Skip to content

Skip to table of contents

Olombangi Via Yehova

Select language Umbundu

 OCIPAMA 34

Gideone wa Yula va Midiane

Gideone wa Yula va Midiane

Vukuenda kuotembo, va Isareli va liwekapo vali oku fendela Yehova kuenje va fetika oku fendela olosuku viesanda. Va Midiane vokuenda kuanyamo epanduvali, va nyana ovinyama via va Isareli kuenda va nyõla ovaima avo. Oco va Isareli va puluke ku va Midiane, va salama valeva kuenda volomunda. Ovo va pinga ku Yehova oco a va popele. Kuenje Yehova wa tuma ungelo kumalẽhe umue o tukuiwa hati, Gideone. Ungelo wa popia hati: ‘Yehova wa ku nõla oco o linge esualali lia pama.’ Gideone wa pula hati: ‘Ndi popela ndati va Isareli? Ame ndi sule.’

Gideone wa ponduile oku kũlĩha ndati okuti Yehova wo nõla? Eye wa kapa ocipa posi kuenda wa sapuila Yehova hati: ‘Lomẽle nda okuti kocipa oko lika kua wila olume kuenda osi ya kukuta, ndi limbuka okuti wa ndi nõla oco ndi popele va Isareli.’ Keteke lia kuamamo komẽle, ocipa oco lika ca yula lolume, pole, osi ya kukuta! Noke Gideone wa pinga okuti komẽle yeteke likuavo, ocipa ci kukuta kuenda osi yi yula. Eci ovina viaco via lingiwa, Gideone wa tava okuti Yehova eye muẽle wo nõla. Eye wongolola asualali vaye oco va liyake la va Midiane.

 Yehova wa sapuila Gideone hati: ‘Ngeca eyulo ku va Isareli. Pole, omo okuti o kuete asualali valua, o pondola oku sima okuti o yula uyaki waco longusu yove muẽle. Omo liaco, omanu vana va kuete usumba va sapuila oco va tiukile kolonjo.’ Ci soka 22.000 kasualali va tiukila kolonjo kuenda ci soka 10.000 va siala. Noke Yehova wa popia hati: ‘Handi kuli asualali valua. Lokila lavo volui kuenda va sapuila oco va nyue ovava. Siala lika la vana okuti osimbu va nyua ovava, va lavulula ovanyãli.’ Ci soka 300 kalume ovo lika va lavulula osimbu va kala oku nyua ovava. Yehova wa likuminya okuti alume vaco vatito va sialapo, va laikele oku yula eci ci soka 135.000 kasualali a va Midiane.

Vokuenda kuteke waco, Yehova wa sapuila Gideone hati: ‘Otembo yoku liyaka la va Midiane ya pitĩla!’ Gideone wa eca kalume vaye anguena kuenda asanga anene a kuete ovimĩhi vokati kaco. Eye wa va sapuila hati: ‘Vanji kokuange, lingi ndomo ndinga.’ Gideone wa sika enguena liaye, wa tetola esanga liaye, wa kuata umĩhi waye loku kaluka hati: ‘Osipata ya Yehova la Gideone!’ Ci soka 300 kalume va ci lingavo. Va Midiane va kala lusumba, kuenje va tilila kolonepa viosi. Omo liesakalalo, va fetika oku liñualelapo omunu lukuavo. Yimue vali onjanja okuti, Yehova wa kuatisa va Isareli oku yula ovanyãli vavo.

“Unene wa piãla u tunda ku Suku, kokuetu hakoko.”—2 Va Korindo 4:7