Skip to content

Skip to table of contents

Olombangi Via Yehova

Select language Umbundu

 OCIPAMA 43

Ekandu Lia Soma Daviti

Ekandu Lia Soma Daviti

Eci Saulu a fa Daviti wa linga osoma. Eye wa kuata eci ci soka 30 kanyamo. Noke yanyamo amue tunde eci a linga osoma, koñolosi osimbu a kala kosapalalo lielombe liaye, wa mola ukãi umue wa posoka calua. Daviti wa yeva okuti onduko yukãi waco Batisieva kuenda wa kuelele ulume umue esualali o tukuiwa hati, Uriya. Kuenje wa tuma oco Batisieva eye kelombe liaye. Daviti wa pekela laye kuenje Batisieva wemina. Noke Daviti wa seteka oku limbika eci a linga. Eye wa sapuila kesongo kolohoka viaye oco a kape Uriya vulala wo kovaso kuyaki kuenda oku u siapo okuti o siala likaliaye. Eci Uriya a pondiwa kuyaki, Daviti wa kuela Batisieva.

Pole, Yehova wa mola ovina viosi vivĩ via kala oku lingiwa. Nye Yehova a linga? Eye wa tuma uprofeto Natana ku Daviti. Natana wa sapuila Daviti hati: ‘Ulume umue ohuasi wa kuatele olomeme vialua kuenda ulume umue osuke wa kuatele lika okameme kamosi a solele calua. Ulume ohuasi wa tambula okameme kaco kulume osuke.’ Daviti wa temẽle calua kuenje wa popia hati: ‘Ulume waco ohuasi o sesamẽla oku fa!’ Natana wa sapuila Daviti hati: ‘Ulume waco ohuasi ove muẽle!’ Daviti wa sumuile calua kuenje wa popia la Natana hati: ‘Nda linga ekandu kovaso a Yehova.’ Ekandu liaco lia nena ovitangi vialua ku Daviti kuenda kepata liaye. Yehova wa yambula Daviti, pole, wa ecelela okuti amamako oku kala lomuenyo momo Daviti wa kala ukuacili kuenda embombe.

Daviti wa yonguile oku tungila Yehova onembele yimue, pole, Yehova wa nõla Salomone omõla a Daviti oco a tunge onembele yaco. Daviti  wa fetika oku pongiyila Salomone ovina kuenje wa popia hati: ‘Onembele ya Yehova yi sukila oku posoka calua. Salomone umalẽhe handi, pole, ame ndu u kuatisa oku pongiya ovina viaco.’ Daviti wa eca onepa yalua yolombongo viaye oco vi kuatise kupange woku tunga. Eye wa sandiliya olonalavayi vimue via loñoloha. Handi vali, eye wangiliya ulu lopalata kuenda oviti viosedru via tunda ko Turo kuenda ko Sidono. Osimbu Daviti a panda koku fa, wa eca ku Salomone oloseteko vioku tunga onembele. Eye wa popia hati: ‘Yehova wa nyĩhile ocisonehua eci oco ceciwe kokuove. Yehova oku kuatisa. Ku ka kuate usumba. Kolisako kuenda fetika upange.’

“Wosi o limbika akandu aye ka kuata onima yiwa, pole, omunu wosi o litavela kuenje o liwekapo oku a linga, o lekisiwa ohenda.”—Olosapo 28:13