Skip to content

Skip to table of contents

Olombangi Via Yehova

Select language Umbundu

 OCIPAMA 100

Paulu kuenda Timoteo

Paulu kuenda Timoteo

Timoteo umalẽhe umue wa kala vekongelo lio Lustra. Isiaye wa kala u Helasi kuenda inaye wa kala u Yudea. Inaye Eunike kuenda nyokulu yaye Loisi va longisa Timoteo ovina viatiamẽla ku Yehova tunde vutila.

Eci Paulu a nyula o Lustra vokuenda kungende waye wavali woku kunda, wa limbuka okuti Timoteo wa solele calua vamanji kuenda wa kuatele onjongole yoku va kuatisa. Kuenje Paulu wa laleka Timoteo oco va ende kumosi kungende waye. Vokuenda kuotembo, Paulu wa pindisa Timoteo oco a kale ukundi uwa kuenda ulongisi wolondaka viwa.

Espiritu sandu lia songuila Paulu kuenda Timoteo kuosi va endaele. Vuteke umue vocinjonde, ulume umue wa sapuila Paulu oco eye ko Makedonia oku va kuatisa. Omo liaco, Paulu, Timoteo la Sila kuenda Luka va enda ko Makedonia oku kunda kuenda oku tumbika akongelo.

Ko Makedonia volupale luo Tesalonike, alume valua kuenda akãi va linga Akristão. Pole, va Yudea vamue va kuatela onya Paulu lava va kala laye. Ovo vongolola owiñi umue kuenda vambata vamanji kolombiali violupale, loku kaluka vati: ‘Alume ava anyali wuviali wo Roma!’ Omuenyo wa Paulu la Timoteo wa kala kohele kuenje va tilila ko Berea vokuenda kuteke.

Omanu vo ko Berea va kala lonjongole yoku lilongisa olondaka viwa kuenje ci kale va Helasi kuenda va Yudea va tava kocili. Pole, eci va Yudea vamue vo ko Tesalonike va votola ema, Paulu wa enda ko Atenai. Timoteo la Sila va siala ko Berea oco va pamise vamanji. Vokuenda kuotembo Paulu wa tuma vali Timoteo ko Tesalonike oco a kuatise vamanji va kala oku liyaka lalambalalo alua.  Noke Paulu wa tuma Timoteo oco a nyule akongelo akuavo kuenda oku a kolisa.

Paulu wa sapuila Timoteo hati: ‘Vana va yongola oku vumba Yehova, va ka lambalaliwa.’ Timoteo wa lambalaliwa kuenda wa kapiwile vokayike omo liekolelo liaye. Pole, eye wa sanjukile omo wa kuata epuluvi lioku lekisa ekolelo liaye ku Yehova.

Paulu wa sapuila va Filipoi hati: ‘Ame ndi kasi oku tuma Timoteo kokuene. Eye o kolongisi eci ci lomboloka oku endela vocili, kuenda o ka vu pindisi kupange woku kunda.’ Paulu wa kũlĩhĩle okuti wa ponduile oku kolela Timoteo. Ovo va kala akamba poku talavayela kumosi kupange woku kunda vokuenda kuanyamo alua.

“Si kuete omunu ukuavo ndi tuma okuti o kasi lonjongole ndeyi yaye yoku vu tati ciwa. Vakuavo vosi va sakalala lika lolonjongole viavo muẽle okuti, via Yesu Kristu ci sule.” —Va Filipoi 2:20, 21