Skip to content

Skip to table of contents

Olombangi Via Yehova

Select language Umbundu

 OCIPAMA 33

Ruti Kuenda Naomi

Ruti Kuenda Naomi

Vokuenda kuotembo yimue yonjala ko Isareli, ukãi umue o tukuiwa hati Naomi, wa ilukila kofeka yo Moavi kumue lulume waye kuenda omãla vaye vavali valume. Noke ulume wa Naomi wa fa. Omãla vaye va kuelele akãi vamue vo ko Moavi okuti Ruti la Arape. Kuenje noke yotembo yimue omãla valume va Naomi va favo.

Eci Naomi a yeva okuti onjala yapua ko Isareli, wa nõlapo oku tiukila kimbo liaye. Ruti kuenda Arape va kuama Naomi kungende waye, pole, osimbu va kala vonjila Naomi wa va sapuila hati: ‘Ene wa kaili akãi vawa komãla vange kuenda olondatembo viwa kokuange. Njongola okuti vu kuela vali. Tiukili ko Moavi.’ Akãi va popia vati: ‘Etu tu ku sole! Ka tu yongola oku ku sia.’ Naomi wamamako oku va sapuila oco va tiukile. Arape wa tiukila, pole, Ruti ka tavele. Naomi wa sapuila Ruti hati: ‘Arape wa tiukila ku vangandiaye kuenda kolosuku viaye. Lovevo tiukila laye.’ Pole, Ruti wa popia hati: ‘Si liwekapo oku ku kuama. Omanu vove va linga omanu vange kuenda Suku yove o lingavo Suku yange.’ Nye o sima okuti oco Naomi a yeva vutima eci Ruti o sapuila olondaka evi?

Ruti la Naomi va pitĩla ko Isareli kotembo yoku ungula osevata. Eteke limue Ruti wa enda oku pupulula osevata vepia liulume umue o tukuiwa hati, Boasi okuti wa kala omõla a Rahava. Eye wa yeva okuti Ruti wa kala u Moavi kuenda ka silepo Naomi. Boasi wa sapuila olonalavayi viaye oco vi supisepo olomema vimue vio sevata vepia okuti Ruti o vi pupulula.

 Vuteke waco, Naomi wa pula Ruti hati: ‘Etaili hẽ, wa ka pupuluile pi?’ Ruti hati: ‘Nda ka pupuluile kepia liulume umue o tukuiwa hati, Boasi.’ Naomi wo sapuila hati: ‘Boasi ukuepata liulume wange. Amamako oku talavaya kepia liaye kuenda kala lafeko vaye. O tatiwa ciwa kepia liaco.’

Ruti wamamako oku talavaya kepia lia Boasi toke eci oku ungula kua pua. Boasi wa limbuka okuti Ruti wa talavaya calua kuenda ukãi umue uwa. Koloneke viaco, nda ulume umue o fa kuenje ka kuatele omãla, vakuepata liaye va ponduile oku kuela ukãi waco. Omo liaco, Boasi wa kuela Ruti. Ovo va cita omõla umue ulume vo luka Ovede, una weya oku linga kukululu ya Soma Daviti. Akamba va Naomi va sanjukile calua. Ovo vati: ‘Tete Yehova wa ku ĩha Ruti una wa ku tata ciwa kaliye o kuete onekulu yimue. Yehova a sivayiwe.’

“Kuli ekamba limue li sole calua vakuavo okuti, manjaye muẽle ci sule.”—Olosapo 18:24