Skip to content

Skip to table of contents

Olombangi Via Yehova

Select language Umbundu

 OCIPAMA 18

Ocisapa ci Kasi Oku Taima

Ocisapa ci Kasi Oku Taima

Mose wa kala ko Midiane vokuenda kueci ci soka 40 kanyamo. Eye wa kuelele kuenda wa kuatele omãla. Eteke limue osimbu a kala oku lisa olomeme ocipepi Lomunda Sinai, wa mola ocina cimue ci komõhisa. Ocisapa cimue ca kala oku taima, pole, ka ca kaile oku pia! Eci Mose amẽla ocipepi oco a mole esunga lieci ocisapa ka ci kasilili oku pia, wa yeva ondaka yimue ya tunda vocisapa ya popia yiti: ‘A Mose! Ku ka amẽle ocipepi. Lula olohaku viove, momo ocitumãlo o kasi ci kola.’ Yehova eye wa kala oku popia pocakati cungelo umue.

Mose wa kuata usumba kuenje wa sitika ocipala caye. Ondaka yaco ya popia yiti: ‘Nda limbuka ohali ya va Isareli. Ndi ka va popela peka lia va Egito kuenje ndi va nena vofeka yimue yiwa. Ove o ka songuila afendeli vange oku tunda Kegito.’ Ku tava hẽ okuti eci ca komõhisa Mose?

Mose wa pula hati: ‘Nda omanu va ndi pula okuti helie wa ndi tuma, nye ndi va sapuila?’ Suku wa tambulula hati: ‘Va sapuila okuti, Yehova, Suku ya Avirahama, Suku ya Isake kuenda Suku ya Yakoba eye wa numa kokuene.’ Mose wa tambulula hati: ‘Nda okuti ovo ka va tava oku yeva kondaka yange, nye ndi linga?’ Yehova wa eca ku Mose uvangi u lekisa okuti wa laikele oku u kuatisa. Eye wa sapuila Mose oco a imbe ombueti yaye posi. Noke ombueti ya linga onyõha! Eci Mose a kuata kucĩla wonyõha, oyo ya pongoloka vali ombueti. Yehova wa popia hati: ‘Eci o linga ocikomo eci, ci kala uvangi wokuti ame nda ku tuma.’

Mose wa popia hati: ‘Ame si tẽla oku vangula ciwa. Yehova wo likuminya hati: ‘Ame hu longisa eci o ka popia kuenda ndi tuma manjove Arone oco a ku kuatise.’ Omo okuti Mose wa kũlĩhĩle okuti Yehova wa kala laye, wambata ukãi waye lomãla vaye kuenje wa tiukila Kegito.

“Ko ka sakalali ndomo vu popia ale ceci vu popia, momo kowola yaco eci vu ka popia cu wĩhiwi.”—Mateo 10:19