Skip to content

Skip to table of contents

Olombangi Via Yehova

Select language Umbundu

 OCIPAMA 9

Omõla Umue wa Lavokawa!

Omõla Umue wa Lavokawa!

Avirahama la Sara va kala anyamo alua tunde eci va kuela. Ovo va siapo ovokuasi avo kuenda onjo yavo ko Uri kuenje va kala vombalaka. Pole, Sara ka lisiõsuĩle, momo wa kolelele Yehova.

Sara wa yonguile oku kuata omõla. Omo liaco, wa sapuila Avirahama hati: ‘Nda wa pekela lupika wange Hagare, ndi muila omãla vokuaye.’ Vokuenda kuotembo Hagare wa cita omõla ulume. Omõlaco weya oku tukuiwa hati, Isameli.

Vokuenda kuotembo eci Avirahama a tẽlisa 99 kanyamo kuenda Sara 89 kanyamo, va nyuliwa lalume vatatu. Avirahama wa laleka alume vaco oco va puyuke vemehi liuti okuti va lia kumosi. Ove hẽ wa kũlĩha alume vaco vatatu veyile? Alume vaco ovangelo! Ovo va sapuila Avirahama vati: ‘Unyamo wiya ove lukãi wove vu cita omõla.’ Sara wa kala oku yeva ovina viosi via popiwa osimbu a kala vombalaka. Kuenje wa li yola eye muẽle, loku sima ndoco: ‘Ndi pondola oku kuata vali ndati omõla cilo okuti nda kuka ale?’

Vunyamo wa kuamamo, Sara wa cita omõla ulume ndeci ungelo wa Yehova a ci popele. Avirahama wa luka omõlaco hati, Isake ci lomboloka okuti, ‘Ocinjola.’

 Eci Isake a kuata anyamo atãlo, Sara wa mola Isameli oku yola Isake epembe. Sara wa yonguile oku teyuila omõlaye kuenje wa pinga ku Avirahama oco a tundise Hagare la Isameli. Pole, Avirahama ka yonguile oku ci linga. Yehova wa sapuila Avirahama hati: ‘Yevelela Sara. Omõlove Isameli ndu kuatisa. Pole, ohuminyo yange yi ka tẽlisiwa ku Isake.’

“Omo liekolelo Sara wa tambula ongusu yoku mina omõla . . . momo eye wa tendele okuti Suku una wa linga ohuminyo yaco wa kolelua.” —Va Heveru 11:11