca kala ndoku lomboluila komunu una wa citiwa omeke, oku u sapuila ekalo lietimba lietu, evala liovaso kuenda lietimba lietu. Omo liaco, Yehova lohenda yalua o tu kuatisa oku “u limbuka” volondaka vimue okuti tu pondola oku sanga elomboloko. Olonjanja vimue, eye o lisetahãisa loku lisokisa lovina tua kũlĩha. Toke muẽle eye o lilombolola nda umue o kuete ovituwa viomanu. *

13. Eci tu tanga Isaya 40:​11, nye ciya kutima wetu, kuenda ndamupi eci cu ku kuatisa?

13 Kũlĩhĩsa elomboluilo lia Yehova li sangiwa kelivulu lia Isaya 40:11: “O lisa ocunda caye ndungombo, ongolola otumeme vovoko aye, o tu ambatela ponete.” Vocinimbu eci, Yehova o sokisiwa ndungombo umue ongotiya olomeme “lovoko aye.” Eci ci lekisa okuti Yehova o kuete epondolo lioku teyuila kuenda oku kuatisa omanu vaye, ndaño muẽle vana va lavisiwa. Omo liaco, tu pondola oku kolapo povaka aye a pama, kuenda nda tu u kolela lalimue eteke aka tu yanduluka. (Va Roma 8:​38, 39) Ungombo Wavelapo ambatela olomeme  “viaye ponete,” ndomo ungombo angayataile omeme ya citiwa ndopo okuti o yi muñila konepa yuwalo waye wa supa kapepe. Eci ci lekisa okuti Yehova o tu sole kuenda o tu tata ciwa. Omo liaco, ca sunguluka oku amẽla kokuaye.

‘Omõla wa Likapelako Oku u Situlula’

14. Momo lie ku popiwila okuti Yehova ecela esituluilo liaye muẽle liwa vonduko ya Yesu?

14 Yehova Vondaka yaye, o lisitulula vali ciwa catiamẽla kokuaye vonduko ya Yesu, Omõlaye wa soliwa. Lomue nda wa tẽla oku situlula vali ciwa okutuwa kuocisimĩlo ca Suku kuenda ocikembe caye, ale oku U lombolola vali ciwa okuti Yesu ci sule. Omõla u ndeti Uveli, wa kala ale la Isiaye eci handi ovilulikilo vikuavo viespiritu kuenda oluali lovina vi letiwe lovaso ka via lulikiwile. (Va Kolosai 1:15 ) Yesu wa kũlĩhĩle ciwa Yehova. Eli olio esunga lieci eye a popela hati: “Lomue wa kũlĩha Omõla te Isiaco, kuenje lomue wa kũlĩha Isia, te Omõlaco, kuenda u Omõlaco a panga oku u situluila.” (Luka  10:22) Yesu eci a kala palo posi ndomunu ukuetimba liositu, wa situlula Isiaye volonepa vivali via velapo.

15, 16. Volonjila vipi vivali Yesu a situlula eci catiamẽla ku Isiaye?

15 Catete, alongiso a Yesu a tu kuatisa oku kũlĩha Isiaye. Yesu wa situlula Yehova volondaka vimue vi veta kovitima vietu. Handi vali, oco a lombolole okuti Suku ukuahenda kuenda o tambula ava va likekembela, Yesu wa sokisa Yehova ndonjali yimue yukuakuecela okuti eci a mõla omõlaye ocisandui oku tiuka konjo o sanjuka, u lupukila loku u yolela kuenda oku u sipula. ( Luka 15:​11-24) Yesu wa lombolola okuti Yehova, o Suku yimue “yi kokela” kokuaye omanu vakuesunga momo eye o sole omunu lomunu. (Yoano 6:44) Eye toke muẽle wa kũlĩha eci ongungu yitito yi kupukila posi. Kuenje Yesu poku ci lombolola wa popia hati: “Ko ka kuati ohele, momo wa velipo olongungu vialua” (Mateo 10:​29, 31) Omo liaco, ka tu kasipo oku amẽla ku Suku umue ukuacisola calua.

16 Cavali, ongangu ya Yesu yi tu lekisa ndomo Suku a tuwa. Yesu wa sitululavo ciwa Isiaye, kuenje wa popia hati: ‘U wa siata oku ndi mola ame haeye wa siatavo oku mola Isia.’ (Yoano 14:⁠9) Eci tu tanga Kavangeliu catiamẽla ku Yesu, ocikembe eye a lekisa kuenda ndomo a tata omanu, ci tu kuatisa oku limbuka ciwa ndomo Isiaye a tuwa. Yehova nda ka tẽlele oku tu ĩha esituluilo limue lia lelukapo vali liovituwa viaye okuti eli li sule. Momo lie?

