Skip to content

Skip to table of contents

Olombangi Via Yehova

Select language Umbundu

 OCIPAMA 92

Yesu o Molẽha Kalume Vakuakupipa

Yesu o Molẽha Kalume Vakuakupipa

Noke yotembo yimue tunde eci Yesu a molẽha kovapostolo, Petulu wa nõlapo oku ka pipa Vokalunga ko Galilea. Tomasi, Tiago, Yoano kuenda olondonge vikuavo via enda laye. Ovo va kala oku pipa vokuenda kuteke wosi, pole, ka va kuatele cimue.

Komẽle yeteke likuavo, ovo va mola ulume umue wa talama kohulo yokalunga. Oku upisa kohulo yokalunga wa pula olondonge hati: ‘Wa kuati olõsi?’ Ovo va tambulula vati: “Sio!” Ulume wa popia hati: “Imbi owanda konele yondio yowato.” Eci va ci linga, owanda weyuka olõsi vialua okuti ka va tẽlele oku u kapa vowato. Yoano vonjanja yaco, wa limbuka okuti ulume waco Yesu kuenje wa popia hati: “U Ñala!” Vepuluvi liaco, Petulu wa limba vovava kuenje wa liteva toke kohulo. Olondonge vikuavo vieyilila vowato.

Eci va pitĩla kohulo, va mola ombolo kuenda ombisi ya kala oku yokiwa vondalu. Yesu wa va sapuila oco va nene olõsi vimue va kuata  oco va vi vokiye kuevi via kala oku yokiwa. Kuenje wa popia hati: “Enjui, ndo li ongau.”

Eci va mala oku lia ongau, Yesu wa pula Petulu hati: ‘O ndi sole vali okuti oku pipa ku sule?’ Petulu wa kumbulula hati: ‘Oco, a Ñala, o cĩ okuti hu sole.’ Yesu wa popia hati: “Lisa olomeme viange.” Yesu wa pula vali hati: ‘A Petulu, o ndi sole?’ Petulu wo kumbulula hati: ‘A Ñala, o cĩ okuti hu sole.’ Yesu wa popia hati: “Lava otulomeme tuange.” Yesu wa pula vali onjanja yatatu. Petulu wa sumua calua. Eye wa popia hati: ‘A Ñala, ove wa kũlĩha ovina viosi. Wa kũlĩha okuti hu sole.’ Yesu wa popia hati: “Lisa otulomeme tuange.” Noke wa sapuila Petulu hati: “Amamako oku ñuama.”

“[Yesu] wa va sapuila hati: ‘Ñuami, ndu lingisi anyanga vomanu.’ Haico va sia awanda avo kuenje vo kuama.” —Mateo 4:19, 20