Skip to content

Skip to table of contents

Olombangi Via Yehova

Select language Umbundu

 OCIPAMA 25

Otavernakulu Yimue Yoku Fendelela

Otavernakulu Yimue Yoku Fendelela

Eci Mose a kala Komunda Sinai, Yehova wo sapuila oco a tunge ombalaka yimue yilikasi yi tukuiwa hati otavernakulu, muna va Isareli va ponduile oku fendela Yehova. Ovo va ponduile oku ambata otavernakulu yaco kuosi va sondolokela.

Yehova wa popia hati: ‘Sapuila omanu oco va ece ovina vi likuata lepondolo liavo okuti vi kuatisa koku tunga otavernakulu.’ Va Isareli va eca ulu, opalata, osipi, ovawe a tĩla, kuenda ovina vioku liposuisa. Va ecavo olonanga, ovalatanya, ovipa viovinyama, kuenda ovina vikuavo. Ovo va eca ovina vialua okuti Mose wa sukilile oku va sapuila hati: ‘Ovina tu kuete vi tẽla! Ko ka neni vali cimue.’

Alume valua va loñoloha kuenda akãi, va kuatisa koku tunga otavernakulu. Yehova wa va ĩha uloño woku linga upange waco. Omanu vamue va kala kupange woku pota, vakuavo woku tuta ale oku tonga. Handi vakuavo va kala kupange woku songa ovawe, woku talavaya lulu ale oku songa avaya.

Va Isareli va tunga otavernakulu ndeci Yehova a va sapuila. Ovo va linga onanga yimue ya fina oco yi tepe otavernakulu volonepa vivali okuti, Ohondo yi Kola kuenda Ohondo yi Kola Koku Kola. Vohondo yi Kola Koku Kola mua kala ocikasia covisila ca pangiwa lavaya o akasia kuenda ulu. Vohondo yi Kola mua kala ociyekelo culu condiyelo, omesa kuenda utala woku timiha isensu. Vocitali mua kala ombasiya yosipi kuenda utala umue unene. Ocikasia covisila ca enda oku ivaluisa va Isareli ohuminyo va linga yoku pokola ku Yehova. Ove hẽ  wa kũlĩha eci ci lomboloka ocisila? Ci lomboloka ohuminyo yimue yilikasi.

Yehova wa nõla Arone kuenda omãla vaye oco va talavaye votavernakulu ndovitunda. Ovo va sukilile oku tata ocitumãlo caco, kuenda oku linga upange woku eca ovilumba ku Yehova. Ocitunda cinene, Arone, eye lika wa kuatele omoko yoku iñila Vohondo yi Kola Koku Kola. Eye wa enda oku ci linga onjanja yimosi vunyamo oco a ece ocilumba cakandu aye, cepata liaye, kuenda ocilumba cakandu epata liosi lia Isareli.

Va Isareli va mãla oku tunga otavernakulu eci papita unyamo umosi tunde eci va tunda Kegito. Kaliye va kuete ocitumãlo coku fendelela Yehova.

Yehova wa yukisa otavernakulu lulamba waye kuenje kua kala elende limue lia sikĩlila otavernakulu yaco. Osimbu elende lia sikĩlila otavernakulu va Isareli vamamako oku kala pocitumãlo va kasi. Pole, eci elende li yeluka ovo va limbuka okuti ya pitĩlapo otembo yoku amamako lungende. Catavele oku yelula otavernakulu loku yambata kuenje va kuama elende.

“Noke nda yeva ondaka yolukandi ya tunda kocalo yiti: ‘Tala! Ombalaka ya Suku yi kasi lomanu kuenje eye o tunga lavo kuenda ovo va linga omanu vaye. Kuenje Suku o kala lavo.’”—Esituluilo 21:3