17. Lombolola eci Yehova a linga oco ci tu kuatise kelomboloko ndomo eye a tuwa.

17 Ndoku ci setahãisa: Sokolola oku lombolola eci ci lomboloka ohenda. Ove o pondola oku yi lombolola volondaka. Pole, ove nda wa ilikile umue o kasi loku tẽlisa elinga liaco “liohenda” loku popia hati: “Eyi oyo yi lomboloka ongangu yohenda,” ondaka yaco nda ya kuata vali elomboloko lia leluka. Yehova oco a tu kuatise oku kuata elomboloko ndomo eye a tuwa, cimuamue haico a linga. Eye ka lisituluile ño volondaka, pole, wa tu ci lekisila Vomõlaye. Mu Yesu, ovituwa via Suku vi muĩwila vovilinga. Pokati Kavanjeliu alombolola  ovolandu atiamẽla ku Yesu, Yehova o kasi loku popia hati: “Eci oco ame nda tuwa.” Ndamupi ovisonehua vi lombolola Yesu eci a kala palo posi?

18. Ndamupi Yesu a lekisa ovituwa ndeci unene, esunga, kuenda olondunge?

18 Yesu wa lekisa ciwa ovituwa vikuãla via velapo via Suku. Eye wa kuata unene woku mãlako ovovei, onjala kuenda okufa. Yesu ka lisokele lomanu vakuacipululu vana va lavisa unene wavo, momo eye lalimue eteke a lekisile unene waye oco a tẽlise olonjongole viaye muẽle, ale oco a sumuise vakuavo. (Mateo 4:​2-4) Eye wa solaile esunga. Eye wa tẽmelele vakuakulandisila vonembele haivo va nyanela omanu vondando ka ya sungulukile. (Mateo 21:​12, 13) Eye ka tatele olohukũi kuenda vakuahali locame, pole, wa va kuatisa ‘oco va sange ekavuluko’ katimba avo. (Mateo 11:​4, 5, 28-30) Olondunge via Yesu koku longisa kuaye via velelepo vali okuti via ‘Salomone ci sule.’ (Mateo 12:42) Pole, Yesu lalimue eteke a lipandele lolondunge viaye. Olondaka viaye via vetiya ovitima viomanu vosi, momo elongiso liaye lia sungulukile hailio lia lelukile oku likapako.

19, 20. (a) Lonjila yipi Yesu a linga ongangu ya velapo yocisola? (b) Poku tanga kuenda oku sokolola kongangu ya Yesu, nye tu kuete oku limbuka?

19 Yesu eye ongangu yimue ya velapo yocisola. Vokuenda kupange waye woku kunda wa lekisila ocisola volonepa vialua, oku kongelamo ocikembe lohenda. Poku mõla ohali yomanu, Yesu lalimue eteke a silepo oku va kuatela ohenda. Olonjanja vialua ocikembe caye co vetiya oku ci lekisila vovilinga. (Mateo 14:14) Ndaño okuti eye wa sakula olombei kuenda wa tekula ava va kala onjala, Yesu wa lekisa ohenda lonjila yimue ya velapo vali. Eye wa kuatisa omanu oku kũlĩha ocili, oku ci tava, kuenda oku sola ocili Cusoma waco wa Suku, una uka nena asumũlũho komanu. (Marko 6:34; Luka 4:43) Ca piãla vali enene ceci okuti, Yesu wa lekisa ocisola lutima wosi poku pesela omuenyo waye ndocilumba coku yovola omanu.​—⁠Yoano 15:13.

 20 Anga hẽ ci komohĩsa omanu vakuotunga wosi kuenda vakuavisoko viosi oku amẽla komunu u ndeti, ukuokamba haeye ukuacikembe calua? (Marko 10:​13-16) Omo liaco, eci tu tanga kuenda oku sokolola eci catiamẽla kongangu ya Yesu, ci tu ĩhe elomboloko lioku limbuka okuti Vomõla u ndeti omo tu letele ocinyi ca Isiaye.​—⁠Va Heveru 1:⁠3.

Elivulu Limue li tu Kuatisa

21, 22. Voku sanda Yehova mua kongela nye, kuenda elivulu lilo li tu lomboluila hẽ nye okuti ci tu kuatisa kelikolisilo liaco?

