Skip to content

Skip to table of contents

Olombangi Via Yehova

Select language Umbundu

 OCIPAMA 56

Yosiya wa Solele Ovihandeleko Via Suku

Yosiya wa Solele Ovihandeleko Via Suku

Yosiya wa linga osoma yo Yuda eci a kuata anyamo ecelãla. Koloneke viaco, omanu va kala vakuakutãha kuenda va enda oku fendela oviteka. Eci Yosiya a tẽlisa 16 kanyamo, wa fetika oku lilongisa ndomo a fendela Yehova lonjila yimue ya sunguluka. Eci a tẽlisa 20 kanyamo wa fetika oku nyõla oviteka kuenda ovotala vofeka yosi. Kuenje eci a tẽlisa 26 kanyamo wa linga esokiyo lioku semulula onembele ya Yehova.

Vonembele ocitunda cinene Hilikiya wa sangamo ociña covihandeleko via Yehova, citava okuti ociña Mose a sonehele. Usonehi wa soma o tukuiwa hati, Siafane wa nena ociña caco ku Yosiya kuenje wa fetika oku tanga Ocihandeleko lolukandi. Eci Yosiya a yeva olondaka viaco, wa limbuka okuti omanu va sinila Yehova vokuenda kuanyamo alua. Soma Yosiya wa sapuila Hilikiya hati: ‘Yehova wa tema calua letu. Tuendi, tu ka vanguli laye. Yehova o tu sapuila eci tu sukila oku linga.’ Kuenje Yehova wa tambulula pocakati cuprofeto Hulida hati: ‘Omanu vo ko Yuda va njanduluka. Ovo va ka yambuiwa, pole, si ci lingi osimbu Yosiya a kasi osoma, momo eye wa liketisa.’

Eci soma Yosiya a yeva esapulo liaco, wa enda konembele kuenje wongolola omanu vo ko Yuda. Kuenje wa tangela omanu vosi lolukandi Ocihandeleko ca Yehova. Yosiya kuenda omanu va likuminya oku pokola ku Yehova lutima wavo wosi.

 Omanu vo ko Yuda ka va lingaile ocipito co Paskoa vokuenda kuanyamo alua. Pole, eci Yosiya a tanga Vocihandeleko okuti ocipito co Paskoa ci sukila oku lingiwa unyamo lunyamo, wa sapuila omanu hati: ‘Tu lingila Yehova ocipito cimue co Paskoa.’ Noke Yosiya wa pongiya ovilumba vialua kuenda wa sokiya okuti, ku kala olonjimbi vimue vonembele. Kuenje omanu va linga Ocipito co Paskoa kuenda noke va linga Ocipito Colombolo ka vi Kuete Etumbisa vokuenda kuoloneke epanduvali. Tunde koloneke via Samuele ka kua la kala ocipito cimue ndeci. Ocili okuti, Yosiya wa solele Ocihandeleko ca Suku. Ove hẽ wa siata oku sanjuka eci o lilongisa ovina viatiamẽla ku Yehova?

“Ondaka yove oyo ondiyelo yomãhi yange, haiyo ocinyi co konjila yange.” —Osamo 119:105