Skip to content

Skip to table of contents

Olombangi Via Yehova

Select language Umbundu

 ALOMBOLUILO A VOKIYIWAKO

Onjembo Nye?

Onjembo Nye?

ONDAKA onjembo okuti kelimi lio Heveru yi tukuiwa hati Seol kuenda kelimi lio Helasi Hades, yi sangiwa eci ci pitãhala 70 kolonjanja Vembimbiliya. Olondaka viaco vi lomboloka oku fa. Ambimbiliya amue a pongolola olondaka evi hati, “eyambo,” “ifelu,” ale “ocitunu.” Alimi alua ka a kuete olondaka vi eca elomboloko liwa liolondaka evi ndomo via sonehiwa kelimi lio Heveru lo Helasi. Embimbiliya li tukuiwa hati, Tradução do Novo Mundo lipongolola olondaka evi hati, “Seol” kuenda “Hades.” Oco hẽ olondaka viaco vi lomboloka nye? Tu konomuisi ndomo olondaka viaco via sonehiwa vovinimbu vimue Viembimbiliya.

Kelivulu Liukundi 9:10, tu tangako hati: “Cosi eka liove lia kuata ci linga longusu yove; momo vonjembo [Seol] omo wenda ka muli upange, ndaño ovikuata, ndaño ukũlĩhiso, ndaño olondunge.” Eci ci lomboloka hẽ okuti onjembo (Seol), eyambo lina mua siata oku kendiwa omunu lomunu? Sio. Kelimi lio Heveru lo Helasi, eyambo ka li tukuiwa hati Seol ale Hades, li tukuiwa volondaka vimue viñi. (Efetikilo 23:7-9; Mateo 28:1) Embimbiliya ka li tukula Onjembo (Seol) oku yi tiamisila komanu valua va kendiwa veyambo limosi, ndeci veyambo liepata.—Efetikilo 49:30, 31.

Oco hẽ ondaka onjembo (Seol ) yi lomboloka nye? Embimbiliya li lekisa okuti ondaka onjembo (Seol ale Hades) yatiamẽla kocina cimue ca velapo vali okuti eyambo mua siata oku kendiwa omanu li sule. Kelivulu lia Isaya 5:14 tu sangako olondaka via linga hati, “Njembo (Seol) wa luisa onjongole yaye, wasama enene omẽla waye.” Ndaño okuti Onjembo yambata ale omanu valua, lopo ka ya tẽlele. Oyo handi yi yongola vali. (Olosapo 30:15, 16) Eyambo lina mua siata oku kendiwa omanu, mu tava ño oku kendamo ovivimbi via soka loku tanda kueyambo liaco. Pole, ‘Onjembo [Seol] lokalunga lalimue eteke vi tẽla.’ (Olosapo 27:20) Onjembo lalimue eteke yi yuka. Ka yi kuete ongave. Eci ci lekisa  okuti Onjembo (Seol) hacitumãloko cimue ci letiwe. Puãi ci lomboloka ekalo liava va fa.

Elongiso Liembimbiliya liatiamẽla kepinduko, li tu kuatisa oku kuata elomboloko lieci ondaka Onjembo (Seol) yi lomboloka. Embimbiliya li tiamisila ondaka Onjembo (Seol ale Hades) koku fa kuna okuti omunu o kuete elavoko lioku pinduka. * (Yovi 14:13; Ovilinga 2:31; Esituluilo 20:13) Embimbiliya li lekisavo okuti ava va kasi Vonjembo ha vanako lika okuti eci va kala komuenyo va vumba Yehova. Pole, mua kongelavo vana okuti ka vo vumbile. (Efetikilo 37:35; Osamo 55:15) Omo liaco, Embimbiliya li longisa okuti ku ka kala “epinduko lia vakuesunga lava havakuesungako.”—Ovilinga 24:15.

^ tini. 6 Pole omanu vana okuti ka vaka pinduiwa, ka va tukuiwa okuti va kasi Vonjembo. Puãi va tukuiwa okuti va kasi ‘Vongehena.’ (Mateo 5:30; 10:28; 23:33) Ndeci Onjembo, Ongehena layovo hacitumãloko cimue ci letiwe.