21 Yehova poku lisituluila eye muẽle Vondaka yaye, ka kuli atatahãi okuti eye o yongola okuti tuamẽla kokuaye. Pole, eye ka tu silĩha oku sanda ukamba umue uwa woku taviwa laye. Omo liaco, ci kasi vocikele cetu oku sanda Yehova ‘osimbu a sangiwa.’ (Isaya 55:⁠6) Voku sanda kuaco Yehova mua kongela oku kũlĩha ovituwa viaye, kuenda ovilinga viaye ndomo ca situluiwa Vembimbiliya. Elivulu lilo o kasi loku tanga ndeti lia pangiwila oku ku kuatisa konepa eyi.

22 Ove oka limbuka okuti elivulu lilo lia tepisiwa volonepa vi litava lovituwa vikuãla via Yehova ndeci: unene, esunga, olondunge kuenda ocisola. Onepa lonepa yi fetika loku teta onimbu oku lombolola ocituwa locituwa. Ovipama  vikuãi vonepa eyi vi lombolola ndomo Yehova a lekisa ocituwa locituwa volonepa viñi viñi. Vonepa lonepa mu sangiwavo ocipama cimue ci lombolola ndomo Yesu a lekisa ongangu yocituwa caco, kuenda ocipama cimue ci lekisa ndomo etu tu pondola oku kapako ocituwa caco komuenyo wetu.

23, 24. (a) Lombolola onepa yimue yi likasi okuti “Apulilo Okusokolola.” (b) Ndamupi okusokolola ku tu kuatisa oku amẽla vali ciwa ku Suku?

23 Poku fetika locipama cilo, kuli onepa yimue yi likasi yi lekisa “Apulilo Oku Sokolola.” Ndocindekaise, kũlĩhĩsa vokuadru kemẽla 24. Ovipama Viembimbiliya kuenda apulilo a kasiko, ka via pongiyiwilile oco vi linge ndepituluilo liovipama. Pole, ocimãho cavio oku ku kuatisa oku sokolola olonepa vikuavo via velapo viulandu. Ndamupi o pondola oku kuama onepa eyi? Vanja ovipama viosi Viembimbiliya via tukuiwa kuenje vi tanga ciwa lutate. Noke, seteka oku tambulula epulilo li kuama ketukulo liocipama Cembimbiliya. Sokolola katambululo. Ci tava okuti o linga ekonomuiso. Lipulisa ove muẽle ndoco: ‘Ulandu owu u ndi sapuila nye catiamẽla ku Yehova? U veta hẽ ndati komuenyo wange? Ndamupi ndi pondola oku kuatisa lawo vakuetu?’

24 Oku sokolola kuaco, ku tu kuatisa vali ciwa oku amẽla ku Yehova. Momo lie? Embimbiliya litokekisa oku sokolola lutima. (Osamo 19:14) Eci tu sokolola lombili yalua eci tua lilongisa catiamẽla ku Suku, asapulo aco a iñila ciwa vutima wetu, muna mu lingiwila upange wovisimĩlo vietu woku vetiya ocikembe cetu haimo mu vetiyavo oku linga cimue ci yonguiwa. Ocisola cetu ku Suku ci pama, kuenda ocisola caco eci ci tu vetiya oku sanjuisa Yehova Ndekamba lietu lisoliwe calua. (1 Yoano 5:⁠3) Oco tu kuate ukamba waco, tu sukila oku kũlĩha ovituwa via Yehova kuenda oku tuwa kuaye. Omo liaco, tete tu kũlĩhĩsi onepa yimue yekalo lia Suku okuti okukola kuaye kuna ku tu kuatisa oku amẽla vali ciwa kokuaye.

^ tini. 3 Ci sanjuisa calua omo okuti ondaka yo Heveru ya pongoluiwa okuti “ukamba” yi sangiwavo kelivulu lia Amosi 3:​7, ku popia okuti Ñala Yehova o situluila ‘ocisimĩlo caye’ kovakuenje vaye, poku va sapuila tete eci a yongola oku linga.

^ tini. 12 Embimbiliya li tukula ocipala, ovaso, ovatũi, anyulu, omẽla, ovoko, kuenda olomãhi via Suku. (Osamo 18:15; 27:8; 44:3; Isaya 60:13; Mateo 4:4; 1 Petulu 3:12) Olondaka viaco viocindekaise koku lombolola Yehova okuti “Handa” ale “Ombindikiyo,” ka ci tava okuti vi kuata elomboloko liocina cimue ci letiwe.​—⁠Esinumuĩlo 32:4; Osamo 84:11.